ଭାରତ-ପାକିସ୍ତାନ ସିରିଜ୍ ଏବେ ସମ୍ଭବ ନୁହେଁ, ବିସିସିଆଇ କହିଲା ନିଷ୍ପତ୍ତି ସରକାର ନେବେ

ମୁମ୍ବାଇ : ନିକଟରେ ବିସିସିଆଇ ସଭାପତି ରୋଜର ବିନ୍ନି ଓ ଉପସଭାପତି ରାଜୀବ ଶୁକ୍ଲା ପାକିସ୍ତାନ ଗସ୍ତରେ ଯାଇଥିଲେ। ଏହି ସମୟରେ ସେମାନଙ୍କୁ ପାକିସ୍ତାନ କ୍ରିକେଟ ବୋର୍ଡ ପକ୍ଷରୁ ଭବ୍ୟ ସ୍ବାଗତ କରାଯିବା ସହ ସେମାନେ ଲାହୋରରେ ମ୍ୟାଚ୍ ଦେଖିଥିଲେ। ବିସିସିଆଇ ଶୀର୍ଷ ଅଧିକାରୀଙ୍କ ଏହି ପାକିସ୍ତାନ ଗସ୍ତ ପରେ ପୁଣି ଥରେ ଭାରତ-ପାକ୍ କ୍ରିକେଟ ସିରିଜ ନେଇ ଆଶା ସୃଷ୍ଟି ହୋଇଥିଲା । ତେବେ ଏବେ ଏହା ସମ୍ଭବ ନୁହେଁ ବୋଲି ବିନ୍ନି ସ୍ପଷ୍ଟ କରିଦେଇଛନ୍ତି ।

ଭାରତ ଫେରିବା ପରେ ରୋଜର ବିନ୍ନି କହିଛନ୍ତି ଯେ ଆମ ମଧ୍ୟରେ ବହୁତ ଭଲ କଥାବାର୍ତ୍ତା ହୋଇଥିଲା। ଆମକୁ ଭବ୍ୟ ସ୍ୱାଗତ କରାଯାଇଥିଲା। ଏହି ସମୟରେ ପାକିସ୍ତାନ କ୍ରିକେଟ୍ ବୋର୍ଡ ସହ ଜଡ଼ିତ ଲୋକମାନେ ଆମର ବିଶେଷ ଯତ୍ନ ନେଇଥିଲେ। ଏହି ପାକିସ୍ତାନ ଗସ୍ତର ଉଦ୍ଦେଶ୍ୟ ଥିଲା କ୍ରିକେଟ୍ ଦେଖିବା ଏବଂ ଆନୁଷଙ୍ଗିକ ପ୍ରସଙ୍ଗ ଉପରେ ଆଲୋଚନା କରିବା । ମୋଟାମୋଟି ଭାବେ ଏହା ଏକ ଭଲ ଗସ୍ତ ଥିଲା।

ଯେତେବେଳେ ତାଙ୍କୁ ପଚରାଯାଇଥିଲା ଯେ ଭାରତ ଓ ପାକିସ୍ତାନ ମଧ୍ୟରେ ଦ୍ୱିପାକ୍ଷିକ ଶୃଙ୍ଖଳା ହେବ କି? ଏହା ଉପରେ ସେ କହିଥିଲେ ଯେ ବିସିସିଆଇ ଏହି ପ୍ରଶ୍ନର ଉତ୍ତର ଦେଇପାରିବ ନାହିଁ। ଏହା ସରକାରଙ୍କ ସହ ଜଡ଼ିତ ପ୍ରସଙ୍ଗ। ଏହା ପାଇଁ ଆମକୁ ଅପେକ୍ଷା କରିବାକୁ ପଡ଼ିବ। ବିଶ୍ବକପ୍ ରେ ଆଉ ଅଧିକ ସମୟ ନ ଥିବାରୁ ପାକିସ୍ତାନ ଦଳ ବିଶ୍ବକପ୍ ଖେଳିବାକୁ ଭାରତ ଆସିବ ବୋଲି ସେ କହିଛନ୍ତି।