ଗତକାଲି ଲକ୍ଷ୍ନୌ-ପଞ୍ଜାବ ଭାଙ୍ଗିଦେଲେ ଆଇପିଏଲର ଏହି ରେକର୍ଡ

ନୂଆଦିଲ୍ଲୀ: ଗୋଟିଏ ଓଭରରେ କ୍ରମାଗତ ପାଞ୍ଚଟି ଛକା ମାରିବା ଠାରୁ ଆରମ୍ଭ କରି ଆଇପିଏଲ୍ ଇତିହାସରେ ଦ୍ୱିତୀୟ ସର୍ବାଧିକ ରନ ହେବାକୁ ନେଇ ଆଇପିଏଲ୍ ୨୦୨୩ ଅନେକ ସଫଳତାର ସାକ୍ଷୀ ହୋଇଛି | ଶୁକ୍ରବାର ଲକ୍ଷ୍ନୌ ସୁପର ଜାଏଣ୍ଟସ୍ ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ଖେଳାଯାଇଥିବା ମ୍ୟାଚରେ ପ୍ରଥମେ ବ୍ୟାଟିଂ କରି ଲକ୍ଷ୍ନୌ ୨୦ ଓଭରରେ ୫ ୱିକେଟ୍ ବିନିମୟରେ ୨୫୭ ରନ୍ ସଂଗ୍ରହ କରିଥିଲେ। ଏହା ସହିତ, ଆଇପିଏଲର ଗୋଟିଏ ସିଜିନରେ ସର୍ବାଧିକ ଥର ପାଇଁ ୨୦୦ କିମ୍ବା ଅଧିକ ରନ କରିବାର ରେକର୍ଡ ଭାଙ୍ଗିଯାଇଛି | ବାସ୍ତବରେ ଲକ୍ଷ୍ନୌ ସୁପର ଜାଏଣ୍ଟସ୍‌ ୨୦୦ ରନ କରିବା ମାତ୍ରେ, ଆଇପିଏଲ୍ ୨୦୨୩ରେ ୨୦୦ କିମ୍ବା ଏହାଠାରୁ ଅଧିକ ରନ ଆଦାୟକୁ ନେଇ ଥିବା ରେକର୍ଡ ଭାଙ୍ଗିଯାଇଛି | ଲକ୍ଷ୍ନୌ ସୁପର ଜାଏଣ୍ଟସ୍‌ ୨୫୭ ରନ କରିବା ପରେ ଆଇପିଏଲ ୨୦୨୩ରେ ସମୁଦାୟ ୧୯ ଥର ରେକର୍ଡ ହୋଇଛି | ଅର୍ଥାତ୍ ଆଇପିଏଲ୍ ୨୦୨୨ର ସମଗ୍ର ସିଜିନରେ କେବଳ ୧୮ ଥର ସମସ୍ତ ଦଳ ସମୁଦାୟ ୨୦୦ କିମ୍ବା ଏହାଠାରୁ ଅଧିକ ରନ କରିଥିଲେ |

କିନ୍ତୁ ଏହି ସିଜିନରେ ଏହି ରେକର୍ଡ ମାତ୍ର ୩୮ଟି ମ୍ୟାଚରେ ଭାଙ୍ଗିଯାଇଛି | ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ପଞ୍ଜାବ ମଧ୍ୟ ଲଢୁଆ ପ୍ରଦର୍ଶନ କରି ୨୦୧ ରନ୍‌ରେ ସମସ୍ତ ୱିକେଟ୍‌ ହରାଇଥିଲା। ଏହିପରି, ଆଇପିଏଲ୍ ୨୦୨୩ରେ ସମୁଦାୟ ୨୦୦ କିମ୍ବା ଅଧିକ ରନ ସମୁଦାୟ ୨୦ ଥର ହୋଇଛି ଯାହାକି ଅନ୍ୟ ସିଜିନ ଅପେକ୍ଷା ଅଧିକ | ଆଇପିଏଲ୍‌ ଇତିହାସରେ ମଧ୍ୟ ଲକ୍ଷ୍ନୌର ଏହା ଦ୍ବିତୀୟ ସର୍ବୋଚ୍ଚ ସ୍କୋର ହୋଇଛି। ୨୦୧୩ରେ ପୁନେ ୱାରିଅର୍ସ ବିପକ୍ଷରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨୬୩/୫ ସ୍କୋର କରିଥିଲା। ଚଳିତ ସଂସ୍କରଣରେ ଚେନ୍ନାଇ ସୁପରକିଙ୍ଗ୍ସ ୨୩୫/୪ (ବନାମ କେକେଆର୍‌) ସ୍କୋର କରି ଆଗରେ ଥିଲା। ହେଲେ ଲକ୍ଷ୍ନୌ ଏହାକୁ ପଛରେ ପକାଇଦେଇଛି।

ଏପର୍ଯ୍ୟନ୍ତ ଆଇପିଏଲରେ ଏସବୁ ସିଜିନରେ ଏତିକି ଥର ୨୦୦ କିମ୍ବା ଅଧିକ ସ୍କୋର କରାଯାଇଥିଲା |

ଆଇପିଏଲ ୨୦୨୩ରେ ଏପର୍ଯ୍ୟନ୍ତ ୨୦ ଥର, ଆଇପିଏଲ ୨୦୨୨ରେ ୧୮ ଥର, ଆଇପିଏଲ ୨୦୧୮ରେ ୧୫ ଥର, ଆଇପିଏଲ ୨୦୨୦ରେ ୧୩ ଥର, ଆଇପିଏଲ ୨୦୧୯ରେ ୧୧ ଥର ଓ ଆଇପିଏଲ ୨୦୦୮ରେ ମଧ୍ୟ ୧୧ ଥର ୨୦୦ କିମ୍ବା ଅଧିକ ସ୍କୋର କରାଯାଇଥିଲା |