ଜୁରିକ: ବେୟର୍ନ ମ୍ୟୁନିକର ଫରୱାର୍ଡ ରର୍ବଟ ଲେୱାଣ୍ଡୋସ୍କି ଚଳିତ ବର୍ଷ ପାଇଁ ଫିଫାର ଶ୍ରେଷ୍ଠ ଫୁଟ୍ବଲ୍ ଖେଳାଳି ପୁରସ୍କାର ପାଇଛନ୍ତି। ମ୍ୟୁନିକରେ ଆୟୋଜିତ ଏକ ଉତ୍ସବରେ ସେ ଏହି ପୁରସ୍କାର ଗ୍ରହଣ କରିଥିଲେ। ପୁରସ୍କାର ଦୌଡ଼ରେ ଥିବା ଗତଥରର ବିଜେତା ଲିଓନେଲ ମେସି ଓ କ୍ରିଷ୍ଟିଆନୋ ରୋନାଲ୍ଡୋଙ୍କୁ ପଛରେ ପକାଇ ପ୍ରଥମ ଥର ଲାଗି ଲେୱାଣ୍ଡୋସ୍କି ଏହି ପୁରସ୍କାର ଜିତିଛନ୍ତି। ଲେୱାଣ୍ଡୋସ୍କିଙ୍କ ପ୍ରଦର୍ଶନ ବଳରେ ବେୟର୍ନ ଜର୍ମାନି ଲିଗ୍ ଓ କପ୍ ସହ ଚାମ୍ପିଅନ୍ସ ଲିଗ୍ ବିଜେତା ହୋଇଥିଲା। ଏହି ୩ ପ୍ରତିଯୋଗିତାରେ ସେ ଶ୍ରେଷ୍ଠ ସ୍କୋରର୍ ଥିଲେ। ପୋଲାଣ୍ଡକୁ ୟୁରୋ ୨୦୨୦ ଯୋଗ୍ୟତା ଦେଇଥିବା ଏହି ୩୨ ବର୍ଷୀୟ ତାରକା ଅକ୍ଟୋବରରେ ୨୦୧୯-୨୦ ୟୁଫା ପୁରୁଷ ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ।
Sambad is now on WhatsApp
Join and get latest news updates delivered to you via WhatsApp
ମାଞ୍ଚେଷ୍ଟର ସିଟିର ଲୁସି ବ୍ରୋଞ୍ଜ ଶ୍ରେଷ୍ଠ ମହିଳା ଖେଳାଳି ପୁରସ୍କାର ପାଇଛନ୍ତି। ଏଥିସହ ଏହି ପୁରସ୍କାର କରାୟତ୍ତ କରିବାରେ ସେ ପ୍ରଥମ ଇଂଲିସ ମହିଳା ହୋଇଛନ୍ତି। ପୁରୁଷ ଓ ମହିଳାରେ ଶ୍ରେଷ୍ଠ ପ୍ରଶିକ୍ଷକ ପୁରସ୍କାର ଯଥାକ୍ରମେ ଲିଭରପୁଲର ଜୁର୍ଗେନ କ୍ଲପ୍ ଓ ନେଦରଲାଣ୍ଡର ସାରିନା ୱିଗମାନଙ୍କୁ ମିଳିଥିଲା। ଶ୍ରେଷ୍ଠ ଗୋଲ୍ରକ୍ଷକ ପୁରସ୍କାର ବେୟର୍ନର ମାନୁଏଲ ନୁଏର (ପୁରୁଷ) ଓ ଫ୍ରାନ୍ସର ସାରା ବୌହାଦି (ମହିଳା) ପାଇଥିଲେ।