ସେଣ୍ଟ୍ କିଟ୍ସ : ସେଣ୍ଟ୍ କିଟ୍ସ ଏବଂ ନେଭିସ ପାଟ୍ରିଅଟ୍ସ ଚଳିତ କାରବିଆନ୍ ପ୍ରିମିୟର ଲିଗ୍ (ସିପିଏଲ୍)ରେ ବିଜେତା ହୋଇଛି। ଫାଇନାଲ୍ରେ ଏହି ଦଳ ୩ ୱିକେଟ୍ରେ ସେଣ୍ଟ୍ ଲୁସିଆ କିଙ୍ଗ୍ସକୁ ହରାଇଦେଇଛି। କିଙ୍ଗ୍ସ ଦଳ ୭ ୱିକେଟ୍ରେ ୧୫୯ ରନ୍ କରିଥିଲା। ରାହକିମ୍ କର୍ନୱାଲ ଓ ରସ୍ତନ ଚେଜ୍ ୪୩ ରନ୍ ଲେଖାଏଁ ଏବଂ କିମୋ ପଲ୍ ୩୯ ରନ୍ କରିଥିଲେ। ପାଟ୍ରିଅଟ୍ସ ପକ୍ଷରୁ ଫୱାଦ ଅହମ୍ମଦ ଓ ନସିମ ଶାହ ୨ ଲେଖାଏଁ ୱିକେଟ୍ ନେଇଥିଲେ। ଜବାବରେ ପାଟ୍ରିଅଟ୍ସ ୭ ୱିକେଟ ହରାଇ ଶେଷ ବଲ୍ରେ ଚୌକା ସହ ବିଜୟ ମୁଣ୍ଡି ମାରିଥିଲା। ଡୋମିନିକ୍ ଡ୍ରାକସ ଅପରାଜିତ ୪୮ ରନ୍ (୨୪ ବଲ୍) କରିଥିଲା ବେଳେ ଜୋସୁଆ ଡା’ସିଲ୍ଭା ୩୭, ସେର୍ଫାନେ ରଦରଫର୍ଡ ୨୫ ଓ ଫାବିଅନ୍ ଅଲିନ ୨୦ ରନ୍ କରିଥିଲେ। କିଙ୍ଗ୍ସ ପକ୍ଷରୁ ୱାହବ ରିଆଜ ୨ ୱିକେଟ୍ ଅକ୍ତିଆର କରିଥିଲେ। ଡ୍ରାକ୍ସ ଫାଇନାଲ୍ର ଏବଂ ଚେଜ୍ ପ୍ରତିଯୋଗିତାର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
୫୦୦ ମ୍ୟାଚ୍ ଖେଳିବାରେ ବ୍ରାଭୋ ଦ୍ବିତୀୟ
ସାଥୀ ଖେଳାଳି କିରଣ ପୋଲାର୍ଡଙ୍କ ପରେ ଦ୍ବିତୀୟ ଖେଳାଳି ଭାବେ ୫୦୦ ଟ୍ବେଣ୍ଟି-୨୦ ମ୍ୟାଚ୍ ଖେଳିଛନ୍ତି ୱେଷ୍ଟଇଣ୍ଡିଜ୍ ଅଲ୍ରାଉଣ୍ଡର ଡ୍ବେନ୍ ବ୍ରାଭୋ। ସେଣ୍ଟ୍ କିଟ୍ସ ଓ ନେଭିସ୍ ପାଟ୍ରିଅଟ୍ସ ବିପକ୍ଷ କାରବିୟାନ୍ ପ୍ରିମିୟର୍ ଲିଗ୍ ଫାଇନାଲ୍ ଖେଳି ଏହି କୀର୍ତ୍ତିମାନ କରିଛନ୍ତି ସେ। ୨୦୦୬ ମସିହାରେ ଟ୍ବେଣ୍ଟି-୨୦ ପଦାର୍ପଣ କରିବା ପରେ ବ୍ରାଭୋ ସାରା ବିଶ୍ବର ପ୍ରତିଷ୍ଠିତ ଟ୍ବେଣ୍ଟି-୨୦ ଲିଗ୍ ଖେଳି ସାରିଛନ୍ତି। ଆଇପିଏଲ୍ରେ ଚେନ୍ନାଇ ସୁପରକିଙ୍ଗ୍ସ ଓ ଗୁଜୁରାଟ ଲାୟନ୍ସ ଦଳର ପ୍ରତିନିଧିତ୍ବ କରିଛନ୍ତି ସେ।