ନୋ ବଲକୁ ନେଇ ପ୍ରଶ୍ନ ଉଠାଇବା ମହଙ୍ଗା ପଡିଲା: ଋଷଭ ପନ୍ତଙ୍କର ମ୍ୟାଚ ଫି କାଟିବାକୁ ନିଆଗଲା ନିଷ୍ପତ୍ତି

ନୂଆଦିଲ୍ଲୀ: ଶୁକ୍ରବାର ରାତିରେ ଦିଲ୍ଲୀ କ୍ୟାପିଟାଲସ ଏବଂ ରାଜସ୍ଥାନ ରୟାଲ୍ସ (ଡିସି ବନାମ ଆରଆର) ମଧ୍ୟରେ ହୋଇଥିବା ମ୍ୟାଚକୁ ନେଇ ବିବାଦ ଦେଖାଯାଇଥିଲା | ଏହି ମ୍ୟାଚ୍‌ରେ ଦିଲ୍ଲୀର ଅଧିନାୟକ ଋଷଭ ପନ୍ତ ଏବଂ କିଛି ଖେଳାଳି ଗୋଟିଏ ବଲକୁ ନୋ ବଲ ଦିଆଯାଇନଥିବାରୁ ବିବାଦ ସୃଷ୍ଟି କରିଥିଲେ। ଆଉ ଆଜି ଦଣ୍ଡ ଦିଆଯାଇଛି | ଋଷଭ ଏବଂ ଶାର୍ଦ୍ଦୁଲ ଠାକୁରଙ୍କ ମ୍ୟାଚ୍ ଫି’ର ୧୦୦ ପ୍ରତିଶତ କଟାଯିବା ସହ ଦିଲ୍ଲୀର ଜଣେ ପ୍ରଶିକ୍ଷକଙ୍କୁ ମଧ୍ୟ ଏକ ବଡ଼ ଦଣ୍ଡ ଦିଆଯାଇଛି। ଋଷଭ ଏବଂ ଶାର୍ଦ୍ଦୁଲ ଠାକୁରଙ୍କ ମ୍ୟାଚ୍ ଫି’ର ୧୦୦ ପ୍ରତିଶତ ଜରିମାନା ଆକାରରେ କଟାଯାଇଥିବାବେଳେ ସହକାରୀ ପ୍ରଶିକ୍ଷକ ପ୍ରବୀଣ ଆମ୍ରେଙ୍କୁ ଗୋଟିଏ ମ୍ୟାଚ ପାଇଁ ବାରଣ କରାଯାଇଛି। ଏହା ବ୍ୟତୀତ ତାଙ୍କୁ ମ୍ୟାଚ୍ ଫି ର ୧୦୦% ଜରିମାନା ମଧ୍ୟ କରାଯାଇଛି।

ସୂଚନା ଥାଉ କି ଯେ ପ୍ରବୀଣ ଆମ୍ରେ ମ୍ୟାଚ୍ ମଝିରେ ନୋ-ବଲ୍ ବିବାଦ ବିଷୟରେ ଅନ୍ ଫିଲ୍ଡ ଅମ୍ପାୟାରଙ୍କ ସହ କଥା ହେବାକୁ ଯାଇଥିଲେ। ଋଷଭ ଆଇପିଏଲ ଆଚରଣ ସଂହିତା ର ଧାରା ୨.୭ ଅନୁଯାୟୀ ଏକ ସ୍ତର 2 ଅପରାଧ ସହ ଜରିମାନାକୁ ସ୍ୱୀକାର କରିଛନ୍ତି | ଠାକୁର ମଧ୍ୟ ଆଇପିଏଲ ଆଚରଣ ସଂହିତା ର ଧାରା ୨.୮ ଅନୁଯାୟୀ ଅପରାଧ ଏବଂ ଜରିମାନା ଗ୍ରହଣ କରିଛନ୍ତି |

ସୂଚନା ଥାଉ କି ଶୁକ୍ରବାର ହାଇସ୍କୋରିଂ ମୁକାବିଲାରେ ରାଜସ୍ଥାନ ୨୨୨ ରନ୍‌ କରିବା ପରେ ଦିଲ୍ଲୀକୁ ୨୦୭ ରନ୍‌ରେ ରୋକି ଦେଇଥିଲା। ଦିଲ୍ଲୀର ପଶ୍ଚାତଧାବନ ବେଳେ ଶେଷ ଓଭରରୁ ଦଳକୁ ୩୬ ରନ୍‌ ଆବଶ୍ୟକ ଥିଲା। ପ୍ରଥମ ୩ ବଲ୍‌କୁ ଛକା ମାରି ରୋଭମ୍ୟାନ୍ ପାୱେଲ୍ ଆଶା ସଞ୍ଚାର କରିଥିଲେ। ତୃତୀୟ ବଲ୍‌ଟି ନୋ ବଲ୍‌ ଥିବା ଦାବି କରି ଦିଲ୍ଲୀ ଖେଳାଳି, ପ୍ରଶିକ୍ଷକ ଓ ଅଧିନାୟକ ଅମ୍ପାୟାରଙ୍କ ସହ ଯୁକ୍ତିତର୍କ କରିବା ଏବଂ ପଡ଼ିଆ ଛାଡ଼ିବାର ଧମକ ଦେବା କାରଣରୁ ମ୍ୟାଚ୍‌ ଅଟକିଥିଲା। ଅମ୍ପାୟାର୍‌ କିନ୍ତୁ ଏହାକୁ ବିଚାରକୁ ନ ନେଇ ବୁଝାଇବା ପରେ ଶେଷ ୩ ବଲ୍‌ ପଡ଼ିଥିଲା।

ସମ୍ବନ୍ଧିତ ଖବର