ଜାତୀୟ ରୢାଙ୍କିଙ୍ଗ୍‌ ତୀରନ୍ଦାଜି ପାଇଁ ପୂର୍ଣ୍ଣଚନ୍ଦ୍ର ମନୋନୀତ

ଭୁବନେଶ୍ବର: ହାଇଦ୍ରାବାଦର ଗଛିବାୱଲି ଷ୍ଟାଡ‌ିୟମ୍‌ରେ ଚାଲିଥିବା ଜାତୀୟ ରୢାଙ୍କିଙ୍ଗ୍‌ ତୀରନ୍ଦାଜି ପ୍ରତିଯୋଗିତାର କନିଷ୍ଠ ରିକର୍ଭ ବିଭାଗରେ ଅଂଶଗ୍ରହଣ କରିବାକୁ ଓଡ଼ିଶାର ପୂର୍ଣ୍ଣଚନ୍ଦ୍ର ମାଝୀ ମନୋନୀତ ହୋଇଛନ୍ତି। ଦେଶର ଶ୍ରେଷ୍ଠ ୧୬ ଜଣଙ୍କୁ ନେଇ ବରିଷ୍ଠ, କନିଷ୍ଠ ଏବଂ ଉପକନିଷ୍ଠ ବର୍ଗରେ ବର୍ଷକୁ ୪ ଥର ଏହି ପ୍ରତିଯୋଗିତା ଅନୁଷ୍ଠିତ ‌ହୋଇଥାଏ।

କୋରାପୁଟସ୍ଥିତ ସାଇ-ହାଲ୍‌ ତୀରନ୍ଦାଜି ଛାତ୍ରାବାସରେ ରହି ତପନ ମୁର୍ମୁଙ୍କଠାରୁ ପ୍ରଶିକ୍ଷଣ ନେଉଥିବା ପୂର୍ଣ୍ଣଚନ୍ଦ୍ର ସୋମବାର ହାଇଦ୍ରାବାଦ ଗସ୍ତ କରିବେ। ପୂର୍ଣ୍ଣଚନ୍ଦ୍ରଙ୍କୁ ଓଡ଼ିଶା ତୀରନ୍ଦାଜି ସଂଘ ସଭାପତି ଅବସରପ୍ରାପ୍ତ ଆଇଏଏସ୍‌ ଗୋକୁଳ ଚନ୍ଦ୍ର ପତି, ମୁଖ୍ୟ ଉପଦେଷ୍ଠା ଅନ୍ୟତମ ଅବସରପ୍ରାପ୍ତ ମୁଖ୍ୟ ଶାସନ ସଚିବ ଡକ୍ଟର ଅସିତ୍ ତ୍ରିପାଠୀ ଏବଂ ସମ୍ପାଦକ ସମ୍ପୂର୍ଣ୍ଣାନନ୍ଦ ଦାସ ଶୁଭକାମନା ଜଣାଇଛନ୍ତି।