ଖେଲୋ ଇଣ୍ଡିଆ ଯୁବ କ୍ରୀଡ଼ା: ହକିରେ ଓଡ଼ିଶାକୁ ୨ ପଦକ
ବାଳିକା ଜିତିଲେ ରୌପ୍ୟ; ବାଳକଙ୍କୁ କାଂସ୍ୟ
ଭୁବନେଶ୍ବର : ହରିୟାଣାର ପଞ୍ଚକୁଲାଠାରେ ଚାଲିଥିବା ଖେଲୋ ଇଣ୍ଡିଆ ଯୁବ କ୍ରୀଡ଼ାରେ ଶୁକ୍ରବାର ଓଡ଼ିଶାକୁ ଆଉ ୨ ପଦକ ମିଳିଛି। ଏହି ଦୁଇ ପଦକ ହକିରୁ ଆସିଛି। ମହିଳା ହକି ଦଳ ରୌପ୍ୟ ଏବଂ ପୁରୁଷ ଦଳ କାଂସ୍ୟ ପଦକ ଜିତିଥିଲେ। ଫାଇନାଲ୍ରେ ମହିଳା ଦଳ ୧-୪ ଗୋଲ୍ରେ ଆୟୋଜକ ହରିୟାଣାଠୁ ହାରି ରୌପ୍ୟରେ ସନ୍ତୁଷ୍ଟ ରହିଥିଲା। ତେବେ ପୁରୁଷ ଦଳ ତୃତୀୟ ସ୍ଥାନ ମୁକାବିଲାରେ ଝାଡ଼ଖଣ୍ଡକୁ ୮-୦ ଗୋଲ୍ରେ ହରାଇ କାଂସ୍ୟ ପଦକ କରାୟତ୍ତ କରିଥିଲା। ଝାଡ଼ଖଣ୍ଡଠୁ ଲିଗ୍ ପର୍ଯ୍ୟାୟରେ ୧-୦ରେ ହାରିଥିବା ଓଡ଼ିଶା ଏହି ବିଜୟ ସହ ମଧୁର ପ୍ରତିଶୋଧ ନେଇଛି।
Sambad is now on WhatsApp
Join and get latest news updates delivered to you via WhatsApp
ଆଜିର ଦୁଇ ପଦକ ଅମଳ ପରେ ଓଡ଼ିଶା ଏପର୍ଯ୍ୟନ୍ତ ଖେଲୋ ଇଣ୍ଡିଆ ଯୁବ କ୍ରୀଡ଼ାରୁ ମୋଟ ୭ (୧ ସ୍ବର୍ଣ୍ଣ, ୩ ରୌପ୍ୟ, ୩ କାଂସ୍ୟ) ପଦକ ହାସଲ କରିସାରିଛି। ଏହା ପୂର୍ବରୁ ଭାରୋତ୍ତୋଳନରେ କୁଲ୍ଦୀପ ସାହୁ ଏବଂ ପୁନିତ ଚନ୍ଦ୍ର ସାହୁ ଯଥାକ୍ରମେ ସ୍ବର୍ଣ୍ଣ ଓ ରୌପ୍ୟ ପଦକ ଜିତିଥିଲା ବେଳେ ପୁରୁଷ ୨୦୦ ମିଟର ଦୌଡ଼ରେ ଆର୍ଯ୍ୟନ ଏକ୍କା ରୌପ୍ୟ ଏବଂ ଏ ଗ୍ରାସେସନ ଜୀଭା ପୁରୁଷ ୧୧୦ ମିଟର ବାଧାଦୌଡ଼ରେ କାଂସ୍ୟ ପଦକ ଜିତିଛନ୍ତି। ସେହିପରି ଲମ୍ବ ଡିଆଁରେ ସବିତା ଟପ୍ପୋ କାଂସ୍ୟ ପଦକ କରାୟତ କରିଛନ୍ତି।