କଳାହାଣ୍ଡି କପ୍: ଦେବଗଡ଼, ବରଗଡ଼ର ବଡ଼ ବିଜୟ
ପ୍ରିୟବ୍ରତ, ଅମିତଙ୍କ ଶତକ; ରାହୁଲ, ସ୍ବାଗତ, ପ୍ରଦୀପ, ନିରଂଜନ, ଅବଦୁଲଙ୍କୁ ୫ ଲେଖାଏଁ ୱିକେଟ୍
ଭୁବନେଶ୍ବର/କଟକ : କଟକ ଓ ଭୁବନେଶ୍ବରର ବିଭିନ୍ନ ପଡ଼ିଆରେ ଚାଲିଥିବା କଳାହାଣ୍ଡି କପ୍ ଅନ୍ତଃଜିଲ୍ଲା କ୍ରିକେଟ୍ ପ୍ରତିଯୋଗିତାରେ ଶୁକ୍ରବାର ସମ୍ବଲପୁର, ଅନୁଗୁଳ, କୋରାପୁଟ, ସୋନପୁର କଷ୍ଟସାଧ୍ୟ ବିଜୟ ହାସଲ କରିଥିବା ବେଳେ ବରଗଡ଼ ଓ ଦେବଗଡ଼ ବୃହତ ବିଜୟ ହାସଲ କରିଛନ୍ତି। ସନସାଇନ୍ ପଡ଼ିଆରେ ବରଗଡ଼ ୭ ୱିକେଟ୍ରେ ନବରଙ୍ଗପୁରକୁ ହରାଇଥିଲା। ଅଂଶୁମା ତ୍ରିପାଠୀଙ୍କ ୯୪ ରନ୍ ଓ ମୀର୍ଜା ଟି ବେଗ୍ଙ୍କ ୫୧ ରନ୍ ବଳରେ ନବରଙ୍ଗପୁର ୨୦୫ ରନ୍ କରିଥିଲା। ପ୍ରତିପକ୍ଷର ରାହୁଲ ଚୌଧୁରୀ ୫ ୱିକେଟ୍ ନେଇଥିଲେ। ଜବାବରେ ଦେବେନ୍ଦ୍ର ଏସ୍ (୯୧) ଓ ସୁମିତ କୁମାର ରାୟ (୫୨) ବରଗଡ଼କୁ ୩୪.୧ ଓଭରରେ ୩ ୱିକେଟ୍ ବିନିମୟରେ ବିଜୟ ଲକ୍ଷ୍ୟରେ ପହଞ୍ଚାଇ ଦେଇଥିଲେ। ଡ୍ରିମ୍ସ ପଡ଼ିଆରେ ଦେବଗଡ଼ ୧୫୧ ରନ୍ରେ କଳାହାଣ୍ଡିକୁ ପରାସ୍ତ କରିଛି।
Sambad is now on WhatsApp
Join and get latest news updates delivered to you via WhatsApp
ପି ପ୍ରିୟବ୍ରତଙ୍କ ଶତକ (୧୨୩), ସୁନିଲ ନାଏକ (୬୬), ଆଶିଷ ପରିଜା (୫୩)ଙ୍କ ଅର୍ଦ୍ଧଶତକ ବଳରେ ଦେବଗଡ଼ ୫୦ ଓଭରରେ ୭ ୱିକେଟ୍ ହରାଇ ୩୨୦ ରନ୍ କରିଥିଲା। ଜବାବରେ ସ୍ବାଗତ ରାଉତରାୟ (୮.୧-୨-୩୧-୫)ଙ୍କୁ ଖେଳିନପାରି କଳାହାଣ୍ଡି ୪୨.୧ ଓଭରରେ ୧୬୯ ରନ୍ କରିଥିଲା। ରେଭେନସା ଗ୍ରାଉଣ୍ଡ୍ରେ ସମ୍ବଲପୁର ୫ ୱିକେଟ୍ରେ ବୌଦ୍ଧକୁ ପରାସ୍ତ କରିଥିଲା। ସମ୍ବଲପୁର ପାଇଁ ଅମିତ ସୁନା (୧୧୪) ଓ ପ୍ରଦୀପ କୁମାର ପ୍ରଧାନ (୧୦-୧-୪୭-୫) ବିଜୟର କର୍ଣ୍ଣଧାର ସାଜିଥିଲେ। ରେଭେନସା ଗ୍ରାଉଣ୍ଡ-୨ରେ ଅନୁଗୁଳ ୩ ୱିକେଟ୍ରେ କିଟ୍କୁ ପରାସ୍ତ କରିଥିଲା।
ଅଡ଼ଶପୁର ପଡ଼ିଆରେ କୋରାପୁଟ ୪ ୱିକେଟ୍ରେ ରାୟଗଡ଼ାକୁ ହରାଇଛି। ବୋଲରଙ୍କ ପ୍ରାଧାନ୍ୟ ଭିତରେ ଅନୁଷ୍ଠିତ ଏହି ମ୍ୟାଚ୍ରେ କେରାପୁଟର ନିରଂଜନ ଗୌଡ଼ (୯-୧-୩୨-୫) ଏବଂ ରାୟଗଡ଼ାର ଅବଦୁଲ ଏମ ଖାନ୍ (୯-୨-୧୦-୫) ଚମତ୍କାର ବୋଲିଂ ଚିତ୍ର ପାଇଥିଲେ। ଏମ୍ଜିଏମ୍ ଏସଓଏସ୍ ଗ୍ରାଉଣ୍ଡ୍ରେ ସୋନପୁର ୩ ୱିକେଟ୍ରେ ବଲାଙ୍ଗୀରକୁ ପରାସ୍ତ କରିଛି। ବଲାଙ୍ଗୀର ପାଇଁ କିଶନ ନାଏକ (୯୫) ଶତକରୁ ବଞ୍ଚିତ ହୋଇଥିବା ବେଳେ ତାଙ୍କ ଦଳ ବିଜୟରୁ ବଞ୍ଚିତ ରହିଥିଲା। ଅଭିଳାଷ ନାୟକ (୫୯)ଙ୍କ ଅର୍ଦ୍ଧଶତକ ସହାୟତାରେ ସୋନପୁର ୪୭.୧ ଓଭରରେ ୭ ୱିକେଟ୍ ବିନିମୟରେ ୨୩୯ ରନ୍ କରି ବିଜୟୀ ହୋଇଥିଲା।