ମ୍ୟାଚ୍‌ ଦେଖିବାକୁ ଆସି ପ୍ରେମରେ ପଡ଼ିଥିବା ଯୁବତୀଙ୍କୁ ଗୋପନରେ ବିବାହ କଲେ ଭାରତୀୟ କ୍ରିକେଟ୍‌ ଷ୍ଟାର୍‌ ସରଫରାଜ୍‌ ଖାନ୍‌

ନୂଆଦିଲ୍ଲୀ: ଇଣ୍ଡିଆନ୍‌ ପ୍ରିମିୟର୍‌ ଲିଗ୍‌ (ଆଇପିଏଲ୍‌)ର ଷ୍ଟାର୍‌ ଖେଳାଳି ସରଫରାଜ୍‌ ଖାନ୍‌ ବିବାହ ବନ୍ଧନରେ ବାନ୍ଧି ହୋଇଛନ୍ତି। ମୁମ୍ବାଇରେ ଜନ୍ମଲାଭ କରିଥିବା ୨୫ ବର୍ଷୀୟ ସରଫରାଜ୍‌ କଶ୍ମୀରର ଜଣେ ଯୁବତୀଙ୍କ ସହ ନିକ୍‌ହା କରିଛନ୍ତି। ତାଙ୍କ ପତ୍ନୀଙ୍କ ନାମ ରୋମାନା ଜହୁର। ତାଙ୍କ ବିବାହ କଶ୍ମୀରର ସୋଫିଆ ଜିଲ୍ଲାର ପଶପୋରା ଗାଁରେ ହୋଇଛି। ସର୍‌ଫରାଜ୍‌ଙ୍କ ବିବାହ ସମୟର କିଛି ଫଟୋ ଓ ଭିଡିଓ ଏବେ ସୋସିଆଲ୍‌ ମିଡିଆ‌ରେ ଭାଇରାଲ୍‌ ହୋଇଛି।

ନିକଟରେ ଆଇପିଏଲ୍‌ରେ ଧମାଲ୍‌ ମଚାଇଥିବା ଏହି ଖେଳାଳି ଜଣକ ଚଳିତବର୍ଷ ଦିଲ୍ଲୀ କ୍ୟାପିଟାଲ୍‌ ପାଇଁ ଖେଳିଛନ୍ତି। ହେଲେ ଦୁର୍ଭାଗ୍ୟକୁ ବହୁତ ଭଲ ଖେଳିବା ପରେ ବି ତାଙ୍କୁ ଭାରତୀୟ କ୍ରିକେଟ୍‌ ଟିମ୍‌ରେ ସ୍ଥାନ ମିଳିନାହିଁ।

ସେ ଏବେ ପର୍ଯ୍ୟନ୍ତ ଅନ୍ତର୍ଜାତୀୟ କ୍ର‌ିକେଟ୍‌ରେ ଡେବ୍ୟୁ କରିନାହାନ୍ତି। ସେ ଭାରତୀୟ ଅଣ୍ଡର-୧୯ ଟିମ୍‌ ପାଇଁ ଖେଳିଛନ୍ତି। ଆଇପିଏଲରେ ସେ ପଞ୍ଜାବ କିଙ୍ଗ୍‌ସ ଓ ରୟାଲ୍‌ ଚ୍ୟାଲେଞ୍ଜ ବେଙ୍ଗାଲୁର୍‌ ପାଇଁ ବି ଖେଳି ସାରିଛନ୍ତି।

www.aajtak.in

ବିବାହ ସମୟରେ ସରଫରାଜ୍‌ଙ୍କ ପତ୍ନୀ ନାଲି ରଂଗର ପୋଷାକରେ କନ୍ୟାବେଶରେ ସୁନ୍ଦର ଭାବେ ସଜେଇ ହୋଇଥିବା ବେଳେ ତାଙ୍କୁ ଏକ କଳା ରଂଗର ପୋଷାକରେ ଦେଖିବାକୁ ମିଳିଛି। ସେ ଏହି ବିବାହ ଗୋପନରେ କରିଥିବା ବେଳେ ସୋସିଆଲ୍‌ ମିଡିଆରେ ତାଙ୍କର କିଛି ଫଟୋ ଓ ଭିଡିଓ ଭାଇରାଲ୍‌ ହେବାରେ ଲାଗିଛି।

ଭାଇରାଲ୍‌‌ ହୋଇଥିବା ଏକ ଭିଡିଓରେ ଦେଖିବାକୁ ମିଳିଛି ଯେ ସରଫରାଜ୍‌ ତାଙ୍କ କନ୍ୟାଙ୍କ ଓଢ଼ଣା ଟେକି ତାଙ୍କୁ ମୁଦି ପିନ୍ଧାଇବା ସହ ତାଙ୍କ ମଥାରେ ଏକ ଚୁମ୍ବନ ଦେଉଛନ୍ତି। ତାଙ୍କ କନ୍ୟା ବି ତାଙ୍କୁ ମୁଦି ପିନ୍ଧାଉଥିବା ଭିଡିଓରେ ଦେଖିବାକୁ ମିଳିଛି।

ଜାଣିବାକୁ ମିଳିଛି ଯେ ସର୍‌ଫରାଜଙ୍କର ଜଣେ ସଂପର୍କୀୟ ରୋମାନାଙ୍କ କଲେଜ୍‌ରେ ପଢନ୍ତି। ସେ ହିଁ ରୋମାନାଙ୍କୁ ସର୍‌ଫରାଜ୍‌ଙ୍କ ସହ ପରିଚୟ କରାଇଥିଲେ। ରୋମାନା ଦିଲ୍ଲୀ ମ୍ୟାଚ୍‌ ଦେଖିବାକୁ ଆସି ସର୍‌ଫରାଜଙ୍କ ସହ ସାକ୍ଷାତ୍‌ କରିଥିଲେ। ତା’ପରେ ଦୁହିଁଙ୍କ ମଧ୍ୟରେ ଧୀରେ ଧୀରେ ପ୍ରେମ ହୋଇଥିଲା ଓ ନିକଟରେ ସେମାନେ ବିବାହ କରିଛନ୍ତି।