ମୁମ୍ବାଇ : ଭାରତୀୟ ଦଳର ଆଗାମୀ ଜିମ୍ବାଓ୍ବେ ଗସ୍ତ ପାଇଁ ମୁଖ୍ୟ କୋଚ ରାହୁଲ ଦ୍ରାବିଡ଼ଙ୍କୁ ବିଶ୍ରାମ ଦିଆଯାଇଛି । ତାଙ୍କ ସ୍ଥାନରେ ଭି.ଭି.ଏସ. ଲକ୍ଷ୍ମଣଙ୍କୁ ମୁଖ୍ୟ କୋଚ ନିଯୁକ୍ତ କରାଯାଇଛି । ଲକ୍ଷ୍ମଣ ଏବେ ବେଙ୍ଗାଲୁରୁରେ ଥିବା ଜାତୀୟ କ୍ରିକେଟ ଏକେଡେମୀର ମୁଖ୍ୟ ଅଛନ୍ତି । ଜିମ୍ବାଓ୍ବେ ଗସ୍ତରେ ଲକ୍ଷ୍ମଣଙ୍କୁ ପୂର୍ବତନ କ୍ରିକେଟର ହୃଷିକେଶ କାନିତକର ଓ ସାଇରାଜ ବାହୁତୁଲେ ସହାୟତା କରିବେ ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ଦଳର ଜିମ୍ବାଓ୍ବେ ଗସ୍ତ ପରେ ଚଳିତ ମାସ ୨୭ରୁ ଆରମ୍ଭ ହେଉଥିବା ଏସିଆ କପରେ ପୁଣି ଦ୍ରାବିଡ ଦଳ ସହିତ ଯୋଗ ଦେବେ । ଆସନ୍ତା ୨୦ ତାରିଖରେ ଭାରତୀୟ ଦଳର କେତେକ ଖେଳାଳି ଓ ସପୋର୍ଟ ଷ୍ଟାଫ ୟୁଏଇ ଯିବେ ।
ଗୁରୁବାରଦିନ କେ.ଏଲ. ରାହୁଲଙ୍କୁ ଜିମ୍ବାଓ୍ବେ ଗସ୍ତ ପାଇଁ ଅଧିନାୟକ ନିଯୁକ୍ତ କରାଯାଇଥିଲା । ତାଙ୍କୁ ବିସିସିଆଇର ମେଡିକାଲ ଟିମ ଫିଟ ଘୋଷଣା କରିବା ପରେ ଦଳରେ ଅନ୍ତର୍ଭୁକ୍ତ କରାଯାଇଥିଲା । ପୂର୍ବରୁ ଶିଖର ଧଓ୍ବନଙ୍କୁ ଭାରତୀୟ ଦଳର ଅଧିନାୟକ ଘୋଷଣା କରାଯାଇଥିବାବେଳେ ଏବେ ତାଙ୍କୁ ଉପଅଧିନାୟକ କରାଯାଇଛି ।
ଭାରତୀୟ ଦଳ ଚଳିତ ମାସରେ ଜିମ୍ବାଓ୍ବେ ଗସ୍ତରେ ଯାଇ ୧୮ରୁ ୨୨ ମଧ୍ୟରେ ୩ଟି ଦିନିକିଆ ମ୍ୟାଚ ଖେଳିବ । ଏହା ପରେ ଭାରତୀୟ ଦଳ ଏସିଆ କପ ଖେଳିବାକୁ ୟୁଏଇ ଯିବ । ଅଗଷ୍ଟ ୨୮ରେ ଭାରତୀୟ ଦଳ ଏସିଆ କପରେ ପାକିସ୍ତାନକୁ ଭେଟିବ ।