ଭୁବନେଶ୍ୱର: ମେଜର ଧ୍ୟାନଚାନ୍ଦ ସ୍ମାରକୀ ସର୍ବଭାରତୀୟ ମହିଳା ହକି ପ୍ରତିଯୋଗିତାର ତୃତୀୟ ସଂସ୍କରଣ ଆସନ୍ତା ଜାନୁଆରି ୩ରୁ ୭ ତାରିଖ ପର୍ଯ୍ୟନ୍ତ ଆୟୋଜିତ ହେବ। ହକି ଇଣ୍ଡିଆ ଓ ହକି ଓଡ଼ିଶାର ପୂର୍ଣ୍ଣ ସମର୍ଥନରେ ଏହି ପ୍ରତିଯୋଗିତା ରାଉରକେଲା ସେକ୍ଟର-୫ ବିଜୁ ପଟ୍ଟନାୟକ ହକି ଷ୍ଟାଡିୟମ୍ରେ ଅନୁଷ୍ଠିତ ହେବ। ଟର୍ଫ ପଡ଼ିଆରେ ଖେଳାଯିବାକୁ ଥିବା ମ୍ୟାଚ୍ଗୁଡ଼ିକରେ କୋକାବୁରା ବଲ୍ ବ୍ୟବହାର ହେବ। ଏଥିରେ ୮ ଦଳ (ପାନପୋଷ କ୍ରୀଡ଼ା ଛାତ୍ରାବାସ, ରାଉରାକେଲା, ଭୁବନେଶ୍ୱର କ୍ରୀଡ଼ା ଛାତ୍ରାବାସ, ଷ୍ଟିଲ୍ ପ୍ଲାଣ୍ଟ୍ ଷ୍ଟିଲ୍ ବୋର୍ଡ, ଉତ୍ତର-କେନ୍ଦ୍ର ରେଳବାଇ, ଆହ୍ଲାବାଦ୍, ଉତ୍ତର-ପୂର୍ବ ରେଳବାଇ, ଗୋରଖପୁର, ୟୁକୋ ବ୍ୟାଙ୍କ୍, ଚଣ୍ଡୀଗଡ଼, ହକି ଏକାଡେମି, ନାଗପୁର ଓ ଧାନବାଦ ରେଳବାଇ, ବୋକାରୋ) ପ୍ରତିଦ୍ୱନ୍ଦ୍ୱିତା କରିବେ। ପ୍ରାୟ ୧୭ ଆନ୍ତର୍ଜାତିକ ତାରକାଙ୍କୁ ୮ ଦଳରେ ଦେଖିବାକୁ ମିଳିବ। ପ୍ରତିଯୋଗିତାକୁ ୫ ଆନ୍ତର୍ଜାତିକ ରେଫରିଙ୍କ ସହ ମୋଟ ୧୦ ଜଣ ପରିଚାଳନା କରିବେ। ଓଡ଼ିଆ ଝିଅ ତଥା ମହିଳା ହକି ଅଲିମ୍ପିଆନ୍ ଲିଲିମା ମିଞ୍ଜ୍ ପ୍ରତିଯୋଗିତାର ଖେଳ ଦୂତ ରହିଛନ୍ତି। ଡ. କୃଷ୍ଣେଶୁ ସୋଭନ୍ ପ୍ରତିଯୋଗିତା ପାଇଁ ଫିଜିଓଥେରାପି ଭାବେ ନିଯୁକ୍ତ ହୋଇଛନ୍ତି।