ଆରମ୍ଭ ହେଲା ଭାରତ ଅଷ୍ଟ୍ରେଲିଆ ଶେଷ ଦିନିକିଆ: ଉଭୟ ଦଳ ପାଇଁ କର ବା ମର

ବାଙ୍ଗାଲୋର: ବାଙ୍ଗାଲୋରର ଚିନ୍ନାସ୍ୱାମୀ ପଡିଆରେ ଭାରତ-ଅଷ୍ଟ୍ରେଲିଆ ମଧ୍ୟରେ ଚାଲିଛି ନିର୍ଣ୍ଣାୟକ ମୁକାବିଲା । ଟସ୍ ଜିତି ଭ୍ରମଣକାରୀ ଅଷ୍ଟ୍ରେଲିଆ ଟିମ୍ ପ୍ରଥମେ ବ୍ୟାଟିଂ କରୁଛି । ଟିମ ଇଣ୍ଡିଆକୁ ପ୍ରଥମ ସଫଳତା ଦେଇଛନ୍ତି ମହମ୍ମଦ ସାମି । ଅଷ୍ଟ୍ରେଲିଆର ବିସ୍ଫୋରକ ବ୍ୟାଟସମ୍ୟାନ୍ ଡେଭିଡ ୱାର୍ଣ୍ଣରଙ୍କୁ ରାହୁଲଙ୍କ ହାତରେ କ୍ୟାଚ କରାଇ ପ୍ୟାଭିଲିୟନ ପଠାଇ ସାମି ଏହି ସଫଳତା ଆଣିଦେଇଛନ୍ତି । ୱାର୍ଣ୍ଣର ୭ଟି ବଲ ଖେଳି ମାତ୍ର ୩ ରନ୍ ସ୍କୋର କରିପାରିଥିଲେ । ସେହିପରି ଫିଂଚ ମଧ୍ୟ ଆଉଟ ହୋଇ ପ୍ୟାଭିଲିୟନକୁ ଫେରିଯାଇଛନ୍ତି |

Photo-BCCI twitter

ଫିଂଚ ୨୬ଟି ବଲ ଖେଳି ମାତ୍ର ୧୯ ରନ କରିପାରିଥିଲେ | ଶେଷ ଖବର ସୁଦ୍ଧା ଅଷ୍ଟ୍ରେଲିଆ ଦଳ ୧୪ ଓଭରରେ ୨ଟି ଉଇକେଟ ହରାଇ ୮୦ ରନ କରିଛି | ଏଠାରେ ସୂଚନା ଥାଉ କି ବାଙ୍ଗାଲୋରର ଏମ୍ ଚିନାସ୍ୱାମୀ ଷ୍ଟାଡିୟମରେ ସିରିଜର ନିର୍ଣ୍ଣାୟକ ମ୍ୟାଚ୍ ଖେଳାଯାଉଥିବାରୁ କ୍ରିକେଟପ୍ରେମୀଙ୍କ ନଜର ଏହି ମ୍ୟାଚ୍ ଉପରେ ରହିଛି ।

ତିନିଟିକିଆ ଦିନିକିଆ ସିରିଜ ଏବେ ୧-୧ରେ ବରାବର ଥିବା ବେଳେ ବାଙ୍ଗାଲୋରରେ କିଏ ବାଜି ମାରିବ ତାହା ଉପରେ ସମସ୍ତଙ୍କର ନଜର ରହିଛି । ପୂର୍ବରୁ ଭାରତ ମୁମ୍ବାଇରେ ମାତ୍ ଖାଇଥିବା ବେଳେ ରାଜକୋଟରେ ରାଜୁତି କରି ସିରିଜକୁ ବରାବର ସ୍ଥିତିକୁ ଆଣିଥିଲା ।