କ୍ଷମା ମାଗିବା ସହ ଦକ୍ଷିଣ ଆଫ୍ରିକା ଦଳକୁ ଫେରିଲେ କ୍ବିଣ୍ଟନ ଡି’କକ୍
ଦୁବାଇ : ପୁଣି ଥରେ ଦକ୍ଷିଣ ଆଫ୍ରିକା ଦଳକୁ ଫେରିଛନ୍ତି କ୍ବିଣ୍ଟନ ଡି’କକ୍ । ଟି୨୦ ବିଶ୍ବକପର ଅବଶିଷ୍ଟ ମ୍ୟାଚ ଗୁଡ଼ିକରେ ସେ ଦକ୍ଷିଣ ଆଫ୍ରିକା ପାଇଁ ଖେଳିବେ । ଦଳକୁ ପ୍ରତ୍ୟାବର୍ତ୍ତନ ସହ ତାଙ୍କୁ ନେଇ ଗତ କିଛି ଦିନ ହେଲା ଚାଲିଥିବା ବିବାଦ ସମ୍ପର୍କରେ ସେ ନିଜର ପକ୍ଷ ରଖିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବର୍ଣ୍ଣବୈଷମ୍ୟ ବିରୋଧୀ ଅଭିଯାନ ‘ବ୍ଲାକ ଲାଇଭ୍ସ ମ୍ୟାଟର’ କୁ ସମର୍ଥନ କରିବାଲାଗି ବିଶ୍ବକପ ମ୍ୟାଚ ପୂର୍ବରୁ ବିଭିନ୍ନ ଦଳର ଖେଳାଳିମାନେ ଆଣ୍ଠେଇ ଲୋକମାନଙ୍କୁ ସଚେତନ କରୁଛନ୍ତି । ଓ୍ବେଷ୍ଟ ଇଣ୍ଡିଜ୍ ବିପକ୍ଷ ମ୍ୟାଚରେ ଦକ୍ଷିଣ ଆଫ୍ରିକା ଦଳ ନିଜ ଖେଳାଳିମାନଙ୍କୁ ଆଣ୍ଠେଇବାକୁ କହିଥିଲା । କିନ୍ତୁ ଏହା କରିବାକୁ ଡି’କକ୍ ମନା କରିଦେଇଥିଲେ । ଏହାକୁ ନେଇ ବିଶ୍ବ କ୍ରିକେଟରେ ବିବାଦ ଦେଖାଦେଇଥିଲା ।
ଏହି ଘଟଣାକୁ ନେଇ ସେ କ୍ଷମା ମାଗିବା ସହ ଏକ ସ୍ପଷ୍ଟୀକରଣ ଦେଇଛନ୍ତି । ସେ କହିଛନ୍ତି ଯେ ଯଦି ଆଣ୍ଠେଇବା ଦ୍ବାରା ଅନ୍ୟମାନେ ସଚେତନ ହେବେ ସେ ଆଣ୍ଠେଇବାକୁ ପ୍ରସ୍ତୁତ ଅଛନ୍ତି । କିନ୍ତୁ ଯେଉଁଭଳି ଭାବରେ ତାଙ୍କ କ୍ରିକେଟ ବୋର୍ଡ ପକ୍ଷରୁ ଏହା କରିବାକୁ କୁହାଗଲା ସେ ସେଥିପାଇଁ ପ୍ରସ୍ତୁତ ନଥିଲେ । ଦୂନିଆରେ ସମସ୍ତଙ୍କ ସମାନ ଅଧିକାର ଅଛି । କିନ୍ତୁ ଏହା କରିବାକୁ ଯେପରି ଭାବେ କୁହାଗଲା ତାହା ତାଙ୍କ ଅଧିକାରର ହନନ ବୋଲି ସେ ଭାବୁଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ ତାଙ୍କ ନିଜ ପରିବାରରେ ବି କୃଷ୍ଣକାୟ ସଦସ୍ୟ ଅଛନ୍ତି । ତାଙ୍କ ସାବତ ମା ଓ ଭଉଣୀମାନେ କୃଷ୍ଣକାୟ । ଏଣୁ ସମସ୍ତଙ୍କୁ ସମ୍ମାନ କରିବା ସେ ପିଲାବେଳୁ ଶିଖିଛନ୍ତି ।