ଅଷ୍ଟ୍ରେଲିଆନ୍ ଓପନ୍ ଟେନିସ୍: କ୍ବାର୍ଟର୍ରେ ନାଦାଲ, ଜୋକୋଭିକ, ଫେଡେରର୍, ହାଲେପ୍
ମିଶ୍ରିତ ଯୁଗଳରେ ପେସ୍, ବୋପାନ୍ନା ଆଗେଇଲେ
ମେଲ୍ବର୍ଣ୍ଣ: ଚଳିତ ଅଷ୍ଟ୍ରେଲିଆନ୍ ଓପନ୍ ଟେନିସ୍ ପ୍ରତିଯୋଗିତାର ପୁରୁଷ ଏକକ କ୍ବାର୍ଟର୍ ଫାଇନାଲ୍ରେ ବିଶ୍ବ ମାନ୍ୟତାର ପ୍ରଥମ ତିନି ସ୍ଥାନରେଥିବା ରାଫେଲ ନାଦାଲ, ନୋଭାକ ଜୋକୋଭିକ ଓ ରୋଜର ଫେଡେରର୍ ପ୍ରବେଶ କରିଛନ୍ତି। ପ୍ରିକ୍ବାର୍ଟର୍ ଫାଇନାଲ୍ରେ ସ୍ପେନ୍ର ନାଦାଲ ୬-୩, ୩-୬, ୭-୬, ୭-୬ ସେଟ୍ରେ ଅଷ୍ଟ୍ରେଲିଆର ନିକ୍ କିର୍ଗିସଙ୍କୁ, ସର୍ବିୟାର ଜୋକୋଭିକ ୬-୩, ୬-୪, ୬-୪ ସେଟ୍ରେ ଆର୍ଜେଣ୍ଟିନାର ଡିଏଗୋ ସୱର୍ଜମାନ୍ଙ୍କୁ, ସ୍ବିଜ୍ରଲାଣ୍ଡର ରୋଜର ଫେଡେରର୍ ୪-୬, ୬-୧, ୬-୨, ୬-୨ ସେଟ୍ରେ ହଙ୍ଗେରିର ମାର୍ଟନ ଫୁକ୍ସୋଭିକ୍ଙ୍କୁ ପରାସ୍ତ କରିଥିଲେ। କ୍ବାର୍ଟର ଫାଇନାଲ୍ରେ ୧୯ ଗ୍ରାଣ୍ଡ୍ ସ୍ଲାମ୍ ବିଜେତା ନାଦାଲ ପଞ୍ଚମ ମାନ୍ୟତା ପ୍ରାପ୍ତ ଡୋମିନିକ୍ ଥିମ୍ଙ୍କୁ ଭେଟିବେ। ପ୍ରିକ୍ବାର୍ଟର ଫାଇନାଲ୍ରେ ଅଷ୍ଟ୍ରିଆ ତାରକା ଥିମ୍ ୬-୨, ୬-୪, ୬-୪ ସେଟ୍ରେ ଦଶମ ମାନ୍ୟତାପ୍ରାପ୍ତ ଗେଲ୍ ମନ୍ଫିଲ୍ସଙ୍କୁ ହରାଇଥିଲେ। ୧୬ ଗ୍ରାଣ୍ଡ୍ ସ୍ଲାମ୍ ବିଜେତା ଜୋକୋଭିକ କାନାଡ଼ାର ମିଲୋସ ରାଓନିକ୍ଙ୍କୁ ଭେଟିବେ। ୩୨ ମାନ୍ୟତା ରାଓନିକ୍ ୬-୪, ୬-୩, ୭-୫ ସେଟ୍ରେ କ୍ରୋଏସିଆର ମାରିନ ସିଲିକ୍ଙ୍କୁ ମାତ୍ ଦେଇ କ୍ବାର୍ଟର ଫାଇନାଲ୍ ସ୍ଥାନ ପକ୍କା କରିଥିଲେ। ୨୦ ଗ୍ରାଣ୍ଡ୍ ସ୍ଲାମ୍ ବିଜେତା ଫେଡେରର୍ ସେମିଫାଇନାଲ୍ ସ୍ଥାନ ପାଇଁ ଆମେରିକାର ଟେନିଜ୍ ସାଣ୍ଡଗ୍ରେନ୍ଙ୍କ ସହ ଲଢ଼ିବେ। ସାଣ୍ଡଗ୍ରେନ୍ ୭-୬, ୭-୫, ୬-୭, ୬-୪ ସେଟ୍ରେ ଦ୍ବାଦଶ ମାନ୍ୟତାପ୍ରାପ୍ତ ଫାବିଓ ଫୋଗନିନିଙ୍କୁ ହରାଇଥିଲେ। ଅନ୍ୟ ଏକ କ୍ବାର୍ଟର ଫାଇନାଲ୍ରେ ଜର୍ମାନିର ଆଲେକ୍ଜାଣ୍ଡର ଜେରଭ ଓ ୩ ଗ୍ରାଣ୍ଡ୍ ସ୍ଲାମ୍ ବିଜେତା ସ୍ବିଜରଲାଣ୍ଡର ଷ୍ଟାନ୍ଲେସ୍ ୱାରିଙ୍କା ମୁହାଁମୁହିଁ ହେବେ। ପ୍ରିକ୍ବାର୍ଟର୍ ଫାଇନାଲ୍ରେ ସପ୍ତମ ମାନ୍ୟତାପ୍ରାପ୍ତ ଜେରଭ ୬-୪, ୬-୪, ୬-୪ ସେଟ୍ରେ ରୁଷିଆର ଆନ୍ଦ୍ରେ ରୁବଲେଭଙ୍କୁ ଏବଂ ୱାରିଙ୍କା ୬-୨, ୨-୬, ୪-୬, ୭-୬, ୬-୨ ସେଟ୍ରେ ଚତୁର୍ଥ ମାନ୍ୟତାପ୍ରାପ୍ତ ରୁଷିଆର ଡାନିଲ ମେଦଭେଦେଭଙ୍କୁ ପରାସ୍ତ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ମହିଳା ଏକକ କ୍ବାର୍ଟର ଫାଇନାଲ୍ରେ ଶୀର୍ଷ ମାନ୍ୟତାପ୍ରାପ୍ତ ଆସ୍ଲେ ବାର୍ଟି, ଚତୁର୍ଥ ମାନ୍ୟତାପ୍ରାପ୍ତ ସିମୋନା ହାଲେପ, ସପ୍ତମ ମାନ୍ୟତାପ୍ରାପ୍ତ ପେଟ୍ରା କ୍ବିତୋଭା ସ୍ଥାନ ପକ୍କା କରିଛନ୍ତି। ଅଷ୍ଟ୍ରେଲିଆର ବାର୍ଟି ୬-୩, ୧-୬, ୬-୪ ସେଟ୍ରେ ଆମେରିକାର ଆଲିସାନ ରିସ୍କେଙ୍କୁ, ରୋମାନିଆର ହାଲେପ ୬-୪, ୬-୪ ସେଟ୍ରେ ନିଜ ଦେଶର ଏଲିସ ମର୍ତେନ୍ସଙ୍କୁ ଓ ଚେକ୍ ଗଣରାଜ୍ୟର କ୍ବିତୋଭା ୭-୬, ୬-୩, ୬-୨ ସେଟ୍ରେ ଗ୍ରିସ୍ର ମାରିଆ ସାକାରିଙ୍କୁ ପରାସ୍ତ କରିଥିଲେ। ହେଲେ ପୂର୍ବତନ ଶୀର୍ଷମାନ୍ୟତା ଖେଳାଳି ଆଞ୍ଜେଲିକ୍ କର୍ବର ଓ ନବମ ମାନ୍ୟତାପ୍ରାପ୍ତ କିକି ବର୍ତେନ୍ସଙ୍କ ଅଭିଯାନ ପ୍ରିକ୍ବାର୍ଟର ଫାଇନାଲ୍ରେ ଶେଷ ହୋଇଯାଇଛି। ରୁଷିଆର ଆନାସ୍ତାସିଆ ପାଭ୍ଲୁଚେଙ୍କୋଭା ୬-୭, ୭-୬, ୬-୨ ସେଟ୍ରେ କର୍ବରଙ୍କୁ ଓ ଦୁଇଟି ଗ୍ରାଣ୍ଡ୍ ସ୍ଲାମ୍ ବିଜୟିନୀ ସ୍ପେନ୍ର ଗାର୍ବିନୋ ମୁଗୁରୁଜା ୬-୩, ୬-୩ ସେଟ୍ରେ ବର୍ତେନ୍ସଙ୍କୁ ହରାଇ ବିଦାୟର ରାସ୍ତା ଦେଖାଇଥିଲେ। କ୍ବାର୍ଟର୍ରେ ପାଭ୍ଲୁଚେଙ୍କୋଭା ଓ ମୁଗୁରୁଜା ମୁହାଁମୁହିଁ ହେବାକୁ ଥିଲା ବେଳେ ବାର୍ଟିଙ୍କୁ ଭେଟିବେ କ୍ବିତୋଭା। ଅନ୍ୟ ଦୁଇ କ୍ବାର୍ଟର ଫାଇନାଲ୍ରେ ହାଲେପ ଓ ଇସ୍ତୋନିଆର ଆନେଟ୍ କୋଣ୍ଟାଭିଏତ ଏବଂ ତୁନିସିଆର ଓନ୍ସ ଜାବିଓର ଓ ଆମେରିକାର ସେଫିଆ କେନିନ ମୁହାଁମୁହିଁ ହେବେ। ପ୍ରିକ୍ବାର୍ଟର ଫାଇନାଲ୍ରେ କୋଣ୍ଟାଭିଏତ ୬-୭, ୭-୫, ୭-୫ ସେଟ୍ରେ ପୋଲାଣ୍ଡର ଇଗା ସ୍ବିତେକଙ୍କୁ, ଜାବିଓର ୭-୬, ୬-୧ ସେଟ୍ରେ ଚୀନ୍ର କ୍ବିଆଙ୍ଗ ୱାଙ୍ଗ୍ଙ୍କୁ ଏବଂ କେନିନ ୬-୭, ୬-୩, ୬-୦ ସେଟ୍ରେ ନିଜ ଦେଶର କୋକୋ ଗୌଫ୍ଙ୍କୁ ପରାସ୍ତ କରିଥିଲେ।
ମିଶ୍ରିତ ଯୁଗଳରେ ପେସ୍, ବୋପାନ୍ନା ଆଗେଇଲେ
ଭାରତୀୟ ଟେନିସ ତାରକା ଲିଆଣ୍ଡର ପେସ୍ ଓ ରୋହନ ବୋପାନ୍ନା ନିଜ ନିଜ ସାଥୀଙ୍କ ସହ ଚଳିତ ଅଷ୍ଟ୍ରେଲିଆନ୍ ଓପନ୍ ଟେନିସ ପ୍ରତିଯୋଗିତାରେ ଆଗକୁ ବଢ଼ିଛନ୍ତି। ଲାଟଭିଆର ଜେଲିନା ଓସ୍ତାପେଙ୍କୋଙ୍କୁ ସାଥୀ କରି ଖେଳୁଥିବା ପେସ୍ ପ୍ରଥମ ପର୍ଯ୍ୟାୟରେ ଅଷ୍ଟ୍ରେଲିଆ ଯୋଡ଼ି ଷ୍ଟ୍ରମ ସାଣ୍ଡର୍ସ ଓ ମାର୍କ ପୋଲ୍ମାନ୍ସଙ୍କୁ ୬-୭, ୬-୩, ୧୦-୪ ସେଟ୍ରେ ହରାଇ ଦେଇଥିଲେ। ଏହି ଭାରତ-ଲାଟଭିଆ ଯୋଡ଼ି ଦ୍ବିତୀୟ ପର୍ଯ୍ୟାୟରେ ବ୍ରିଟେନ୍-ଆମେରିକା ଯୋଡ଼ି ଜାମି ମୁରେ ଓ ବେଥାନି ମାତିକ-ସାଣ୍ଡ୍ସଙ୍କୁ ଭେଟିବେ। ୟୁକ୍ରେନ୍ର ନାଦିଆ କିଚେନକ ସାଥୀ କରି ଖେଳୁଥିବା ବୋପାନ୍ନା ତୃତୀୟ ପର୍ଯ୍ୟାୟରେ ପହଞ୍ଚିଛନ୍ତି। ୟୁକ୍ରେନ୍-ଭାରତ ଯୋଡ଼ି ଦ୍ବିତୀୟ ପର୍ଯ୍ୟାୟ ମୁକାବିଲାରେ ୬-୪, ୭-୬ ସେଟ୍ରେ ଆମେରିକା-ବ୍ରାଜିଲର ନିକୋଲେ ମେଲିଚର ଓ ବ୍ରୁନୋ ସୌରେସଙ୍କୁ ପରାସ୍ତ କରିଥିଲେ।