ବଡ଼ ବିଜୟ ପଥରେ ନ୍ୟୁଜିଲାଣ୍ଡ୍: ହେନରିଙ୍କ ଶତକ ସହ ନ୍ୟୁଜିଲାଣ୍ଡ୍ ୪୮୨
ଖ୍ରୀଷ୍ଟଚର୍ଚ୍ଚ: ମ୍ୟାଟ୍ ହେନରିଙ୍କ ଘାତକ ବୋଲିଂ (୭/୨୩) ପରେ ହେନରି ନିକଲ୍ସଙ୍କ ଶତକ (୧୦୫, ୧୬୩ ବଲ୍) ବଳରେ ନ୍ୟୁଜିଲାଣ୍ଡ୍ ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟରେ ବଡ଼ ବିଜୟ ଦିଗରେ ଅଗ୍ରସର ହୋଇଛି। ଏପରିକି ଅଢ଼େଇ ଦିନରେ ଘରୋଇ ଦଳ ଟେଷ୍ଟ୍ ଜିତିଯିବାର ସମ୍ଭାବନା ସୃଷ୍ଟି କରିଛି। ଦକ୍ଷିଣ ଆଫ୍ରିକାର ପ୍ରଥମ ପାଳି ୯୫ ରନ୍ ଜବାବରେ ନ୍ୟୁଜିଲାଣ୍ଡ୍ ପ୍ରଥମ ପାଳିରେ ୪୮୧ ରନ୍ କରିନେଇଛି। ନିକଲ୍ସଙ୍କ ବ୍ୟତୀତ ୱିକେଟରକ୍ଷକ ଟମ୍ ବ୍ଲଣ୍ଡେଲ୍ ବଢ଼ିଆ ବ୍ୟାଟିଂ କରିଥିଲେ ମଧ୍ୟ ମାତ୍ର ୪ ରନ୍ ପାଇଁ ଶତକରୁ ବଞ୍ଚିତ ହୋଇଥିଲେ। ଏହି ଦୁଇ ଜଣଙ୍କ ବ୍ୟତୀତ ପାଳିର ତୃତୀୟ ବ୍ୟାଟର୍ ଭାବେ ୫୦ ରନ୍ ଅତିକ୍ରମ କରିଥିଲେ ୧୧ ନମ୍ବର ଖେଳାଳି ମ୍ୟାଟ୍ ହେନରି। ପୂର୍ବଦିନ ୭ ୱିକେଟ୍ ସଫଳତା ପାଇଥିବା ମ୍ୟାଟ୍ ଅପରାଜିତ ଅର୍ଦ୍ଧଶତକ (୫୮*, ୬୮ ବଲ୍) ସହ ବିରଳ କ୍ଲବ୍ରେ ସାମିଲ ହୋଇଥିଲେ। ଟ୍ରେଣ୍ଟ୍ ବୋଲ୍ଟ ପିତୃତ୍ବ ଛୁଟିରେ ଯିବାରୁ ଚୂଡାନ୍ତ ଏକାଦଶରେ ସୁଯୋଗ ପାଇଥିବା ମ୍ୟାଟ୍ ହେନରିଙ୍କ ଅଲରାଉଣ୍ଡ୍ ପ୍ରଦର୍ଶନ ଏବେ ଅଧିକ ଚର୍ଚ୍ଚାରେ ରହିଛି। ଗୁରୁବାର ହେନରିଙ୍କ ୭/୨୩ କାରଣରୁ ଦକ୍ଷିଣ ଆଫ୍ରିକା ୯୦ ବର୍ଷ ପରେ ପ୍ରଥମ ଥର ପ୍ରଥମ ପାଳିରେ ସର୍ବନିମ୍ନ ୯୫ ରନ୍ କରିଥିଲା। ପ୍ରଥମ ପାଳିରେ ୩୮୭ ରନ୍ ପଛୁଆ ରହିବା ପରେ ଦ୍ବିତୀୟ ଦିନ ଖେଳ ଶେଷ ସୁଦ୍ଧା ଦକ୍ଷିଣ ଆଫ୍ରିକା ୩୪ ରନ୍ରେ ୩ଟି ଦ୍ବିତୀୟ ପାଳି ୱିକେଟ୍ ହରାଇ ଦେଇଥିବାରୁ ଲଜ୍ଜାଜନକ ପରାଜୟ ଆଶଙ୍କାରେ ରହିଛି।
Sambad is now on WhatsApp
Join and get latest news updates delivered to you via WhatsApp
ସଂକ୍ଷିପ୍ତ ସ୍କୋର: ଦକ୍ଷିଣ ଆଫ୍ରିକା ପ୍ରଥମ ପାଳି: ୯୫ (ଜୁବେୟାର୍ ହାମଜା-୨୫, ମ୍ୟାଟ୍ ହେନରି-୭/୨୩)। ନ୍ୟୁଜିଲାଣ୍ଡ୍ ପ୍ରଥମ ପାଳି: ୪୮୨ (ହେନରି ନିକଲ୍ସ-୧୦୫, ଟମ୍ ବ୍ଲଣ୍ଡେଲ୍-୯୬, ମ୍ୟାଟ୍ ହେନରି-୫୮*, ନିଲ ୱାଗନର୍-୪୯, ଡୁଆନ୍ ଓଲିଭର-୩/୧୦୦, ଏୖଦେନ ମର୍କରାମ-୨/୨୭, ମାର୍କୋ ଜାନସେନ୍-୨/୯୬, କାଗିସୋ ରବାଦା-୨/୧୧୩, ଗ୍ଲେଣ୍ଟନ୍ ଷ୍ଟର୍ମନ-୧/୧୨୪)। ଦକ୍ଷିଣ ଆଫ୍ରିକା ଦ୍ବିତୀୟ ପାଳି: ୯ ଓଭରରେ ୩୪/୩ (ରାଶି ଭାନ୍ ଡେର୍ ଦସେନ୍-୯*, ତେମ୍ବା ବଭୂମା-୨୨*, ଟିମ୍ ସାଉଦି-୨/୨୦, ମ୍ୟାଟ୍ ହେନରି-୧/୧୩)।