ଦକ୍ଷିଣ ଆଫ୍ରିକା ବିପକ୍ଷରେ ଟି-୨୦ ଶୃଙ୍ଖଳା ଜିତିବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବ ଭାରତ, ବେଙ୍ଗାଲୁରୁରେ ରାତି ୭ଟାରୁ ମୁକାବିଲା
ବେଙ୍ଗାଲୁରୁ: ମୋହାଲିରେ ସହଜ ବିଜୟ ପରେ ଭାରତୀୟ କ୍ରିକେଟ ଟିମ ରବିବାର ବେଙ୍ଗାଲୁରୁସ୍ଥିତ ଏମ ଚିନ୍ନାସ୍ୱାମୀ ଷ୍ଟାଡିୟମରେ ଦକ୍ଷିଣ ଆଫ୍ରିକା ବିପକ୍ଷରେ ତୃତୀୟ ତଥା ଶେଷ ଟି-୨୦ ମ୍ୟାଚ ଜିତି ଶୃଙ୍ଖଳାକୁ ନିଜ ନାମରେ କରିବାକୁ ଚାହିଁବ। ଏହି ମୁକାବିଲା ରାତି ୭ରେ ହେବ। ଧର୍ମଶାଳାରେ ପ୍ରଥମ ମ୍ୟାଚ ବର୍ଷା ଯୋଗୁଁ ବାତିଲ ହେବା ପରେ ଭାରତ ମୋହାଲିରେ ଦ୍ୱିତୀୟ ମ୍ୟାଚରେ ୭ ଓ୍ଵିକେଟରେ ବିଜୟୀ ହୋଇ ୧-୦ରେ ଅଗ୍ରଣୀ ଅଛି।
Sambad is now on WhatsApp
Join and get latest news updates delivered to you via WhatsApp
ଦ୍ୱିତୀୟ ମ୍ୟାଚରେ ଭାରତ ଦକ୍ଷିଣ ଆଫ୍ରିକାକୁ ୧୪୯ ରନରେ ଅଟକାଇଥିଲା ଏବଂ ପୁଣି କୋହଲିଙ୍କ ଅପରାଜିତ ୭୨ ରନ ବଳରେ ୭ ଓ୍ଵିକେଟରେ ମ୍ୟାଚ ଜିତିଥିଲା। କୋହଲି ଅର୍ଦ୍ଧଶତକ ଇନିଂସ ଖେଳିଥିବା ବେଳେ ଦିପକ ଚହର ୨୨ ରନ ଦେଇ ୨ଟି ଓ୍ଵିକେଟ ନେଇଥିଲେ।
ଆୟୋଜକ ଟିମ୍ ପାଇଁ ଓ୍ଵିକେଟକିପର-ବ୍ୟାଟସ୍ମ୍ୟାନ ଋଷଭ ପନ୍ତଙ୍କ ଫର୍ମ ଚିନ୍ତାର ବିଷୟ ପାଲଟିଛି। ସେ ଗତ ମ୍ୟାଚରେ କେବଳ ୪ ରନ କରି ଆଉଟ୍ ହୋଇଥିଲେ। ବ୍ୟାଟିଂ କୋଚ୍ ବିକ୍ରମ ରାଠୋର ପୂର୍ବରୁ କହିଛନ୍ତି ଯେ, ପନ୍ତଙ୍କୁ ସତର୍କମୂଳକ ଭାବେ ବ୍ୟାଟିଂ କରିବାକୁ ହେବ। ତେଣୁ ପନ୍ତ ଏବେ ନିଜର ଫର୍ମ ଖୋଜିବାକୁ ଉଦ୍ୟମ କରିବେ।
ସମ୍ଭାବ୍ୟ ଭାରତ: ବିରାଟ କୋହଲି (ଅଧିନାୟକ), ରୋହିତ ଶର୍ମା, ଶିଖର ଧାୱନ, ଶ୍ରେୟସ୍ ଆୟର, ଋଷବ ପନ୍ତ, ହାର୍ଦିକ ପାଣ୍ଡ୍ୟା, ରବୀନ୍ଦ୍ର ଜାଦେଜା, ୱାସିଂଟନ ସୁନ୍ଦର, ଦୀପକ ଚହର, କ୍ରୁନାଲ ପାଣ୍ଡ୍ୟା/ ରାହୁଲ ଚହର/ଖଲିଲ ଅହମ୍ମଦ, ନଭଦୀପ ସଇନି।
ସମ୍ଭାବ୍ୟ ଦକ୍ଷିଣ ଆଫ୍ରିକା: କ୍ବିଣ୍ଟନ୍ ଡି’ କକ୍ (ଅଧିନାୟକ), ରସି ଭାନଡର ଦୁସେନ, ଟେମ୍ବା ବଭୁମା, ଡେଭିଡ୍ ମିଲର, କାଗିସୋ ରବାଦା, ତାବ୍ରାଇଜ୍ ସାମି, ଡ୍ବେନ୍ ପ୍ରିଟୋରିୟସ୍, ଆନ୍ଦିଲ ଫେଲୁକ୍ବାଓ, ବିୟର୍ନ ଫରଟ୍ବିନ୍, ଆନରିଚ୍ ନର୍ତଜେ, ରେଜା ହେଣ୍ଡ୍ରିକ୍ସ।