ଆଇପିଏଲ : ମୁମ୍ବାଇକୁ ୨୩ ରନରେ ହରାଇଲା ରାଜସ୍ଥାନ

ମୁମ୍ବାଇ : ସ୍ଥାନୀୟ ଡିଓ୍ବାଇ ପାଟିଲ କ୍ରିକେଟ ଷ୍ଟାଡିୟମଠାରେ ଚାଲିଥିବା ଆଇପିଏଲ-୨୦୨୨ର ୯ମ ମ୍ୟାଚରେ ରାଜସ୍ଥାନ ମୁମ୍ବାଇକୁ ୨୩ ରନରେ ପରାସ୍ତ କରିଛି । ରାଜସ୍ଥାନ ଦ୍ବାରା ରଖାଯାଇଥିବା ୧୯୪ ରନର ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ମୁମ୍ବାଇ ୧୭୦ ରନ କରିପାରିଥିଲା । ମୁମ୍ବାଇ ପକ୍ଷରୁ ଇଶାନ କିଷନ ୫୪ ରନ ଓ ତିଲକ ବର୍ମା ୬୪ ରନ କରିଥିଲେ । ଶେଷ ବେଳକୁ କିରେନ ପୋଲାର୍ଡ ୨୨ ରନ କରିଥିଲେ ମଧ୍ୟ ତାହା ଯଥେଷ୍ଟ ହୋଇନଥିଲା ।

ରାଜସ୍ଥାନ ଏପର୍ଯ୍ୟନ୍ତ ୨ଟି ମ୍ୟାଚ ଖେଳି ୨ଟି ବିଜୟ ସହ ପଏଣ୍ଟ ଟେବୁଲର ଶୀର୍ଷରେ ରହିଛି । ମାତ୍ର ମୁମ୍ବାଇ ୨ଟି ମ୍ୟାଚ ଖେଳି ୨ଟି ଯାକରେ ପରାଜୟ ବରଣ କରି ପଏଣ୍ଟ ଟେବୁଲର ୯ମ ସ୍ଥାନରେ ରହିଛି ।

ଏହି ମ୍ୟାଚରେ ମୁମ୍ବାଇ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ରାଜସ୍ଥାନ ନିର୍ଦ୍ଧାରିତ ୨୦ ଓଭରରେ ୮ ଓ୍ବିକେଟ ହରାଇ ୧୯୩ ରନ କରିଥିଲା । ତେବେ ଆଜିର ମ୍ୟାଚରେ ଜସ ବଟଲରଙ୍କ ଧମାକା ଦେଖିବାକୁ ମିଳିଥିଲା । ସେ ମାତ୍ର ୬୮ଟି ବଲରୁ ୫ ଛକା ୧୧ ଚୌକା ସହ ୧୦୦ ରନ କରି ରାଜସ୍ଥାନ ପାଇଁ ଏକ ବଡ ସ୍କୋର କରିବାକୁ ସହାୟତା କରିଥିଲେ । ଏହା ଚଳିତ ଆଇପିଏଲର ପ୍ରଥମ ଶତକ । ଅନ୍ୟପକ୍ଷରେ ସିମରନ ହେଟମେୟର ୩୫ ଓ ସଂଜୁ ସାମସନ ୩୦ ରନ କରିଥିଲେ । ମୁମ୍ବାଇ ପକ୍ଷରୁ ଯଶପ୍ରୀତ ବୁମରା ୩ଟି ଓ ଟାଇମାଲ ମିଲ୍ସ ୩ଟି ଓ୍ବିକେଟ ନେଇଥିଲେ ।