ଭୁବନେଶ୍ବର: ନୂଆଦିଲ୍ଲୀରେ ଚାଲିଥିବା ଜାତୀୟ ଦୃଷ୍ଟିହୀନ କ୍ରିକେଟ୍ ପ୍ରତିଯୋଗିତା ନଗେଶ ଟ୍ରଫିରେ ଲଗାତାର ପଞ୍ଚମ ବିଜୟ ସହ ଓଡ଼ିଶା କ୍ବାର୍ଟର ଫାଇନାଲ୍ରେ ପ୍ରବେଶ କରିଛି। ଲିଗ୍ ପର୍ଯ୍ୟାୟର ପ୍ରଥମ ଚାରିଟି ମ୍ୟାଚ୍କୁ ସହଜରେ ଜିତି ନେଇଥିବା ଓଡ଼ିଶା ଦଳ ରବିବାର ଶେଷ ଲିଗ୍ ମୁକାବିଲାରେ ହରିୟାଣାକୁ ୩୬ ରନ୍ରେ ହରାଇ ଗ୍ରୁପ୍ ଟପ୍ପର ସହ କ୍ବାର୍ଟର ଫାଇନାଲ୍ ଟିକେଟ ହାସଲ କରିନେଇଥିଲା।
Sambad is now on WhatsApp
Join and get latest news updates delivered to you via WhatsApp
ରବିବାର ଓଡ଼ିଶା ଟସ୍ ଜିତି ବ୍ୟାଟିଂ କରିଥିଲା। ପଙ୍କଜ ଭୂଏଙ୍କ ୮୭*, ଲାଲ ପ୍ରସାଦ ସୋରେନଙ୍କ ୩୧ ଏବଂ ମହମ୍ମଦ ଜାଫର ଇକବାଲ ଓ ସୁଖରାମ ମାଝୀଙ୍କ ୨୦ ରନ୍ ଲେଖାଏଁ ବଳରେ ନିର୍ଦ୍ଧାରିତ ୨୦ ଓଭରରେ ୫ ୱିକେଟ୍ ହରାଇ ୧୯୧ ରନ୍ କରିଥିଲା। ଏହାର ଜବାବରେ ହରିୟାଣା ୫ ୱିକେଟ୍ ହରାଇ ୧୫୫ ରନ୍ରେ ଅଟକି ଯାଇଥିଲା। ପଙ୍କଜ ଭୂଏ ଓ ନକୁଳ ବଡ଼ନାୟକ ଦୁଇଟି ଲେଖାଏଁ ୱିକେଟ୍ କରାୟତ୍ତ କରିଥିଲେ। ପଙ୍କଜ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ସୋମବାରର କ୍ବାର୍ଟର ଫାଇନାଲ୍ରେ ରାଜସ୍ଥାନକୁ ଭେଟିବ ଓଡ଼ିଶା।