ଭୁବନେଶ୍ୱର: ନୟାପଲ୍ଲୀସ୍ଥିତ ଭିଣ୍ଟେଜ୍ କ୍ଲବ୍ ପରିସରରେ ଚାଲିଥିବା ସପ୍ତମ ଏମ୍ଆଇଇଟି ନିଖିଳ ଓଡ଼ିଶା ଓପନ୍ ସ୍ନକର ପ୍ରତିଯୋଗିତାରେ ଶନିବାର ଜିତେନ ଷଡ଼ଙ୍ଗୀ ପ୍ରତିଶୋଧପୂର୍ଣ୍ଣ ବିଜୟ ହାସଲ କରିଛନ୍ତି। ଜିତେନଙ୍କୁ ଗତମାସରେ କଟକ କ୍ଲବ୍ଠାରେ ଅନୁଷ୍ଠିତ ରାଜ୍ୟ ମାନ୍ୟତା ସ୍ନକର ପ୍ରତିଯୋଗିତାର ପ୍ରିକ୍ୱାର୍ଟର ଫାଇନାଲ୍ରେ ମହମ୍ମଦ ରାଜା ପରାସ୍ତ କରିଥିଲେ। ଆଉ ଏହାର ମଧୁର ପ୍ରତିଶୋଧ ଏଠାରେ ଜିତେନ ନେଇଛନ୍ତି। ପ୍ରିକ୍ୱାର୍ଟର ଫାଇନାଲ୍ରେ ଜିତେନ ୩-୨ରେ ରାଜାଙ୍କୁ ପରାସ୍ତ କରି କ୍ୱାର୍ଟର ଫାଇନାଲ୍ ସ୍ଥାନ ପକ୍କା କରିଛନ୍ତି। ଶନିବାର ଅନ୍ୟ ପ୍ରିକ୍ୱାର୍ଟର ଫାଇନାଲ୍ରେ ସୁବ୍ରତ ଦାସ ୩-୦ରେ କୁନାଲ ଅଗ୍ରଓ୍ଵାଲ୍ଙ୍କୁ, ଅନୁଜ ପଣ୍ଡା ୩-୦ରେ ଆକ୍ରାମ୍ ଖାନ୍ଙ୍କୁ, ଅମିୟ ନାୟକ ୩-୧ରେ ଖଲିଦ୍ ସୁଲ୍ତାନଙ୍କୁ, ନିଶାନ୍ତ ବିଶ୍ୱାଳ ୩-୦ରେ ରାଜତ ଧଳଙ୍କୁ, ସିଦ୍ଧାର୍ଥ ସେନ୍ ୩-୦ରେ ରୁମିତ୍ ଗୁପ୍ତାଙ୍କୁ, ଆକାଶ ମହାପାତ୍ର ୩-୦ରେ ସତ୍ୟଦୀପ ଦାସଙ୍କୁ, ଡ. ରାକେଶ ରୋସନ୍ ପ୍ରଧାନ ୩-୦ରେ ମିଶାଲ ସ୍ୱାଇଁଙ୍କୁ ପରାସ୍ତ କରି କ୍ୱାର୍ଟର ଫାଇନାଲ୍ରେ ପହଞ୍ଚିଥିଲେ। କ୍ୱାର୍ଟର ଫାଇନାଲ୍ରେ ରାକେଶ-ସିଦ୍ଧାର୍ଥ, ନିଶାନ୍ତ-ଅନୁଜ, ସୁବ୍ରତ-ଜିତେନ ଏବଂ ଅମିୟ-ଆକାଶ ମୁହାଁମୁହିଁ ହେବେ।