ମାଞ୍ଚେଷ୍ଟର: ଆଇସିସି ବିଶ୍ୱକପ ୨୦୧୯ର ସବୁଠାରୁ ବଡ ମୁକାବିଲା ରବିବାର ଦିନ ମାଞ୍ଚେଷ୍ଟରରେ ଖେଳାଯାଇଥିଲା | ଭାରତ ଓ ପାକିସ୍ତାନ ମଧ୍ୟରେ ଖେଳାଯାଇଥିବା ଏହି ମ୍ୟାଚ ଉପରେ ସାରା ବିଶ୍ୱର ନଜର ରହିଥିଲା | ତେବେ ଏହି ମ୍ୟାଚରେ ଭାରତ କେବଳ ବିଜୟ ହାସଲ କରିନଥିଲା ବରଂ ଏକ ବିଶାଳ ରନ ପାହାଡ଼ ମଧ୍ୟ ଠିଆ କରିଥିଲା | ତେବେ ଏବେ ଏମିତି କିଛି ଫଟୋ ଭାଇରଲ ହୋଇଛି ଯାହାକୁ ନେଇ ପାକିସ୍ତାନ ପ୍ରଶଂସକ ଉତକ୍ଷିପ୍ତ ହୋଇଯାଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ଭାରତ ସହ ମ୍ୟାଚ ପୂର୍ବରୁ ପାକିସ୍ତାନ ଖେଳାଳିଙ୍କ କିଛି ଭିଡିଓ ସାମ୍ନାକୁ ଆସିଛି ଯାହାକୁ ନେଇ ପାକିସ୍ତାନ କ୍ରୀଡ଼ାପ୍ରେମୀ ଖୋଲାଖୋଲି କହିଛନ୍ତି ଯେ ପାକିସ୍ତାନ ତ ହାରିବାର ଥିଲା | ଏହି ଭିଡିଓରେ ଦେଖିବାକୁ ମିଳିଛି ଯେ ଭାରତ ସହ ମ୍ୟାଚ ପୂର୍ବରୁ ପାକିସ୍ତାନ କ୍ରିକେଟର ପ୍ରସିଦ୍ଧ ସୀସା କାଫେରେ ବିଳମ୍ବିତ ରାତି ଯାଏଁ ପାର୍ଟି କରୁଥିଲେ | ଏଥିରେ ପାକିସ୍ତାନ ଖେଳାଳିଙ୍କ ସହ ତାଙ୍କ ପରିବାର ବର୍ଗ ମଧ୍ୟ ସାମିଲ ହୋଇଥିଲେ | ଏଥିରେ ପାକିସ୍ତାନ କ୍ରିକେଟର ସୋଏବ ମଲ୍ଲିକ ଓ ତାଙ୍କ ପତ୍ନୀ ତଥା ଭାରତୀୟ ଟେନିସ ତାରକା ସାନିଆ ମିର୍ଜା ମଧ୍ୟ ନଜର ଆସିଛନ୍ତି |
ସେହିପରି ଏହି ଚିତ୍ରରେ ପାକିସ୍ତାନୀ ଖେଳାଳି ହୁକ୍କା ସେବନ କରୁଥିବାର ମଧ୍ୟ ଦେଖିବାକୁ ମିଳିଛି | ଏହାକୁ ନେଇ ପାକିସ୍ତାନ କ୍ରୀଡ଼ାପ୍ରେମୀ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି | ସେମାନଙ୍କ କହିବା କଥା ଭାରତ ସହ ମୁକାବିଲା ପୂର୍ବରୁ ଅଭ୍ୟାସ ନ କରି କିଭଳି କାଫେରେ ପାର୍ଟି କରୁଥିଲେ | ଏହି ଭିଡିଓ ଭାଇରଲ ହେବା ପରେ ସାନିଆ ଆପତ୍ତି ଉଠାଇଛନ୍ତି | ସେ ଟ୍ୱିଟ କରି କହିଛନ୍ତି ଯେ ଏହି ଭିଡିଓ ତାଙ୍କ ଅଜାଣତରେ ସୁଟିଂ କରାଯାଇଛି, ଯାହାକି ତାଙ୍କ ବ୍ୟକ୍ତିଗତ ଜୀବନରେ ଦଖଲ ଭଳି ହୋଇଛି |