ଲାହୋର: ଭାରତୀୟ ଅଧିନାୟକ ବିରାଟ କୋହଲିଙ୍କ ପ୍ରଶଂସକ ତାଲିକାରେ ସାମିଲ ହୋଇଛନ୍ତି ପାକିସ୍ତାନର କିମ୍ବଦନ୍ତୀ କ୍ରିକେଟର୍‌ ଜାଭେଦ ମିଆଁଦାଦ। କୋହଲିଙ୍କ ବ୍ୟାଟିଂ ଶୈଳୀକୁ ବହୁତ ଭଲ ପାଉଥିବା ମିଆଁଦାଦ ତାଙ୍କୁ ନିଜର ପସନ୍ଦର ଭାରତୀୟ କ୍ରିକେଟର୍‌ ଭାବେ ବର୍ଣ୍ଣନା କରିଛନ୍ତି। ନିଜ ୟୁ-ଟ୍ୟୁବ୍ ଚ୍ୟାନେଲରେ ଭାରତୀୟ କ୍ରିକେଟ୍ ଦଳର ପ୍ରତିଭା ଓ ଗଭୀରତା ବିଷୟରେ ବର୍ଣ୍ଣନା କରିବାକୁ ଯାଇ ସେ କହିଛନ୍ତି ଯେ ‌ମୋତେ ପଚରା ଯାଇଥିଲା ଯେ ଭାରତୀୟ କ୍ରିକେଟ୍ ଦଳର ଶ୍ରେଷ୍ଠ ଖେଳାଳି କିଏ? ତେଣୁ ମୁଁ ବିରାଟ କୋହଲିଙ୍କୁ ବାଛିଛି। ଏଥିନେଇ ମୋତେ ବିଶେଷ କିଛି କହିବାର ଦରକାର ନାହିଁ। ତାଙ୍କ ପ୍ରଦର୍ଶନ ହିଁ ସବୁକିଛି କହି ଦେଉଛି। ଲୋକମାନଙ୍କୁ ଏକଥା ସ୍ବୀକାର କରିବାକୁ ହେବ, ପରିସଂଖ୍ୟାନ ହିଁ ଏହା କହୁଛି। ଦକ୍ଷିଣ ଆଫ୍ରିକାରେ ବିରାଟ ବହୁତ ଭଲ ପ୍ରଦର୍ଶନ କରିଥିଲେ। ଅସମତଳ ୱିକେଟ୍‌ରେ ମଧ୍ୟ ସେ ଶତକ ହାସଲ କରି ନେଇଥିଲେ। ଆପଣ ଏକଥା କହି ପାରିବେ ନାହିଁ ଯେ ସେ ଦ୍ରୁତ ବୋଲରଙ୍କୁ ଭୟ କରନ୍ତି କିମ୍ବା ଗତି ଓ ଉଚ୍ଛାଳ ଥିବା ପିଚ୍‌ରେ ବ୍ୟାଟିଂ କରି ପାରନ୍ତି ନାହିଁ ଅଥବା ସେ ସ୍ପିନ୍‌କୁ ଭଲ ଖେଳନ୍ତି ନାହିଁ। ୧୨୪ ଟେଷ୍ଟ୍‌ରୁ ୮୮୩୨ ଓ ୨୩୩ ଦିନିକିଆରୁ ୭୩୮୧ ରନ୍ କରିଥିବା ମିଆଁଦାଦ ଆହୁରି କହିଛନ୍ତି ଯେ ରୋହିତ ଶର୍ମା ଓ ବିରାଟ କୋହଲି ବ୍ୟାଟିଂକୁ ସହଜ କରିଦିଅନ୍ତି। କୋହଲିଙ୍କ ବିଷୟରେ ଅଧିକ ଖୋଲା ମନ୍ତବ୍ୟ ଦେଇ ସେ ମତ ରଖିଛନ୍ତି ଯେ ବିରାଟ ତ୍ରୁଟିଶୂନ୍ୟ ସଟ୍ ଖେଳନ୍ତି। ସେ ଜଣେ କ୍ଲିନ୍ ହିଟର୍‌, ଆପଣ ତାଙ୍କ ସଟ୍‌ର ବିବିଧତାକୁ ଦେଖନ୍ତୁ। ତାଙ୍କୁ ବ୍ୟାଟିଂ କରୁଥିବାର ଦେଖିବା ବହୁତ ମଜା ଲାଗେ। ତାଙ୍କ ସ୍ତର ସମସ୍ତଙ୍କଠାରୁ ଭିନ୍ନ ଓ ଅଲଗା ବୋଲି ମିଆଁଦାଦ୍‌ କହିଛନ୍ତି।