ଜାତୀୟ ମହିଳା ଫୁଟ୍ବଲ୍: ଝାଡ଼ଖଣ୍ଡ, ମଣିପୁର, ଦିଲ୍ଲୀ ବିଜୟୀ
କଟକ: ବାରବାଟୀ ଷ୍ଟାଡିୟମରେ ଚାଲିଥିବା ଜାତୀୟ ମହିଳା ଫୁଟ୍ବଲ୍ ପ୍ରତିଯୋଗିତାରେ ଗୁରୁବାର ଝାଡ଼ଖଣ୍ଡ, ମଣିପୁର, ଦିଲ୍ଲୀ ବିଜୟୀ ହୋଇଛନ୍ତି। ଝାଡ଼ଖଣ୍ଡ ୫-୧ ଗୋଲ୍ରେ ଅରୁଣାଚଳ ପ୍ରଦେଶକୁ ପରାସ୍ତ କରିଛି। ବିଜୟୀ ଦଳର ପ୍ରତୀକ୍ଷା ଲାକ୍ରା ୯ ଓ ୯୩ ମିନିଟ୍, ପୂଜା କୁମାରୀ ୩୬ ମିନିଟ୍, ଉର୍ମିଳା ସିଂହ ୩୮ ମିନିଟ୍, ଗୋରତି ବା’ ୭୮ ମିନିଟ୍ରେ ଗୋଲ୍ ଦେଇଥିଲା ବେଳେ ଅରୁଣାଚଳର ତାମ୍ଚି ୟାପି ୫୪ ମିନିଟ୍ରେ ଗୋଟିଏ ଗୋଲ୍ ଶୁଝି ଦେଇଥିଲେ। ଅନ୍ୟ ଏକ ମ୍ୟାଚ୍ରେ ମଣିପୁର ୬-୧ ଗୋଲ୍ରେ ମହାରାଷ୍ଟ୍ରକୁ ହରାଇଛି। ମଣିପୁର ଅଧିନାୟିକା ଏନ୍ଜି ବାଲାଦେବୀ (୧୯, ୨୬, ୬୬, ୯୧ ମିନିଟ୍) ଏକାକି ୪ ଗୋଲ ଦେଇଥିଲା ବେଳେ ଦଙ୍ଗମୟୀ ଗ୍ରେସ୍ (୭୩ ଓ ୮୦ ମିନିଟ୍) ଦୁଇଟି ଗୋଲ୍ କରିଥିଲେ। ମହାରାଷ୍ଟ୍ରର ଆଫ୍ରିନ୍ ପିରଭୋୟ ୪୩ ମିନିଟ୍ରେ ପେନାଲ୍ଟି ଜରିଆରେ ଗୋଟିଏ ଗୋଲ୍ ଶୁଝି ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଆଉ ଏକ ମ୍ୟାଚ୍ରେ ଦିଲ୍ଲୀ ୨-୦ ଗୋଲ୍ରେ ଆସାମକୁ ହରାଇଥିଲା। ଲାଇସରାମ ଚାନୁ (୧୧ ମିନିଟ୍) ଓ ଡାଲିମା ଛିବେର (୩୬ ମିନିଟ୍) ଗୋଟିଏ ଲେଖାଏଁ ଗୋଲ୍ କରିଥିଲେ। ତେବେ ଗୋଆ ଓ ତାମିଲନାଡ଼ୁ ମଧ୍ୟରେ ଖେଳାଯାଇଥିବା ମ୍ୟାଚ୍ ୧-୧ ଗୋଲ୍ରେ ଅମୀମାଂସିତ ରହିଥିଲା। ମ୍ୟାଚର ୧୦ ମିନିଟ୍ରେ ତାମିଲନାଡ଼ୁର ଇନ୍ଦୁମତୀ ପ୍ରଥମ ଗୋଲ୍ ଦେଇଥିଲା ବେଳେ ଦ୍ୱିତୀୟାର୍ଧରେ ବଦଳ ଖେଳାଳି କରିନ୍ କୋଷ୍ଟା (୯୨ ମିନିଟ୍, ଅତିରିକ୍ତ ସମୟରେ) ଗୋଲ୍ ଶୁଝି ଦେଇଥିଲେ।