ଆଇପିଏଲ-୧୩ : ଚେନ୍ନାଇକୁ ୧୬ ରନ୍ରେ ପରାସ୍ତ କଲା ରାଜସ୍ଥାନ ରୟାଲ୍ସ
ସାରଜା: ୟୁଏଇର ସାରଜା କ୍ରିକେଟ ଷ୍ଟାଡିୟମଠାରେ ଖେଲାଯାଇଥିବା ଆଇପିଏଲ୍ ୨୦୨୦ର ୪ର୍ଥ ମ୍ୟାଚରେ ଚେନ୍ନାଇକୁ ୧୬ ରନ୍ରେ ପରାସ୍ତ କଲା ରାଜସ୍ଥାନ ରୟାଲ୍ସ । ଦ୍ବିତୀୟ ପାଳିରେ ୨୧୭ ରନ୍ର ବିଶାଳ ଲକ୍ଷ୍ୟକୁ ପିଛାକରି ଚେନ୍ନାଇ ୨୦ ଓଭରରେ ୦୬ ୱିକେଟ ହରାଇ ୨୦୦ ରନ୍ କରିବାରେ ସକ୍ଷମ ହୋଇଥିଲା । ରାଜସ୍ଥାନ ରୟାଲ୍ସ ପକ୍ଷରୁ ରାହୁଲ ତେୱତିଆ ୩ଟି ୱିକେଟ ନେଇଥିବା ବେଳେ ଶ୍ରେୟସ୍ ଗୋପାଳ ୧ ୱିକେଟ ନେଇଛନ୍ତି । ଏକ ବିସ୍ଫୋରକ ଇନିଂସ ଖେଳିଥିବା ରାଜସ୍ଥାନ ରୟାଲସର ବ୍ୟାଟସମ୍ୟାନ୍ ସଞ୍ଜୁ ସାମସନ ମ୍ୟାନ୍ ଅଫ ଦି ମ୍ୟାଚ ପୁରସ୍କାର ଜିଣିଥିଲେ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପଟେ ଚେନ୍ନାଇ ୨୧୭ ରନ୍ର ଲକ୍ଷ୍ୟକୁ ପୂରା କରିବା ପାଇଁ ପଡିଆକୁ ସେନ ୱାଟସନ ଓ ମୁରଲି ମୁରଲୀ ବିଜୟ ଓହ୍ଲାଇଥିଲେ । ପ୍ରଥମରୁ ଉଭୟ ବ୍ୟାଟ୍ସମ୍ୟାନ ଭଲ ବ୍ୟାଟିଂ କରିଥିଲେ ମଧ୍ୟ ୬.୪ ଓଭରରେ ୱାଟସନ ୨୧ ବଲରେ ୩୩ ରନ୍ କରି ତେୱତିଆଙ୍କ ଶିକାର ହୋଇଥିଲେ । ଫାଫ୍ ଡୁପ୍ଲେସିସ୍ ୩୭ ବଲ ଖେଳି ୭୨ ରନ୍ କରି ଦଳକୁ ଜିତାଇବା ପାଇଁ ଶେଷ ପର୍ଯନ୍ତ ଲଢିଥିଲେ କିନ୍ତୁ ମ୍ୟାଚକୁ ଜିତାଇ ପାରି ନଥିଲେ । ଅନ୍ୟପଟେ ଧୋନୀଙ୍କ ବ୍ୟାଟରୁ ଛକା ଚଉକା ଦେଖିବା ପାଇଁ ଦର୍ଶକ ଆଶା ରଖିଥିଲେ କିନ୍ତୁ ଧୋନୀ ଶେଷ ଓଭରେ ୩ଟି ଛକା ମାରି ୨୯ ରନ୍ କରିବାରେ ସକ୍ଷମ ହୋଇଥିଲେ ।
ପୂର୍ବରୁ ଚେନ୍ନାଇ ଟସ ଜିଣି ରାଜସ୍ଥାନକୁ ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ । ଦଳ ପ୍ରଥମରୁ ଯୁବ ଓପନର ଯଶସ୍ୱୀ ଜୟସ୍ୱାଲଙ୍କୁ ହରାଇଥିଲା । ସେ ମାତ୍ର ୬ ରନ କରି ଆଉଟ ହୋଇଥିଲେ । ତେବେ ଅଧିନାୟକ ଷ୍ଟିଭ ସ୍ମିଥ ଓ ସଂଜୁ ସାମସନ ବିସ୍ଫୋରକ ବ୍ୟାଟିଂ କରି ଦଳକୁ ଏକ ମଜବୁତ ସ୍ଥିତିକୁ ଆଣିଥିଲେ । ସାମସନ ଏକ ବିସ୍ଫୋରକ ଇନିଂସ ଖେଳି ମାତ୍ର ୩୨ଟି ବଲ ଖେଳି ୯ ଛକା ଓ ଗୋଟିଏ ଚୌକା ସହ ୭୪ ରନ କରିଥିଲେ । ସ୍ମିଥ ମଧ୍ୟ ୪୭ ବଲ ଖେଳି ୬୯ ରନ ସଂଗ୍ରହ କରିଥିଲେ । ତେବେ ମ୍ୟାଚ ଶେଷ ଓଭରରେ ଜୋଫ୍ରା ଆର୍ଚରଙ୍କ ଆତସବାଜି ଦେଖିବାକୁ ମିଳିଥିଲା । ସେ ମାତ୍ର ୮ ଟି ବଲ ଖେଳି ୪ ଛକା ସହ ୨୭ ରନ କରିଥିଲେ । ଏହାଫଳରେ ରାଜସ୍ଥାନ ୨୦ ଓଭରରେ ୭ ଓ୍ଵିକେଟ ହରାଇ ୨୧୬ ରନ ସଂଗ୍ରହ କରିପାରିଥିଲା ।