ରେସ୍ତୋରାଁରେ ରାତ୍ରିଭୋଜନର ମଜାନେଲେ ଭାରତୀୟ ଖେଳାଳି

ରାଉରକେଲା: ଭାରତୀୟ ପୁରୁଷ ହକି ଦଳ ଶନିବାର ଅଭ୍ୟାସରେ ବିରାମ ଲଗାଇଛି। ପୂର୍ବାହ୍ନରେ ବୀର୍ସା ମୁଣ୍ଡା ଷ୍ଟାଡିୟମରେ କଡ଼ା ଅଭ୍ୟାସ ପରେ ଦ୍ବିତୀୟାର୍ଦ୍ଧରେ କିନ୍ତୁ ଖେଳାଳିମାନେ ବିଶ୍ରାମ ନେଇଛନ୍ତି। ନିୟମିତ ଅଭ୍ୟାସରେ ବିରାମ ଦେଇ ଆଜି ଦଳ ପ୍ରଥମଥର ପାଇଁ ରହୁଥିବା ଆକୋମୋଡେସନ୍‌ ବିଲ୍‌ଡିଂରୁ ବାହାରକୁ ପାଦ କାଢ଼ିଛି। ବର୍ଷର ଶେଷ ଦିନରେ ପୁରା ଦଳ ରେଲୱେ ଷ୍ଟେସନ ପାଖରେ ଥିବା ଏକ ରେ‌ସ୍ତୋରାଁରେ ସମୟ ଅତିବାହିତ କରିଥିଲେ। ମୁଖ୍ୟ ପ୍ରଶିକ୍ଷକ ଗ୍ରାହାମ ରିଡ୍‌ ଓ ଅଧିନାୟକ ହର୍ମନପ୍ରୀତ ସିଂହଙ୍କ ନେତୃତ୍ବାଧୀନ ଭାରତୀୟ ଦଳ ଆଜି ରାତି ପ୍ରାୟ ସାଢ଼େ ୮ଟାରେ ଉକ୍ତ ରେସ୍ତୋରାଁରେ ପହଞ୍ଚିଥିଲେ। ସେଠାରେ ରାତ୍ରିଭୋଜନ କରିଥିଲେ। କଡ଼ା ସୁରକ୍ଷା ବଳୟ ମଧ୍ୟରେ ଖେଳାଳିମାନେ ‌ରେସ୍ତୋରାଁରେ ପହଞ୍ଚିଥିଲେ। ସେଠାରେ ପାଖାପାଖି ୧ ଘଣ୍ଟା ୧୫ ମିନିଟ ରହିଥିଲେ। ଖବର ପ୍ରଚାରିତ ହେବାପରେ ସେଠାରେ ହକିପ୍ରେମୀଙ୍କ ଭିଡ଼ ଆରମ୍ଭ ହୋଇଯାଇଥିଲା। ତେବେ ଭିଡ଼ ଏଡ଼ାଇବାକୁ ଖେଳାଳି ସେଠାରୁ ବାହାରି ଆସିଥିଲେ।

ଉଲ୍ଲେଖଯୋଗ୍ୟ, ଗତ ୨୭ ତାରିଖ ସନ୍ଧ୍ୟାରେ ଭାରତୀୟ ଦଳ ଝାରସୁଗୁଡ଼ାରୁ ସଡ଼କ ପଥରେ ରାଉରକେଲାରେ ପହଞ୍ଚିଥିଲା। ତା’ ପରଦିନ, ଅର୍ଥାତ୍‌ ୨୮ ତାରିଖ ପୂର୍ବାହ୍ନରେ ବିଶ୍ରାମ ନେଇଥିଲା ବେଳେ ଅପରାହ୍ନରୁ ଝାଳବୁହା ଅଭ୍ୟାସ ଆରମ୍ଭ କରିଥିଲା। ଏହାପରେ ପ୍ରତ୍ୟହ ପୂର୍ବାହ୍ନ ୯ଟାରୁ ୧୧ ଟା ଏବଂ ଅପରାହ୍ନ ୪ଟାରୁ ରାତି ୮ଟା ପର୍ଯ୍ୟନ୍ତ ପଡ଼ିଆରେ ବିତାଉଥିଲେ।