ଭାରତ-ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ ପାଇଁ ରୋହିତଙ୍କ ସ୍ଥାନ ନେଲେ ରାହୁଲ, ଉପ-ଅଧିନାୟକର ଦାୟିତ୍ବ ତୁଲାଇବେ

ନୂଆଦିଲ୍ଲୀ: ଭାରତ-ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ ପାଇଁ ଉପ-ଅଧିନାୟକ ନିଯୁକ୍ତ ହେଲେ କେଏଲ ରାହୁଲ । ରୋହିତ ଶର୍ମା ଆହତ ହୋଇ ଏହି ଟେଷ୍ଟ ସିରିଜରୁ ବାଦ୍ ପଡିବା ପରେ ତାଙ୍କ ସ୍ଥାନ ରାହୁଲ ନେଇଛନ୍ତି । ଆଗାମୀ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରେ ସେ ଦଳର ଉପ-ଅଧିନାୟକର ଦାୟିତ୍ବ ତୁଲାଇବେ।

ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ ପାଇଁ ପ୍ରଥମେ ଭାରତୀୟ ଦଳ ଘୋଷଣା ହୋଇଥିଲା । ଏହି ଦଳରେ ଦିନିକିଆ ଓ ଟି-୨୦ରେ ରୋହିତ ଶର୍ମାଙ୍କୁ ଅଧିନାୟକ ଭାର ଦିଆଯିବା ସହିତ ଟେଷ୍ଟରେ ଉପ-ଅଧିନାୟକ ପଦ ମିଳିଥିଲା । ଆଜିଙ୍କ୍ୟ ରାହାଣେଙ୍କ ବଦଳରେ ପ୍ରଥମ ଥର ପାଇଁ ରୋହିତ ଟେଷ୍ଟରେ ଉପ-ଅଧିନାୟକ ପଦ ହାତେଇଥିଲେ । ହେଲେ ଏହାପରେ ସେ ଆହତ ହୋଇ ଟେଷ୍ଟ ଟିମରୁ ବାଦ୍ ପଡିବା ପରେ ଏବେ ଏହି ପଦ କେଏଲ ରାହୁଲଙ୍କୁ ମିଳିଛି ।

ସୂଚନାଯୋଗ୍ୟ ଯେ, ଆହତ ହେବା ପରେ ରୋହିତ ଶର୍ମା ଆଗାମୀ ୩ ସପ୍ତାହ ପର୍ଯ୍ୟନ୍ତ କ୍ରିକେଟ ଖେଳିପାରିବେ ନାହିଁ। ଏବେ ସେ ନ୍ୟାସନାଲ କ୍ରିକେଟ୍ ଏକାଡେମୀରେ ନିଜର ପ୍ରସ୍ତୁତି ଚଲାଇଥିବାବେଳେ, ଦିନିକିଆ ସିରିଜ ପାଇଁ ଦକ୍ଷିଣ ଆଫ୍ରିକା ଗସ୍ତ କରିବେ । ଏହି ଦିନିକିଆ ସିରିଜ ଜାନୁଆରି ୧୯ରୁ ଆରମ୍ଭ ହେବାକୁ ଥିବାବେଳେ ଜାନୁଆରି ୨୧ରେ ଦ୍ୱିତୀୟ ଦିନିକିଆ ଏବଂ ଜାନୁଆରି ୨୩ରେ ତୃତୀୟ ଦିନିକିଆ ମ୍ୟାଚ୍ ଖେଳାଯିବ ।