ଜାତୀୟ ଭଲିବଲ୍: ଚଣ୍ଡୀଗଡ଼କୁ ଦୁଇ ଥର ଚାଞ୍ଛିଲା ଓଡ଼ିଶା
ଭୁବନେଶ୍ବର : କିଟ୍ର ବିଜୁ ପଟ୍ଟନାୟକ ଇନ୍ଡୋର ଷ୍ଟାଡିୟମ୍ରେ ଚାଲିଥିବା ୬୯ତମ ବରିଷ୍ଠ ଜାତୀୟ ଭଲିବଲ୍ ପ୍ରତିଯୋଗିତାରେ ରବିବାର ଓଡ଼ିଶାକୁ ଲଗାତାର ଦ୍ବିତୀୟ ଦିବସରେ ଯୁଗଳ ବିଜୟ ମିଳିଛି। ତୃତୀୟ ଦିନରେ ଓଡ଼ିଶା ପୁରୁଷ ଓ ମହିଳା ଦଳ ସମାନ ପ୍ରତିଦ୍ବନ୍ଦ୍ବୀ ଚଣ୍ଡୀଗଡ଼କୁ ହରାଇଛନ୍ତି। ଓଡ଼ିଶା ପୁରୁଷ ଦଳ ଦିନର ସର୍ବାଧିକ ସମୟ (୧୦୫ ମିନିଟ୍) ଲଢ଼େଇ କରି ଚଣ୍ଡୀଗଡ଼କୁ ୩-୧ରେ (୨୨-୨୫, ୨୫-୧୦, ୨୫-୨୦, ୨୯-୨୭)ରେ ପରାସ୍ତ କରିଥିଲେ। ମୋଟ ପଏଣ୍ଟ୍ ମୁକାବିଲାରେ ମଧ୍ୟ କଡ଼ା ଟକ୍କର (୧୦୨-୯୬) ଦେଖିବାକୁ ମିଳିଥିଲା। ମହିଳା ଦଳ କିନ୍ତୁ ମାତ୍ର ୫୦ ମିନିଟ୍ ଲଢ଼େଇ କରି ଏକତରଫା ଭାବେ ୩-୦ରେ ବିଜୟୀ ହୋଇଥିଲେ। ୨୫-୭, ୨୫-୧୩, ୨୫-୧୨ରେ ଓଡ଼ିଶା ମହିଳା ଜିତି ଘରୋଇ ପ୍ରଶଂସକଙ୍କ ପାଇଁ ଖୁସି ବଢ଼ାଇ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ରବିବାର ପୁରୁଷ ବିଭାଗରେ ଅନ୍ୟମ୍ୟାଚ୍ ଗୁଡିକରେ ମଧ୍ୟପ୍ରଦେଶ ୩-୦ରେ ଲଦାଖକୁ, ଉତ୍ତରାଞ୍ଚଳ ୩-୦ରେ ଝାଡ଼ଖଣ୍ଡକୁ, ଗୁଜୁରାଟ ୩-୦ରେ ତେଲେଙ୍ଗାନାକୁ, ଜମ୍ମୁ କଶ୍ମୀର ୩-୦ରେ ତ୍ରିପୁରାକୁ, ଆନ୍ଧ୍ରପ୍ରଦେଶ ୩-୧ରେ ହିମାଚଳ ପ୍ରଦେଶକୁ, ପଣ୍ଡିଚେରୀ ୩-୦ରେ ଦିଲ୍ଲୀକୁ ପରାସ୍ତ କରିଥିଲା। ମହିଳା ବିଭାଗରେ ତାମିଲନାଡକୁ ମହାରାଷ୍ଟ୍ର, ଜମ୍ମୁ କଶ୍ମୀରକୁ ମଧ୍ୟପ୍ରଦେଶ, ଲଦାଖକୁ ଚଣ୍ଡୀଗଡ଼, ପଞ୍ଜାବକୁ ଉତ୍ତରପ୍ରଦେଶ, ଝାଡ଼ଖଣ୍ଡକୁ ଗୁଜରାଟ, ମିଜୋରାମକୁ କର୍ଣ୍ଣାଟକ, ମଣିପୁରକୁ ରାଜସ୍ଥାନ ସମାନ ୩-୦ରେ ପରାସ୍ତ କରିଥିବାବେଳେ ଉତ୍ତରାଞ୍ଚଳ ୩-୧ ସେଟରେ ପଣ୍ଡିଚେରୀକୁ ପରାସ୍ତ କରିଥିଲା।