ଶୁକ୍ରବାର ପାକ୍ ହାରେ ନାହିଁ ବୋଲି ଲେଖିଥିଲେ ଅଭିନେତ୍ରୀ, ଅଷ୍ଟ୍ରେଲିଆଠାରୁ ପାକିସ୍ତାନ ହାରିବା ପରେ ହେଲେ ଟ୍ରୋଲ

ନୂଆଦିଲ୍ଲୀ: ଶୁକ୍ରବାର ବେଙ୍ଗାଲୁରୁର ଏମ.ଚିନ୍ନାସ୍ବାମୀ ଷ୍ଟାଡିୟମଠାରେ ଖେଳାଯାଇଥିବା ଆଇସିସି ବିଶ୍ବକପ ମ୍ୟାଚରେ ପାକିସ୍ତାନକୁ ୬୨ ରନରେ ହରାଇଥିଲା ଅଷ୍ଟ୍ରେଲିଆ । ଅଷ୍ଟ୍ରେଲିଆ ଦ୍ବାରା ରଖାଯାଇଥିବା ୩୬୮ ରନ ଲକ୍ଷ୍ୟ ଜବାବରେ ପାକିସ୍ତାନ ୪୫.୩ ଓଭରରେ ୩୦୫ ରନ କରି ଅଲଆଉଟ ହୋଇଯାଇଥିଲା । ପାକିସ୍ତାନ ହାରିବା ପରେ ଅଭିନେତ୍ରୀ ସେହେର ସିନୱାରୀ କରିଥିବା ପୋଷ୍ଟ ଏବେ ଭାଇରାଲ ହେବାରେ ଲାଗିଛି।

ପାକ୍ ଅଭିନେତ୍ରୀ ସେହେର ପାକିସ୍ତାନ-ଅଷ୍ଟ୍ରେଲିଆ ମ୍ୟାଚ୍ ସମୟରେ ଏକ୍ସରେ ଏକ ପୋଷ୍ଟ କରିଥିଲେ। ପୋଷ୍ଟରେ ଲେଖାଥିଲା ଯେ, ପାକିସ୍ତାନ ଶୁକ୍ରବାର ମ୍ୟାଚ୍ ହାରେ ନାହିଁ। ତାଙ୍କର ଏଭଳି ପୋଷ୍ଟ ପରେ ପାକିସ୍ତାନ ହାରିଯିବାରୁ ଏବେ ତାଙ୍କୁ ଟ୍ରୋଲ କରାଯାଇଛି।

‌ଜଣେ ବ୍ୟବହାରକାରୀ ଲେଖିଛନ୍ତି ଯେ, ପ୍ରଥମେ ବାଂଲାଦେଶ ଭାରତକୁ ହରାଉ ବୋଲି ତୁମେ ଚାହୁଥିଲ, ହେଲେ ତାହା ହେଲା ନାହିଁ। ପରେ ପାକିସ୍ତାନ, ଅଷ୍ଟ୍ରେଲିଆକୁ ହରାଇବ ବୋଲି କହିଲ, ତାହା ବି ହେଲା ନାହିଁ। କେତେ ଥର ଲୋକଙ୍କ ନଜରରେ ତଳକୁ ଖସିବ। ଆତ୍ମସମ୍ମାନ ଅଛି ନା ନାହିଁ। ଏହା ସହ ଅନ୍ୟମାନେ ବି ତାଙ୍କୁ ଟ୍ରୋଲ କରିଥିବା ଦେଖାଯାଇଛି।

ଭାରତ-ବାଂଲାଦେଶ ମ୍ୟାଚ୍ ପୂର୍ବରୁ ସେ‌ହେର ଏକ୍ସରେ ପୋଷ୍ଟ କରି ବାଂଲାଦେଶ ଖେଳାଳିଙ୍କୁ କହିଥିଲେ ଯେ ଯଦି ସେମାନେ ପରବର୍ତ୍ତୀ ମ୍ୟାଚରେ ଭାରତକୁ ପରାସ୍ତ କରନ୍ତି, ତେବେ ଅଭିନେତ୍ରୀ ସେମାନଙ୍କ ସହ ‘ଡିନର ଡେଟ’ରେ ଯିବେ ଓ ମାଛ ଖାଇବେ। ହେଲେ ତାଙ୍କ ଇଚ୍ଛା ପୂରଣ ହୋଇନଥିଲା। କାରଣ ଭାରତ, ବାଂଲାଦେଶକୁ ହରାଇଥିଲା।