ଓଡ଼ିଶା ପୁଲିସ୍, ପୂର୍ବତଟ ରେଳବାଇ, ସ୍ପୋର୍ଟ୍ସ ଓଡ଼ିଶା ବିଜୟୀ
କଟକ: ଭୁବନେଶ୍ବରରେ ଚାଲିଥିବା ଓଡ଼ିଶା ମହିଳା ଲିଗ୍ରେ ସୋମବାର ଓଡ଼ିଶା ପୁଲିସ, ପୂର୍ବତଟ ରେଳବାଇ, ସ୍ପୋର୍ଟ୍ସ ଓଡ଼ିଶା ବିଜୟୀ ହୋଇଛନ୍ତି। କ୍ୟାପିଟାଲ ପଡ଼ିଆରେ ଓଡ଼ିଶା ପୁଲିସ୍ ୯-୦ ଗୋଲ୍ରେ ରାଇଜି˚ ଷ୍ଟୁଡେଣ୍ଟ କ୍ଲବ୍କୁ ପରାସ୍ତ କରିଛି। ଜବାମଣି ଟୁଡୁ ୪ (୨୩, ୫୧, ୫୩, ୫୮ ମିନିଟ୍), ସତ୍ୟବତୀ ଖଡ଼ିଆ ୨ (୫୯, ୬୧ ମିନିଟ୍) ଗୋଲ୍ ଦେଇଥିଲାବେଳେ ସୁମିତ୍ରା ଖାଲ୍କୋ ୫୪ ମିନିଟ୍, ସୋନି ବେହେରା ୩୩ ମିନିଟ୍ ଓ ଜସ୍ମଣି ସମଦ ୯୦ ମିନିଟ୍ରେ ଗୋଟିଏ ଲେଖାଏଁ ଗୋଲ ସ୍କୋର କରିଥିଲେ। ଅନ୍ୟଏକ ମ୍ୟାଚ୍ରେ ପୂର୍ବତଟ ରେଳବାଇ ୩-୦ ଗୋଲ୍ରେ ସାଇ ପ୍ରଶିକ୍ଷଣ କେନ୍ଦ୍ରକୁ ମାତ୍ ଦେଇଛି। ଲାହାରି ମଙ୍ଗରାଜ ୧୮ ମିନିଟ୍, ତାରା ଖାତୁନ ୮୧ ମିନିଟ୍, ପୂର୍ଣ୍ଣିମା ରାଓ ୮୮ ମିନିଟ୍ରେ ଗୋଲ ଦେଇ ରେଳବାଇକୁ ଜିତାଇଥିଲେ।
Sambad is now on WhatsApp
Join and get latest news updates delivered to you via WhatsApp
କଳିଙ୍ଗ ଷ୍ଟାଡିୟମରେ ସ୍ପୋର୍ଟ୍ସ ଓଡ଼ିଶା ୪-୩ ଗୋଲ୍ରେ ଓଜିପିକୁ ହରାଇଛି। ବିଜୟୀ ଦଳର ସୁମିତ୍ରା ହେମ୍ବ୍ରମ ୨୬ ଓ ୪୭ ମିନିଟ୍ରେ, ଶିବାନୀ ମୁଣ୍ତାରୀ ୫୧ ମିନିଟ୍ରେ ମୋଟ ୩ ଗୋଲ ଦେଇ ଅଗ୍ରଣୀ ପାଇଥିଲାବେଳେ ଓଜିପିର ଅନିମି କିର୍ତ୍ତିକା କୁମାରୀଙ୍କ ୭୧, ୭୯ ମିନିଟ୍ରେ ୨ ଗୋଲ୍ ଓ ପ୍ରିୟଦର୍ଶିନୀ ବେହେରାଙ୍କ ୯୦ ମିନିଟ୍ରେ ତୃତୀୟ ଗୋଲ୍ ସହାୟତାରେ ମ୍ୟାଚ୍ ବରାବର ହୋଇଥିଲା। ତେବେ ଆହତ ସମୟର ଦ୍ବିତୀୟ ମିନିଟ୍ରେ ଶିବାନୀଙ୍କ ବ୍ୟକ୍ତିଗତ ଦ୍ବିତୀୟ ଗୋଲ୍ ବଳରେ ସ୍ପୋର୍ଟ୍ସ ଓଡ଼ିଶା ମ୍ୟାଚ୍ ଜିତିପାରିଥିଲା।