ପ୍ରଥମ ଟି-୨୦ ଜିତିଲା ପାକିସ୍ତାନ
ରାୱଲପିଣ୍ଡି: ଜିମ୍ବାୱେ ବିପକ୍ଷ ପ୍ରଥମ ଟି-୨୦ ମ୍ୟାଚ୍କୁ ଘରୋଇ ପାକିସ୍ତାନ ୬ ୱିକେଟରେ ଜିତିନେଇଛି। ଏଥି ସହିତ ୩ ମ୍ୟାଚ୍ ଶୃଙ୍ଖଳାରେ ୧-୦ରେ ଆଗୁଆ ହୋଇଛି। ଜିମ୍ବାୱେ ୧୫୬ ରନ୍ କରିଥିବା ବେଳେ ପାକିସ୍ତାନ ଏହାକୁ ୭ ବଲ୍ ପୂର୍ବରୁ ୪ ୱିକେଟ୍ ହରାଇ ଅତିକ୍ରମ କରିଯାଇଥିଲା। ପ୍ରଥମେ ବ୍ୟାଟିଂ କରିଥିବା ଜିମ୍ବାୱେ ୱେସଲେ ମାଦଭେର୍ (୭୦*, ୪୮ ବଲ୍, ୯ ଚୌକା, ୧ ଛକା)ଙ୍କ ଦ୍ରୁତ ଅର୍ଧଶତକ ସତ୍ତ୍ବେ ୧୫୬/୬ରେ ସୀମିତ ରହିଥିଲା। ଭ୍ରମଣକାରୀ ଦଳ ପକ୍ଷରୁ ବ୍ରେଣ୍ଡନ୍ ଟେଲର୍ (୨୦, ୧୩ ବଲ), ସିନ୍ ୱିଲିୟମସ୍ (୨୫, ୨୪ ବଲ୍), ଚିଗୁମ୍ବୁରା (୨୧*, ୧୩ ବଲ) ମଧ୍ୟ ଉପଯୋଗୀ ଅବଦାନ ରଖିଥିଲେ। ପାକିସ୍ତାନ ପକ୍ଷରୁ ହାରିସ୍ ରାଉଫ୍ (୪-୦-୨୫-୨), ୱାହାବ ରିଆଜ (୪-୦-୩୭-୨), ଉସମାନ କାଦିର୍ (୩-୦-୨୪-୧) ପ୍ରଭାବୀ ବୋଲିଂ କରିଥିଲେ। ଜବାବରେ ବାବର ଆଜମ୍ (୮୨, ୫୫ ବଲ) ଏବଂ ମହମ୍ମଦ ହାଫିଜ୍ (୩୬, ୩୨ ବଲ୍)ଙ୍କ ସହାୟତାରେ ପାକିସ୍ତାନ ଅନାୟାସରେ ବିଜୟ ଲକ୍ଷ୍ୟରେ ପହଞ୍ଚିଯାଇଥିଲା। ଜିମ୍ବାୱେ ପକ୍ଷରୁ ମୁଜାରାବନି (୩.୫-୦-୨୬-୨) ସଫଳ ବୋଲର ଥିଲେ। ୭ ଜଣ ବୋଲରଙ୍କୁ ଉପଯୋଗ କରିବା ସତ୍ତ୍ବେ ପାକିସ୍ତାନ ୧୮.୫ ଓଭରରେ ୪ ୱିକେଟ୍ ବିନିମୟରେ ୧୫୭ ରନ୍ ସଂଗ୍ରହ କରି ନେଇଥିଲା। ଅର୍ଧଶତକୀୟ ପାଳି ପାଇଁ ବାବର ଆଜମ୍ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ରିଆଜଙ୍କୁ ଚେତାବନୀ
ଶନିବାରର ଜିମ୍ବାୱେ ବିପକ୍ଷ ପ୍ରଥମ ଟି-୨୦ ବେଳେ କୋଭିଡ୍-୧୯ ନିୟମ ଉଲ୍ଲଂଘନ କରିଥିବାରୁ ପାକିସ୍ତାନର ଅଭିଜ୍ଞ ବାମହାତୀ ଦ୍ରୁତ ବୋଲର ୱାହାବ୍ ରିଆଜଙ୍କୁ ଚେତାବନୀ ଦିଆଯାଇଛି। ମ୍ୟାଚ୍ର ଏକାଦଶ ଓଭରରେ ରିଆଜ ବୋଲିଂ କରିବା ବେଳେ ବଲରେ ଲାଳ ବୋଳୁଥିବାର ଦେଖିବାକୁ ମିଳିଥିଲା। ଅମ୍ପାୟାର୍ ଅଲିମ୍ ଦର ଓ ଅସିଆ ୟାକୁବ୍ ଏହାକୁ ନଜର କରିବା ପରେ ବଲ୍କୁ ପଡ଼ିଆ ବାହାରକୁ ପଠାଇବାକୁ କହିଥିଲେ। ଗତ ଅଗଷ୍ଟ ମାସରେ ଇଂଲଣ୍ଡ ବିପକ୍ଷ ପ୍ରଥମ ଟି-୨୦ ବେଳେ ମଧ୍ୟ ସମାନ ଭୁଲ କରିଥିବାରୁ ଚେତାବନୀ ପାଇଥିଲେ। ଆଇସିସି ନିୟମ ଅନୁସାରେ ତିନିଟି ଚେତାବନୀ ପରେ ଦଣ୍ଡସ୍ବରୂପ କ୍ଷେତ୍ରରକ୍ଷଣ କରୁଥିବା ଦଳକୁ ୫ ରନ୍ ପ୍ରଦାନ କରାଯିବ।
ଚିଗୁମ୍ବୁରାଙ୍କ ଅବସର
ଚଳିତ ପାକିସ୍ତାନ ବିପକ୍ଷ ୩ ମ୍ୟାଚ୍ ଟି-୨୦ ଶୃଙ୍ଖଳା ପରେ ଜିମ୍ବାୱେର ଅନ୍ୟତମ ସଫଳ ଅଲରାଉଣ୍ଡର୍ ଏଲଟନ୍ ଚିଗୁମ୍ବରା ଅବସର ନେଇଯିବେ। ୩୫ ବର୍ଷୀୟ ଏହି ପୂର୍ବତନ ଅଧିନାୟକ ଜିମ୍ବାୱେ ପାଇଁ ୧୪ ଟେଷ୍ଟ, ୨୧୩ ଦିନିକିଆ ଏବଂ ୫୫ ଟି-୨୦ ଖେଳିଛନ୍ତି। ଏହି ୩ ଫର୍ମାଟରେ ସେ ଯଥାକ୍ରମେ ୨୧, ୧୦୧, ୧୬ ୱିକେଟ୍ ନେଇଛନ୍ତି। ଫ୍ଲାୱାର ଭ୍ରାତା ଆଣ୍ଡି ଓ ଗ୍ରାଣ୍ଟଙ୍କ ପରେ ସର୍ବାଧିକ ଦିନିକିଆ ଖେଳାଳି ଥିଲେ। ନିଜ ଖେଳ ଜୀବନର ଶେଷ ଭାଗରେ ଜଣେ ଆଗଧାଡିର ବ୍ୟାଟସମ୍ୟାନ୍ ପାଲଟିଥିଲେ ଏହି ମଧ୍ୟମଗତି ବୋଲର।