କ୍ୟାପ୍‌ଟେନ୍‌ କୁଲ୍‌ଙ୍କ‌ ଚାଷ ନିଶା, ପ୍ରତିଦିନ ଫାର୍ମରୁ ବାହାରୁଛି ୩୦୦ ଲିଟର ଦୁଗ୍ଧ

ନୂଆଦିଲ୍ଲୀ: କ୍ରିକେଟରୁ ଅବସର ପରେ ଚାଷରେ ମନ ବଳାଇଛନ୍ତି ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନି । ନିଜ ଫାର୍ମରେ ଧୋନି ଟମାଟୋ ଓ ଦୁଗ୍ଧ ଚାଷ କରୁଛନ୍ତି । ରାଞ୍ଚିର ଧୁର୍ବାସ୍ଥିତ ସେମ୍ଭୋଠାରେ ୫୫ ଏକର ଜମିରେ ଏହି ଚାଷ କରୁଛନ୍ତି ଧୋନି । ଧୋନି ଡାଏରି ଫାର୍ମ ସହ ଜୈବିକ ଚାଷ ମଧ୍ୟ କରୁଛନ୍ତି । ବର୍ତ୍ତମାନ ତାଙ୍କ ଫାର୍ମରେ ଟମାଟୋ, ଫୁଲକୋବି, ବ୍ରୋକଲି ଆଦି ପନିପରିବା ଚାଷ କରାଯାଉଛି।

ଧୋନିଙ୍କ ଫାର୍ମ ହାଉସରେ ଚାଷ ହେଉଥିବା ଟମାଟୋ ଜୈବିକ ପ୍ରଣାଳୀରେ ଚାଷ ହେଉଛି । ଏଥିପାଇଁ ବଜାରରେ ଏହାର ଭଲ ଚାହିଦା ମଧ୍ୟ ରହିଛି । ୧ ସପ୍ତାହ ପରେ ଫାର୍ମରେ ଚାଷ ହେଉଥିବା କୋବିର ସ୍ୱାଦ ମଧ୍ୟ ଲୋକମାନେ ପାଇପାରିବେ । ବର୍ତ୍ତମାନ ଧୋନିଙ୍କ ଫାର୍ମର ଟମାଟୋ କିଲୋ ପିଛା ୪୦ ଟଙ୍କାରେ ବିକ୍ରି ହେଉଛି ।

ଏହା ସହ ଏକ ଡାଏରି ଫାର୍ମ ମଧ୍ୟ ଚଳାଉଛନ୍ତି ଧୋନି । ନିଜ ଡାଏରି ଫାର୍ମରେ ଧୋନି ଭାରତୀୟ ପ୍ରଜାତିର ସାହିୱାଲ ଓ ପ୍ରାନ୍ସ ପ୍ରଜାତିର ଫିଜିଆନା ଗାଈ ରଖିଛନ୍ତି । ବର୍ତ୍ତମାନ ତାଙ୍କ ଫାର୍ମରେ ୭୦ଟି ଗାଈ ରହିଛି । ଏହାର ଦେଖାଶୁଣା ଶିବାନନ୍ଦ ନାମଜ ଜଣେ ବ୍ୟକ୍ତି ଓ ତାଙ୍କ ପତ୍ନୀ କରୁଛନ୍ତି ।

ପ୍ରତିଦିନ ଧୋନିଙ୍କ ଫାର୍ମରୁ ୩୦୦ ଲିଟର କ୍ଷୀର ଉତ୍ପାଦନ ହେଉଛି । ଏହା ସିଧା ବଜାରରେ ଯାଇ ବିକ୍ରି ହେଉଛି । ଲିଟର ପିଛା ୫୫ ଟଙ୍କାରେ କ୍ଷୀର ବିକ୍ରି କରୁଛନ୍ତି ଧୋନି । କିଛିଦିନ ପୂର୍ବରୁ ଧୋନି କଡକନାଥ କୁକୁଡ଼ା ଚାଷ କରିବେ ବୋଲି ଚର୍ଚ୍ଚା ହୋଇଥିଲା । ଏନେଇ ଧୋନି ୨ ହଜାର କୁକୁଡ଼ା ଚିଆଁ ପାଇଁ ମଧ୍ୟ ବରାଦ ଦେଇଥିଲେ ।

ଚଳିତ ବର୍ଷ ଧୋନି ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ । ଏହାପରଠୁ କ୍ରିକେଟରୁ ଏବେ ଦୂରେଇ ରହିଛନ୍ତି ଧୋନି। ସେ ଚଳିତବର୍ଷ ଆଇପିଏଲ ଖେଳିଥିଲେ ମଧ୍ୟ ଭଲ ପ୍ରଦର୍ଶନ କରିପାରିନଥିଲେ । ଏବେ ତାଙ୍କୁ ଚାଷ କରିବାର ଦେଖିବାକୁ ମିଳୁଛି ।