ଭାରତୀୟ ମହିଳା ଦଳର ପରାଜୟ ଧାରା ଜାରି
ମିତାଲିଙ୍କ ଅର୍ଦ୍ଧଶତକ ବେକାର; ନ୍ୟୁଜିଲାଣ୍ଡ୍ଠୁ ଦ୍ବିତୀୟ ଦିନିକିଆ ବି ହାରିଲା
କୁଇନ୍ସଟାଉନ୍ : ଅଧିନାୟିକା ମିତାଲି ରାଜଙ୍କ କ୍ରମାଗତ ଅର୍ଦ୍ଧଶତକ ସତ୍ତ୍ବେ ଭାରତୀୟ ମହିଳା କ୍ରିକେଟ୍ ଦଳ ଚଳିତ ନ୍ୟୁଜିଲାଣ୍ଡ୍ ଗସ୍ତରେ ପରାଜୟ ଧାରା ଜାରି ରଖିଛି। ଏଥି ସହିତ ଏହି ଗସ୍ତରେ ଲଗାତାର ତୃତୀୟ ମ୍ୟାଚ୍ ହାରିଛି। ଏକମାତ୍ର ଟି-୨୦କୁ ୧୮ ରନ୍ରେ ହାରିଥିବା ଭାରତ ପ୍ରଥମ ଦିନିକିଆକୁ ୬୨ ରନ୍ରେ ହାରିଥିଲା। ମଙ୍ଗଳବାର ଦ୍ବିତୀୟ ଦିନିକିଆରେ ମଧ୍ୟ ପରାସ୍ତ ହୋଇଛି। ଏହି ମ୍ୟାଚ୍ରେ ଘରୋଇ ନ୍ୟୁଜିଲାଣ୍ଡ୍ ୩ ୱିକେଟ୍ରେ ଭାରତକୁ ପରାସ୍ତ କରିଛି। ଅପରାଜିତ ଶତକୀୟ ପାଳି ପାଇଁ ଆମେଲିଆ କେର୍ଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଛି। ଭାରତ ୫ ଟିକିଆ ଦିନିକିଆ ଶୃଙ୍ଖଳାରେ ୦-୨ରେ ପଛୁଆ ରହିଛି।
Sambad is now on WhatsApp
Join and get latest news updates delivered to you via WhatsApp
ମଙ୍ଗଳବାର ମ୍ୟାଚ୍ରେ ଟସ୍ ଜିତି ଭାରତ ପ୍ରଥମେ ବ୍ୟାଟିଂ କରିଥିଲା। ଓପ୍ନର ସାବିନେନି ମେଘନା (୪୯, ୫୦ ବଲ୍, ୭ ଚୌକା) ଏବଂ ଶେଫାଳି ବର୍ମା (୨୪, ୩୮ ବଲ୍, ୧ ଚୌକା, ୧ ଛକା) ପ୍ରଥମ ୱିକେଟ୍ରେ ୬୧ ରନ୍ ଯୋଡ଼ିଥିଲେ। ୟାସ୍ତିକା ଭାଟିଆ (୩୧, ୩୮ ବଲ୍, ୪ ଚୌକା) ମଧ୍ୟ ଭଲ ସହଯୋଗ ଦେଇଥିଲେ। ତେବେ ୨୨ତମ ଓଭର ବେଳକୁ ଭାରତ ୧୧୧ ରନ୍ରେ ୩ ୱିକେଟ୍ ହରାଇ କିଛିଟା ସଂଘର୍ଷ କରିଥିଲା। ହେଲେ ପ୍ରଥମ ମ୍ୟାଚ୍ରେ ୫୯ ରନ୍ କରିଥିବା ଅଧିନାୟିକା ମିତାଲି (୬୬*, ୮୧ ବଲ୍, ୩ ଚୌକା) ଏବଂ ୱିକେଟ୍ରକ୍ଷିକା ରିଚା ଘୋଷ (୬୫, ୬୪ ବଲ୍, ୬ ଚୌକା, ୧ ଛକା) ନିଜ ନିଜର ଅର୍ଦ୍ଧଶତକ ପୂରଣ କରିବା ସହିତ ପଞ୍ଚମ ୱିକେଟ୍ରେ ୧୦୮ ରନ୍ ଯୋଡ଼ି ଦଳକୁ ଭଲ ସ୍ଥିତି ଦେଇଥିଲେ। ଦଳ ମଧ୍ୟ ୬ ୱିକେଟ୍ ବିନିମୟରେ ୨୭୦ ରନ୍ର ଲଢ଼ୁଆ ସ୍କୋର୍ ଛିଡ଼ା କରିଥିଲା। ନ୍ୟୁଜିଲାଣ୍ଡ୍ ପକ୍ଷରୁ ସୋଫି ଦେବିନେ (୮୦-୪୨-୨) ସଫଳ ବୋଲର ରହିଥିଲେ।
ଜବାବରେ ଭାରତୀୟ ବୋଲରମାନେ ୫୩ ରନ୍ ମଧ୍ୟରେ ୩ ୱିକେଟ୍ ଝଡ଼ାଇ ବିଜୟ ସୁଯୋଗ ସୃଷ୍ଟି କରିଥିଲେ। କିନ୍ତୁ ଆମେଲିଆ କେର୍ (୧୧୯*, ୧୩୫ ବଲ୍, ୭ ଚୌକା) ଏବଂ ମାଡି ଗ୍ରିନ୍ (୫୨, ୬୧ ବଲ୍, ୫ ଚୌକା) ଚତୁର୍ଥ ୱିକେଟ୍ରେ ୧୨୮ ରନ୍ ଯୋଡ଼ି ଭାରତ ହାତରୁ ମ୍ୟାଚ୍ ଛଡ଼ାଇ ନେଇଥିଲେ। ଶେଷରେ ଦୁଇ ଭଉଣୀ ଆମେଲିଆ କେର୍ ଓ ଜେସ୍ କେର୍ (୬*, ୩ ବଲ୍, ୧ ଚୌକା) ନ୍ୟୁଜିଲାଣ୍ଡ୍କୁ ଗୋଟିଏ ଓଭର ପୂର୍ବରୁ ବିଜୟ ଭେଟି ଦେଇଥିଲେ। ଅଲ୍ରାଉଣ୍ଡର ଦୀପ୍ତି ଶର୍ମା (୧୦-୧-୫୨-୪) ପ୍ରଭାବୀ ବୋଲିଂ କରିଥିଲେ ମଧ୍ୟ ନ୍ୟୁଜିଲାଣ୍ଡ୍ ୪୯ତମ ଓଭରରେ ୨୭୩/୭ କରି ମ୍ୟାଚ୍ ଜିତି ନେଇଥିଲା।