ନଗେସ ଟ୍ରଫି ଲାଗି ଓଡ଼ିଶା ଦୃଷ୍ଟିହୀନ କ୍ରିକେଟ୍‌ ଦଳ

ଭୁବନେଶ୍ବର: ଓଡ଼ିଶା ଦୃଷ୍ଟିହୀନ କ୍ରିକେଟ୍‌ ସଂଘ (କାଭି) ଗୁରୁବାର ନଗେସ ଟ୍ରଫି ୨୦୧୯-୨୦ର ପ୍ରଥମ ୩ ଲିଗ୍‌ ମ୍ୟାଚ୍‌ ଲାଗି ୧୪ ଜଣିଆ ଦଳ ଘୋଷଣା କରିଛି। ମହମ୍ମଦ ଜାଫର ଇକ୍‌ବାଲ ଦଳର ଅଧିନାୟକ ରହିଥିଲା ବେଳେ ଚନ୍ଦ୍ରଶେଖର ପଟ୍ଟନାୟକ ପ୍ରଶିକ୍ଷକ ଏବଂ ବିରଞ୍ଚି ନାରାୟଣ ସାହୁ ପ୍ରବନ୍ଧକ ରହିଛନ୍ତି। ବିଜେତା ଓଡ଼ିଶା ଏଲାଇଟି ଗ୍ରୁପ୍‌-ଏରେ ଉତ୍ତରାଖଣ୍ଡ, ଦିଲ୍ଲୀ, କର୍ଣ୍ଣାଟକ, ହରିଆଣା, ଗୋଆ ସହ ରହିଛି। ଟ୍ବେଣ୍ଟି-୨୦ ଫର୍ମାଟ୍‌ରେ ଖେଳାଯିବାକୁ ଥିବା ଏହି ପ୍ରତିଯୋଗିତାର ପ୍ରଥମ ୩ ଲିଗ୍‌ ମ୍ୟାଚ୍‌ ନଭେମ୍ବର ୯ ଓ ୧୦ ତାରିଖରେ ଉତ୍ତର ପ୍ରଦେଶର ଲକ୍ଷ୍ନୌରେ ଖେଳାଯିବ। ସେହିପରି ପରବର୍ତୀ ଦୁଇ ଲିଗ୍‌ ମ୍ୟାଚ୍‌ ଡିସେମ୍ବର ୧ ଓ ୩ ତାରିଖରେ ହରିଆଣାର ଫରିଦାବାଦରେ ଖେଳାଯିବ। ଏହି ପ୍ରତିଯୋଗିତାରେ ମୋଟ ୨୪ ଦଳ ଭାଗ ନେଉଥିଲା ବେଳେ ୪ ଗ୍ରୁପ୍‌ରେ ବିଭକ୍ତ କରାଯାଇ ଲିଗ୍‌ ମ୍ୟାଚ୍‌ ଖେଳାଯିବ। ଏ ଓ ବିର ଶ୍ରେଷ୍ଠ ୩ ଦଳ ଏବଂ ସି ଓ ଡିର ଶ୍ରେଷ୍ଠ ଦଳ କ୍ବାର୍ଟର ଫାଇନାଲ୍‌କୁ ଯୋଗ୍ୟତା ଅର୍ଜନ କରି‌ବେ। ନଗେସ ଟ୍ରଫି ଲାଗି ଉତ୍ତର ପ୍ରଦେଶ ଗସ୍ତ ପୂର୍ବରୁ ଦଳ ଭୁବନେଶ୍ବରସ୍ଥିତ ପାରାମାଉଣ୍ଟ ପଡ଼ିଆରେ ୩ରୁ ୬ ତାରିଖ ପର୍ଯ୍ୟନ୍ତ ଅଭ୍ୟାସ କରିବ।

ଓଡ଼ିଶା ଦଳ: ମହମ୍ମଦ ଜାଫର ଇକ୍‌ବାଲ (ଅଧିନାୟକ), ତପନ କୁମାର ଗୌଡ଼, ଦେବରାଜ ବେହେରା, ଅନିଲ ମଲ୍ଲିକ, ନକୁଲ ବଡ଼ନାୟକ, ପଙ୍କଜ ଭୂଏ, ଲିଙ୍ଗରାଜ ରାଉତରା, ସୁଖରାମ ମାଝୀ, ସିଙ୍ଗରାଇ ମାଝୀ, ଧନପତି ଗୌଡ଼, ଜୁଜହର ବାରି, ସୁକଦେବ ସୋରେନ, ଲାଲପ୍ରସାଦ ସୋରେନ।