ଓଡ଼ିଶା ମହିଳା ଫୁଟ୍ବଲ୍ ଲିଗ୍: ରେଳବାଇ, ଓଏଫ୍ସି, ସ୍ପୋର୍ଟ୍ସ ଓଡ଼ିଶା ବିଜୟୀ
ଭୁବନେଶ୍ବର : ଭୁବନେଶ୍ବରର ବିଭିନ୍ନ ପଡ଼ିଆରେ ଚାଲିଥିବା ଓଡ଼ିଶା ମହିଳା ଫୁଟ୍ବଲ୍ ଲିଗ୍ରେ ଶୁକ୍ରବାର ପୂର୍ବତଟ ରେଳବାଇ, ଓଡ଼ିଶା ଏଫ୍ସି ଓ ସ୍ପୋର୍ଟ୍ସ ଓଡ଼ିଶା ବିଜୟୀ ହୋଇଛନ୍ତି। ସପ୍ତମ ବାଟାଲିୟନ୍ ପଡ଼ିଆରେ ପୂର୍ବତଟ ରେଳବାଇ ୧୦-୦ ଗୋଲ୍ରେ ଓଜିପିକୁ ହରାଇଥିଲା। ୱାଇ. କମଳାଦେବୀ (୧୮, ୨୧, ୨୮, ୬୧ ମିନିଟ୍)ଙ୍କ ୪ ଓ ସୁପ୍ରିୟା ରାଉତରାୟ (୯, ୫୪, ୬୭, ୮୬ ମିନିଟ୍)ଙ୍କ ୪ ଲେଖାଏଁ ଗୋଲ୍ ସହାୟତାରେ ରେଳବାଇକୁ ବଡ଼ ବିଜୟ ମିଳିଥିଲା। ଏମାନଙ୍କ ବ୍ୟତୀତ ତାରା ଖାତୁନ୍ ୪୫+୧ ମିନିଟ୍, ଲାହାରି ମଙ୍ଗରାଜ ୭୧ ମିନିଟ୍ରେ ଗୋଟିଏ ଲେଖାଏଁ ଗୋଲ୍ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
କ୍ୟାପିଟାଲ୍ ପଡ଼ିଆରେ ଖେଳାଯାଇଥିବା ଅନ୍ୟ ଏକ ମ୍ୟାଚ୍ରେ ଓଡ଼ିଶା ଏଫ୍ସି ୬-୦ ଗୋଲ୍ରେ ରାଇଜିଂ ଷ୍ଟୁଡେଣ୍ଟକୁ ପରାସ୍ତ କରିଛି। ପ୍ରଥମାର୍ଦ୍ଧ ଗୋଲ୍ଶୂନ୍ୟ ରହିବା ପରେ ଦ୍ବିତୀୟାର୍ଦ୍ଧରେ ଯଶୋଦା ମୁଣ୍ଡାଙ୍କ ହ୍ୟାଟ୍ରିକ୍ (୫୭, ୫୮, ୮୪ ମିନିଟ୍) ସହିତ ଅରିଫା ଜହିର (୫୪ ମିନିଟ୍), ମୁନିକା ମିଞ୍ଜ୍ (୭୬ ମିନିଟ୍) ଓ ପ୍ୟାରୀ ଖାଖା (୮୯ ମିନିଟ୍)ଙ୍କ ଗୋଟିଏ ଲେଖାଏଁ ଗୋଲ୍ ବଳରେ ଓଏଫ୍ସି ଏକତରଫା ବିଜୟ ପାଇଥିଲା।
କଳିଙ୍ଗ ଷ୍ଟାଡିୟମ୍ରେ ଅପରାହ୍ନରେ ଖେଳାଯାଇଥିବା ମ୍ୟାଚ୍ରେ ସ୍ପୋର୍ଟ୍ସ ଓଡ଼ିଶା ୩-୨ ଗୋଲ୍ରେ ଓଡ଼ିଶା ପୁଲିସ୍କୁ ହରାଇଛି। ମନୀଷା ନାୟକ ପ୍ରଥମରୁ ଦୁଇଟି ଗୋଲ୍ (୧୨, ୧୯ ମିନିଟ୍) ଦେଇ ସ୍ପୋର୍ଟ୍ସ ଓଡ଼ିଶାକୁ ଅଗ୍ରଣୀ ରଖିଥିଲେ। ତେବେ ଇଭା ପାନ୍ନା (୫୧ ମିନିଟ୍) ଓ ସୋନି ବେହେରା (୭୪ ମିନିଟ୍) ଦ୍ବିତୀୟାର୍ଦ୍ଧରେ ଏଗୁଡ଼ିକୁ ଶୁଝି ଦେଇଥିଲେ। ଖେଳ ଶେଷ ହେବାର ୫ ମିନିଟ୍ ପୂର୍ବରୁ ପ୍ରତିମା ନାୟକ ନିର୍ଣ୍ଣାୟକ ଗୋଲ୍ ଦେଇ ସ୍ପୋର୍ଟ୍ସ ଓଡ଼ିଶାକୁ ଜିତାଇଥିଲେ।