ମସ୍ତିଷ୍କ ଚିପ୍‌ ଜରିଆରେ ବ୍ୟକ୍ତି ଖେଳିଲେ ଚେସ୍‌

ନୂଆଦିଲ୍ଲୀ: ମାନବଜାତିର ଭବିଷ୍ୟତ ଲାଗି ଏକ ବହୁତ ବଡ଼ ଉପଲବ୍ଧି। ଏଲନ୍ ମସ୍କଙ୍କ କମ୍ପାନି ନ୍ୟୁରାଲିଙ୍କ ପକ୍ଷରୁ ଜଣେ ବ୍ୟକ୍ତିଙ୍କ ମସ୍ତିଷ୍କରେ ଲଗାଯାଇଥିବା ଚିପ୍ ଠିକ୍ ଭାବେ କାମ କରୁଛି। ସେହି ଚିପ୍ ମାଧ୍ୟମରେ ବ୍ୟକ୍ତି ଜଣକ କମ୍ପ୍ୟୁଟରରେ ଚେସ୍‌ ଖେଳିଛନ୍ତି। ସେ ନିଜ ମନ ଜରିଆରେ କମ୍ପ୍ୟୁଟରର କର୍ସରକୁ ପରିଚାଳନା କରିଥିଲେ ଏବଂ ଅନ୍‌ଲାଇନ୍‌ରେ ଚେସ୍‌ ଖେଳିଥିଲେ। ଏହି ବ୍ୟକ୍ତିଙ୍କ ନାମ ହେଉଛି ନୋଲାଣ୍ଡ ଆର୍ବାଧ। ଏକ ଦୁର୍ଘଟଣାରେ ତାଙ୍କ କାନ୍ଧ ତଳ ପାର୍ଶ୍ବ ଆଚଳ ହୋଇପଡ଼ିଥିଲା। ଚଳିତ ବର୍ଷ ଜାନୁଆରିରେ ତାଙ୍କ ମସ୍ତିଷ୍କରେ ନ୍ୟୁରାଲିଙ୍କ ଚିପ୍ ପ୍ରତିରୋପଣ କରାଯାଇଥିଲା। ନୋଲାଣ୍ଡ ଚେସ୍‌ ଖେଳୁଥିବା ସମୟର ଏକ ଭିଡିଓକୁ ମସ୍କ ତାଙ୍କ ସୋସିଆଲ ମିଡିଆ ହ୍ୟାଣ୍ଡେଲ୍‌ରେ ସେୟାର କରିଛନ୍ତି। ସେଥିରେ ନୋଲାଣ୍ଡ କହୁଛନ୍ତି ଯେ ମୁଁ ଏହି ଖେଳ ଖେଳିବା ଛାଡ଼ି ଦେଇଥିଲେ। ଏବେ କିନ୍ତୁ ତାହାକୁ ପୁଣି ଥରେ ଖେଳିପାରୁଛି। ଏହା ଜରିଆରେ ନ୍ୟୁରାଲିଙ୍କ୍‌ ଟେଲିପାଥିକୁ ପ୍ରଦର୍ଶନ କରିଛି।

ନ୍ୟୁରାଲିଙ୍କ ପକ୍ଷରୁ ଦାବି କରାଯାଇଥିବା ଏକ ଛୋଟ କଏନ ଆକାରର ଏହି ଡିଭାଇସ୍‌କୁ ପ୍ରତିରୋପଣ କରାଯିବା ପରେ ମଣିଷର ମସ୍ତିଷ୍କ ଓ କମ୍ପ୍ୟୁଟର ମଧ୍ୟରେ ସିଧାସଳଖ ସମ୍ପର୍କ ସ୍ଥାପନ ହୋଇପାରିବ। ବର୍ତ୍ତମାନ ଏହାକୁ ମଣିଷଠାରେ ପରୀକ୍ଷା କରାଯାଉଛି। ଯଦି ପରୀକ୍ଷଣ ସଫଳ ହେବ ତେବେ ଏହି ଚିପ୍ ଜରିଆରେ ଦୃଷ୍ଟିହୀନ ଲୋକମାନେ ଦୁନିଆକୁ ଦେଖିପାରିବେ। ପକ୍ଷାଘାତରେ ପୀଡ଼ିତ ଲୋକମାନେ ଚଲାବୁଲା କରିପାରିବେ ଏବଂ କମ୍ପ୍ୟୁଟରରେ କାମ କରିପାରିବେ। କମ୍ପାନି ପକ୍ଷରୁ ଏହି ଚିପ୍‌ର ନାମ ଲିଙ୍କ୍‌ ରଖାଯାଇଛି। ନ୍ୟୁରାଲିଙ୍କ୍‌ର ବ୍ରେନ୍ ଚିପ୍‌କୁ ପରୀକ୍ଷଣ କରିବା ଲାଗି ଗତବର୍ଷ ସେପ୍ଟେମ୍ବରରେ ମଞ୍ଜୁରି ପ୍ରଦାନ କରାଯାଇଥିଲା। ଏହି ପରୀକ୍ଷଣ ଶେଷ ହେବା ଲାଗି ୬ ବର୍ଷ ସମୟ ଲାଗିବ। ରୋଗୀଙ୍କଠାରେ ଡିଭାଇସ୍‌ କିଭଳି କାମ କରୁଛି ତାହା କମ୍ପାନି ଜାଣିବାକୁ ଚାହୁଛି।