ଆରମ୍ଭରୁ କେଁ: ଖେଳାଳିଙ୍କ ନାମ ବଦଳାଇ ଦେଇଦେଲେ ନୂଆ ନାମ
ଭୁବନେଶ୍ୱର: ରଙ୍ଗାରଙ୍ଗ ଉଦ୍ଘାଟନୀ ଉତ୍ସବ ସହିତ ଚମତ୍କାର କ୍ରିକେଟ୍ ଭିତରେ ଆରମ୍ଭ ହୋଇଛି ଆଇପିଏଲ୍ର ୧୬ତମ ସଂସ୍କରଣ। ପ୍ରଥମ ମ୍ୟାଚ୍ରେ ଗତବର୍ଷର ବିଜେତା ଗୁଜରାଟ ଟାଇଟନ୍ସ ୫ ୱିକେଟ୍ରେ ୪ ଥର ବିଜେତା ଚେନ୍ନାଇ ସୁପର୍ କିଙ୍ଗ୍ସକୁ ପରାସ୍ତ କରିଛି | ଚେନ୍ନାଇ ସୁପର୍ କିଙ୍ଗ୍ସ ପକ୍ଷରୁ ଦିଆଯାଇଥିବା ୧୭୯ ରନ୍ ବିଜୟ ଲକ୍ଷ୍ୟକୁ ଗୁଜରାଟ ଟାଇଟନ୍ସ ୪ ବଲ୍ ପୂର୍ବରୁ ଜିତିଯାଇଥିଲା। ତେବେ ଏଥର ପ୍ରଥମଥର ପାଇଁ ଓଡ଼ିଆରେ ପ୍ରସାରିତ ହୋଇଛି ଆଇପିଏଲ୍। ପ୍ୟାନେଲ୍ରେ ଓଡ଼ିଆ ଅତିଥି ସାଙ୍ଗକୁ ଆଲୋଚନା, ମ୍ୟାଚ୍ କମେଣ୍ଟ୍ରି, ଗ୍ରାଫିକ୍ସ ମଧ୍ୟ ଓଡ଼ିଆରେ ପ୍ରସାରିତ ହୋଇଛି |
Sambad is now on WhatsApp
Join and get latest news updates delivered to you via WhatsApp
ଜିଓ ସିନେମାରେ ଗତକାଲିଠାରୁ ଆଇପିଏଲ ମ୍ୟାଚର ସିଧାପ୍ରସାରଣ ଆରମ୍ଭ ହୋଇଥିବାବେଳେ ଓଡ଼ିଆ ଭାଷାରେ ଆଇପିଏଲ୍ର ମଜା ନେଇଛନ୍ତି ଦର୍ଶକ। ତେବେ ଏସବୁ ଭିତରେ ଏଭଳି କିଛି ବ୍ୟତିକ୍ରମ ଦେଖାଦେଇଛି ଯାହାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି | ବାସ୍ତବରେ ଗତକାଲି ମ୍ୟାଚ ସମୟରେ ଗୁଜୁରାଟ ଟାଇଟନ୍ସର ଜଣେ ଖେଳାଳିଙ୍କ ନାମ ପରିବର୍ତ୍ତନକୁ ନେଇ ଚର୍ଚ୍ଚା ଜୋର ଧରିଛି | ସୋସିଆଲ ମିଡ଼ିଆ ୟୁଜର୍ସ ଏହାକୁ ନେଇ ଟ୍ରୋଲ୍ କରିଛନ୍ତି | ଏହି ଖେଳାଳିଙ୍କ ନାମ ଜୋସ ଲିଟଲ ହୋଇଥିବାବେଳେ ତାଙ୍କ ନାମ ବଦଳି ଯାଇ ‘ଛୋଟ’ ବୋଲି ଦେଖିବାକୁ ମିଳିଥିଲା | ତେବେ ଜଣଙ୍କର ନାମ କିଭଳି ପରିବର୍ତ୍ତନ କରାଯାଇପାରିବ ବୋଲି ୟୁଜର୍ସ ପ୍ରଶ୍ନ ଉଠାଇଛନ୍ତି |
ଏନେଇ ବରିଷ୍ଠ ସାମ୍ବାଦିକ ସନ୍ଦୀପ ସାହୁ କହିଛନ୍ତି ଯେ ଏହାଦ୍ୱାରା ଓଡ଼ିଆ ଭାଷାର ପ୍ରୀତି ଆମେ ଦେଖାଉନାହେଁ, ବରଂ ଆମର ଅଜ୍ଞତାକୁ ପ୍ରକାଶ କରୁଛେ | କ୍ରିକେଟ ପାଇଁ ସାରା ଦେଶ ପାଗଳ, ଓଡ଼ିଶାରେ ମଧ୍ୟ ଅନେକ କ୍ରିକେଟପ୍ରେମୀ ଅଛନ୍ତି | ତେବେ ହାସ୍ୟାସ୍ପଦ କଥା ହେଉଛି ଯେ କ୍ରିକେଟରଙ୍କ ନାମକୁ ଆମେ ଠିକ ଭାବେ ଲେଖିପାରୁନୁ ବା କହିପାରୁନୁ | ବହୁବର୍ଷ ଯାଏଁ ଆମେ କିମ୍ବଦନ୍ତୀ ଖେଳାଳି ସେନ୍ ୱାର୍ଣ୍ଣଙ୍କ ନାମକୁ ସାନେ ୱାର୍ଣ୍ଣେ ଲେଖୁଥିଲେ | ଆଶ୍ଚର୍ଯ୍ୟ ଲାଗୁଛି ଯେ ଯେଉଁମାନେ ସେଠାରେ ଅଛନ୍ତି ସେମାନେ କ୍ରିକେଟ କମେଣ୍ଟ୍ରି ଦେଖୁଥିବେ, ଶୁଣୁଥିବେ ତାହା ସତ୍ତ୍ୱେ ଏଭଳି ହାସ୍ୟାସ୍ପଦ ଭୁଲ କିଭଳି କରୁଛନ୍ତି | ଯଦି ଶବ୍ଦର ଅର୍ଥ ଅନୁସାରେ ନାମ ବଦଳିଯାଉଥାଏ ତାହା ତ ବଡ ଅଡୁଆ କଥା | ଏହାଦ୍ୱାରା କେବଳ ଆମର ଅଜ୍ଞତା ପ୍ରକାଶ କରୁଛେ ଏବଂ ଯିଏ ବି ଏହି ଦାୟିତ୍ୱରେ ଅଛନ୍ତି ସେ କେବଳ ଅଜ୍ଞତା ପ୍ରକାଶ କରିନାହାଁନ୍ତି ବରଂ ଓଡ଼ିଆ ଭାଷାକୁ ଅପମାନିତ କରିଛନ୍ତି |