ମେ ୯ରେ ହୋଇଥାନ୍ତା ବାହାଘର, ଆରସିବି ଖେଳାଳି ଆହତ ହେବାରୁ ବଦଳି ଗଲା ପ୍ଲାନ

ମୁମ୍ବାଇ: ଆଇପିଏଲ୍ ୨୦୨୨ର ଏଲିମିନେଟର ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳୁଥିବା ରଜତ ପଟିଦାରଙ୍କ ପାଇଁ ଲଖନଉ ବିପକ୍ଷରେ ଆରସିବି ଏହି ମ୍ୟାଚ ଜିତିଥିଲା | ରଜତ ପଟିଦାରଙ୍କ ପରାକ୍ରମୀ ଶତକ ବଳରେ ଲକ୍ଷ୍ନୌ ସୁପର ଜାଏଣ୍ଟସ୍‌କୁ ୧୪ ରନ୍‌ରେ ପରାସ୍ତ କରି ରୟାଲ ଚାଲେଞ୍ଜର୍ସ ବାଙ୍ଗାଲୋର (ଆର୍‌ସିବି) ଚଳିତ ଆଇପିଏଲ୍‌ର ଦ୍ବିତୀୟ କ୍ବାଲିଫାୟର ଖେଳିବାକୁ ଯୋଗ୍ୟତା ଅର୍ଜନ କରିଥିଲା | ସେ ମାତ୍ର ୫୪ ବଲରେ ୧୧୨ ରନ କରିଥିଲେ । ନିଜର ଏହି ଇନିଂସରେ ସେ ୭ଟି ଛକା ଓ ୧୨ଟି ଚୌକା ମାରିଥିଲେ । ଏବେ ରଜତଙ୍କ ବାବଦରେ ଏକ ରୋଚକ କଥା ସାମ୍ନାକୁ ଆସିଛି | ବାସ୍ତବରେ ମେ ୯ରେ ତାଙ୍କର ବାହାଘର ହେବାର ଥିଲା | ଫେବୃଆରୀରେ ହୋଇଥିବା ଆଇପିଏଲ୍ ମେଗା ନିଲାମରେ ୨୮ ବର୍ଷୀୟ ରଜତଙ୍କୁ କେହି କିଣିନଥିଲେ | ଆଉ ଏହି ସମୟରେ ଦେଶରେ କୌଣସି ବଡ଼ କ୍ରିକେଟ୍ ଇଭେଣ୍ଟ ନ ଥିବାରୁ କ୍ରିକେଟରଙ୍କ ପରିବାର ତାଙ୍କ ବିବାହ କରିବାକୁ ଚାହୁଁଥିଲେ |

ତେବେ, ରଜତଙ୍କ ପାଇଁ ଭାଗ୍ୟର ଅନ୍ୟାନ୍ୟ ଯୋଜନା ଥିଲା | ଚଳିତ ଆଇପିଏଲ ସିଜନର କିଛି ମ୍ୟାଚ୍ ପରେ ଆହତ ହୋଇଥିବା ଲଭାନିଥ ସିସୋଡିଆଙ୍କ ସ୍ଥାନରେ ଡାହାଣହାତୀ ବ୍ୟାଟ୍ସମ୍ୟାନ୍ ପଟିଦାରଙ୍କୁ ଆରସିବି ନିଜ ଟିମରେ ସାମିଲ ଦଳରେ ଅନ୍ତର୍ଭୁକ୍ତ କରିଥିଲା। ଆଉ ମଧ୍ୟପ୍ରଦେଶର ଏହି ବ୍ୟାଟ୍ସମ୍ୟାନ୍ ନିରାଶ ନହୋଇ ସୁଯୋଗର ଫାଇଦା ଉଠାଇଥିଲେ ।

ରଜତଙ୍କ ପିତା ମନୋହର ପଟିଦାର କହିଛନ୍ତି, "ମେ ୯ ରେ ତାଙ୍କର ବିବାହ କରିବା ପାଇଁ ଯୋଜନା ଥିଲା। ଏକ ଛୋଟ ସମାରୋହ ହେବାକୁ ଥିଲା ଏବଂ ମୁଁ ଏଥିପାଇଁ ଇନ୍ଦୋରରେ ଏକ ହୋଟେଲ ବୁକ୍ କରିଥିଲି। ଯେହେତୁ ତାଙ୍କୁ ଡାକରା ଆସିଲା ତେଣୁ ସେ ମ୍ୟାଚ ଖେଳିବାକୁ ଗଲେ । ଆଉ ଆମେ ବିବାହ ତାରିଖ ଘୁଞ୍ଚାଇଦେଇଛୁ | ବର୍ତ୍ତମାନ ଜୁଲାଇରେ ତାଙ୍କର ବାହାଘର ହେବ | ଜୁଲାଇରେ ବିବାହ ଉତ୍ସବ ଆୟୋଜନ କରିବାକୁ ଯୋଜନା କରୁଥିବାରୁ ସୀମିତ ଅତିଥିମାନଙ୍କ ପାଇଁ ମୁଁ ଏକ ହୋଟେଲ ବୁକ୍ କରିସାରିଛି।" ପଟିଦାର ଆଇପିଏଲ୍ ୨୦୨୨ରେ ଆରସିବି ପାଇଁ ଆକ୍ରମଣାତ୍ମକ କ୍ରିକେଟ୍ ଖେଳିଛନ୍ତି | ରଜତ ଆରସିବି ପାଇଁ ୭ଟି ମ୍ୟାଚରେ ୨୭୫ ରନ୍ ସଂଗ୍ରହ କରିଛନ୍ତି |