ମାଷ୍ଟର୍ସ କପ୍‌ ହକି କ୍ବାର୍ଟରରେ ଓଡ଼ିଶା

ଭୁବନେଶ୍ବର: ତାମିଲନାଡ଼ୁରେ ଚାଲିଥିବା ପ୍ରଥମ ହକି ଇଣ୍ଡିଆ ମାଷ୍ଟର୍ସ କପ୍‌ର କ୍ବାର୍ଟରଫାଇନାଲ୍‌ରେ ଓଡ଼ିଶା ପ୍ରବେଶ କରିଛି। ନିଜର ପ୍ରଥମ ଗ୍ରୁପ୍‌ ମ୍ୟାଚ୍‌ରେ ପୁଡ଼ୁଚେରୀକୁ ହରାଇଥିବା ଓଡ଼ିଶା ଶୁକ୍ରବାର ପଞ୍ଜାବକୁ ୫-୨ରେ ହରାଇ ଗ୍ରୁପ୍‌-ବି’ରେ ଶୀର୍ଷ ସ୍ଥାନ ଦଖଲ କରି କ୍ବାର୍ଟରଫାଇନାଲ୍‌ ସ୍ଥାନ ପକ୍କା କରିଛି। ମ୍ୟାଚ୍‌ର ପ୍ରଥମ କ୍ବାର୍ଟର ଗୋଲ୍‌ଶୂନ୍ୟରେ ଶେଷ ହୋଇଥିଲା। ଦ୍ବିତୀୟ କ୍ବାର୍ଟରରେ ଧରମପାଲ ସିଂହ (୧୭ ମିନିଟ୍‌)ଙ୍କ ଗୋଲ୍‌ରେ ପଞ୍ଜାବ ପ୍ରାରମ୍ଭିକ ଅଗ୍ରଣୀ ନେଇଥିଲା। ଏହା ପର ମିନିଟ୍‌ରେ ଓଡ଼ିଶାକୁ ମିଳିଥିବା ପେନାଲ୍‌ଟି କର୍ଣ୍ଣରକୁ ଅଧିନାୟକ ଲାଜରୁସ ବାର୍ଲା (୧୮ ମିନିଟ୍‌) ଗୋଲ୍‌ରେ ପରିଣତ କରି ୧-୧ ସ୍ତରକୁ ଆଣିଥିଲେ। ୨୨ତମ ମିନିଟ୍‌ରେ ରାମ ଶରଣଙ୍କ ଗୋଲ୍‌ରେ ପଞ୍ଜାବ ପୁଣି ଆଗୁଆ ହୋଇଥିଲା। ଏହାପରେ ଓଡ଼ିଶା ଖେଳାଳି ପଞ୍ଜାବକୁ କୌଣସି ସୁଯୋଗ ନ ଦେଇ ୪ ଗୋଲ୍‌ ଲଦି ବିଜୟ ବାନା ଉଡ଼ାଇଥିଲେ। ଓଡ଼ିଶା ପକ୍ଷରୁ ଅନୀଲ କୁଲୁ (୩୩, ୩୭ ମିନିଟ୍‌) ଦୁଇଟି, ସୁନିଲ ଲାକ୍ରା (୩୦ ମିନିଟ୍‌) ଓ ରଜତ କୁମାର ମିଞ୍ଜ (୪୫ ମିନିଟ୍‌) ଏହି ୪ ଗୋଲ୍‌ ଦେଇଥିଲେ।

ଭାରତୀୟ ହକି ଖେଳାଳି ପାଇବେ ମାସିକ ଭତ୍ତା

ନୂଆଦିଲ୍ଲୀ: ହକି ଇଣ୍ଡିଆର ବାରମ୍ବାର ଅନୁରୋଧ ପରେ ଗୁରୁବାର କ୍ରୀଡ଼ା ମନ୍ତ୍ରାଳୟ ଜାତୀୟ ଶିବିରରେ ସ୍ଥାନ ପାଇଥିବା ସମସ୍ତ ପୁରୁଷ ଓ ମହିଳା ଖେଳାଳିଙ୍କୁ ମାସିକ ୨୫,୦୦୦ ଟଙ୍କା ଲେଖାଏଁ ଭତ୍ତା ଦେବାକୁ ନିଷ୍ପତ୍ତି ନେଇଛି। ଫଳରେ ପ୍ରଥମ ଥର ଲାଗି ହକି ଖେଳାଳି ଭତ୍ତା ପାଇବାକୁ ଯାଉଛନ୍ତି। ଟାର୍ଗେଟ୍ ଅଲିମ୍ପିକ୍‌ ପୋଡିୟମ୍ ସ୍କିମ୍‌ (ଟପ୍ସ)ରେ ଥିବା ୮୦ (୪୦ ପୁରୁଷ ଓ ୪୦ ମହିଳା) ଖେଳାଳିଙ୍କୁ ମଧ୍ୟ ଭତ୍ତା ମିଳିବ। ଏହି କୋର୍‌ ଗ୍ରୁପ୍‌ରେ ଥିବା ଖେଳାଳିଙ୍କୁ ମାସିକ ୫୦,୦୦୦ ଟଙ୍କା ଲେଖାଏଁ ଭତ୍ତା ମିଳିବ। ଫଳରେ ଏହି ବାବଦରେ ସରକାରଙ୍କୁ ମାସିକ ୨୦ ଲକ୍ଷ ଟଙ୍କା ଖର୍ଚ୍ଚ କରିବାକୁ ପଡ଼ିବ। ଗୁରୁବାର ମିସନ୍‌ ଅଲିମ୍ପିକ୍ ସେଲ୍‌ (ଏମ୍‌ଓସି) ମାସିକ ବୈଠକରେ ଏହି ନିଷ୍ପତ୍ତି ହୋଇଥିଲା। ଭତ୍ତା ପାଇବାକୁ ଥିବା ଯୋଗ୍ୟ ଖେଳାଳିଙ୍କ ନାମ ତାଲିକା ହକି ଇଣ୍ଡିଆ ସରକାରଙ୍କୁ ପ୍ରତି ମାସରେ ପ୍ରଦାନ କରିବ। ‘‘ହକି ଇଣ୍ଡିଆ ଅନୁରୋଧ କ୍ରମେ ଆମେ ଏଭଳି ନିଷ୍ପତ୍ତି ନେଇଛୁ। ଖେଳାଳିମାନେ ନିଜ ଦକ୍ଷତା ଅନୁସାରେ ପ୍ରଦର୍ଶନ ମଧ୍ୟ କରୁଛନ୍ତି। ହକି ଇଣ୍ଡିଆ ପ୍ରତି ମାସରେ ଆମକୁ ତାଲିକା ପ୍ରଦାନ କରିବ। ଖେଳାଳିଙ୍କ ଫିଟ୍‌ନେସ୍‌ ଅନୁଯାୟୀ ହକି ଇଣ୍ଡିଆ ଖେଳାଳିଙ୍କ ତାଲିକା‌ ପରିବର୍ତ୍ତନ କରିପାରିବ’’ ବୋଲି କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡଭ୍ୟ କହିଛନ୍ତି। ସୂଚନାଯୋଗ୍ୟ, ଯେ ଭାରତୀୟ ପୁରୁଷ ହକି ଦଳ ଲଗାତାର ୨୦୨୧ ଓ ୨୦୨୪ ଅଲିମ୍ପିକ୍ସରେ କାଂସ୍ୟ ପଦକ ଜିତିଥିଲା। ମହିଳା ଦଳ ମଧ୍ୟ ୨୦୨୧ ଟୋକିଓରେ ଚତୁର୍ଥ ସ୍ଥାନରେ ରହିବାର ଗୌରବ ଅର୍ଜନ କରିଥିଲା।