ଆଇପିଏଲ : ରାଜସ୍ଥାନକୁ ୧୦୦ ରନରେ ହରାଇଲା ମୁମ୍ବାଇ ଇଣ୍ଡିଆନ୍ସ

ଜୟପୁର : ଜୟପୁରର ସଓ୍ବାଇ ମାନସିଂ ଷ୍ଟାଡିୟମଠାରେ ଚାଲିଥିବା ଆଇପିଏଲର ୫୦ତମ ମ୍ୟାଚରେ ରାଜସ୍ଥାନ ରୟାଲ୍ସକୁ ୧୦୦ ରନରେ ପରାସ୍ତ କରିଛି  ମୁମ୍ବାଇ ଇଣ୍ଡିଆନ୍ସ । ୨୧୮ ରନର  ବିଶାଳ ଲକ୍ଷ୍ୟର ପିଛା କରିଥିବା ରାଜସ୍ଥାନ ଆରମ୍ଭରୁ ଓ୍ବିକେଟ ହରାଇ ସଂକଟରେ ପଡ଼ିଥିଲା ଓ ଶେଷ ପର୍ଯ୍ୟନ୍ତ ଏହି ସଂକଟରୁ ଉଦ୍ଧାର ପାଇପାରିନଥିଲା । ଗତ ମ୍ୟାଚରେ ଶତକ କରିଥିବା ବୈଭବ ସୂର୍ଯ୍ୟବଂଶୀ ଖାତା ଖୋଲିପାରିନଥିଲେ । ଦଳ ପକ୍ଷରୁ ଜୋଫ୍ରା ଆର୍ଚର ୩୦ ରନ କରିଥିବାବେଳେ ରିୟାନ ପରାଗ ୧୬ ରନ କରିଥିଲେ । ମୁମ୍ବାଇ ପକ୍ଷରୁ ଯଶପ୍ରୀତ ବୁମରା ୨ଟି ଓ୍ବିକେଟ ନେଇଥିବାବେଳେ କର୍ଣ୍ଣ ଶର୍ମା ଓ ଟ୍ରେଣ୍ଟ ବୋଲଟ୍ ୩ଟି ଲେଖାଏଁ ଓ୍ବିକେଟ ନେଇଥିଲେ । ଏହି ପରାଜୟ ସହ ପ୍ଲେଅପରୁ ବାଦ ପଡ଼ିଛି ରାଜସ୍ଥାନ ।

ଏହି ମ୍ୟାଚରେ ରାଜସ୍ଥାନ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ନିର୍ଦ୍ଧାରିତ ୨୦ ଓଭରରେ ୨ ଓ୍ବିକେଟ ହରାଇ ୨୧୭ ରନ କରିଥିଲା । ଦଳ ପକ୍ଷରୁ ରୋହିତ ଶର୍ମା ଓ ରିୟାନ ରିକଲଟନ ବିସ୍ଫୋରକ ବ୍ୟାଟିଂ କରି ଆରମ୍ଭରୁ ଦଳକୁ ଏକ ଭଲ ଆରମ୍ଭ ଦେଇଥିଲେ । ରୋହିତ ୫୩ ରନ କରିଥିବାବେଳେ ରିକଲଟନ ୬୧ ରନ କରିଥିଲେ । ଉଭୟ ପ୍ରଥମ ଓ୍ବିକେଟ ଯୋଡ଼ିରେ ୧୧୬ ରନ କରିଥିଲେ । ଦୁଇ ଓପନର ଆଉଟ ହେବା ପରେ ହାର୍ଦ୍ଦିକ ପାଣ୍ଡ୍ୟା ଓ ସୂର୍ଯ୍ୟକୁମାର ଯାଦବଙ୍କ ମଧ୍ୟରେ ଏକ ଭଲ ପାର୍ଟନରସିପ ଦେଖିବାକୁ ମିଳିଥିଲା । ଉଭୟ ବ୍ୟାଟ୍ସମ୍ୟାନ ୪୮ ରନ ଲେଖାଏଁ କରିବା ସହ ଅଳ୍ପକେ ଅର୍ଦ୍ଧଶତକରୁ ବଞ୍ଚିତ ହୋଇଥିଲେ । ରାଜସ୍ଥାନ ପକ୍ଷରୁ ମହିଶ ତିକସନା ଓ ରିୟାନ ପରାଗ ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।