ଆଇପିଏଲ ଦେଖିବାକୁ ଗାଙ୍ଗୁଲି ଡାକିଥିଲେ, ତଥାପି ମୁଁ ଗଲି ନାହିଁ: ରମିଜ ରାଜା
କରାଚୀ : ଆଇପିଏଲ୍ର ସମ୍ପ୍ରସାରିତ ଋତୁ ପାଇଁ ବିସିସିଆଇକୁ ଅଢ଼େଇ ମାସର ଗବାକ୍ଷ ମିଳିବାକୁ ଥିବାରୁ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଏହାକୁ ବିରୋଧ କରିଥିଲା । ଅଦ୍ୟାବଧି ଆଇପିଏଲ୍ ପାଇଁ ସମ୍ପ୍ରସାରିତ ଗବାକ୍ଷକୁ ଅନୁମତି ମିଳିନାହିଁ। ଏହାକୁ ମୁଁ ଦୃଢ଼ଦାର ସହ ବିରୋଧ କରିବି ବୋଲି ପିସିବିର ଅଧ୍ୟକ୍ଷ ରମିଜ ରାଜା କହିଥିଲେ। ଆଇସିସିର ୨୦୨୪-୨୦୩୧ ଏଫଟିପି ଚକ୍ର ପାଇଁ ସଂପ୍ରସାରିତ ଗବାକ୍ଷ ଦେବାକୁ ବିସିସିଆଇ ଯୋଜନା କରିଥିବା କିଛି ଦିନ ତଳେ ସମ୍ପାଦକ ଜୟ ସାହା ପ୍ରକାଶ କରିବା ପରେ ରମିଜ ଏଭଳି ସ୍ବର ଉଠାଇଥିଲେ । ତେବେ ଆଇପିଏଲକୁ ନେଇ ରମିଜ କହିଛନ୍ତି ଯେ ବିସିସିଆଇ ସଭାପତି ସୌରଭ ଗାଙ୍ଗୁଲି ତାଙ୍କୁ ଆଇପିଏଲ ଦେଖିବା ପାଇଁ ଦୁଇଥର ଡାକିଥିଲେ ମଧ୍ୟ ସେ ଯାଇ ନଥିଲେ। ସେ (ଗାଙ୍ଗୁଲି) ମୋତେ ଦୁଇଥର ଆଇପିଏଲ ପାଇଁ ନିମନ୍ତ୍ରଣ କରିଥିଲେ, ଥରେ ଦୁବାଇରେ ଏବଂ ଏଥର ବି ଡାକିଥିଲେ । କିନ୍ତୁ ମୁଁ ଗଲି ନାହିଁ। କାରଣ ମୁଁ ଭାବିଲି ଯଦି ମୁଁ ଯାଏ, ମୋର ପ୍ରଶଂସକମାନେ ମୋତେ କ୍ଷମା କରିବେ ନାହିଁ | ଯଦିଓ ମୁଁ କ୍ରିକେଟ୍ ମ୍ୟାଚ ଦେଖିବାକୁ ଯାଇଥାନ୍ତି, କିନ୍ତୁ ଏହା ମୋର ପ୍ରଶଂସକଙ୍କ ବାଧିଥାନ୍ତା |
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ୨୦୧୨ ଠାରୁ ଭାରତ ଏବଂ ପାକିସ୍ଥାନ ମଧ୍ୟରେ କୌଣସି ଦ୍ୱିପାକ୍ଷିକ ସିରିଜ୍ ହୋଇନାହିଁ | ପାକିସ୍ତାନ କ୍ରିକେଟ୍ ବୋର୍ଡ ଭାରତ ବିପକ୍ଷରେ ଅନେକ ଥର ଖେଳିବାକୁ ଇଚ୍ଛା ପ୍ରକାଶ କରିଥିଲା କିନ୍ତୁ କୌଣସି ସଫଳତା ମିଳିପାରିନାହିଁ | ନିକଟରେ ହୋଇଥିବା ଆଇସିସି ବୈଠକରେ ଭାରତ, ପାକିସ୍ତାନ, ଇଂଲଣ୍ଡ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ସିରିଜ ବିଷୟରେ ମଧ୍ୟ ରମିଜ ଆଲୋଚନା କରିଥିଲେ | କିନ୍ତୁ ତାଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରାଯାଇଥିଲା। କିନ୍ତୁ ପିସିବି ମୁଖ୍ୟ ରମିଜ ରାଜା ଭାରତ ସହ ସମ୍ପର୍କ ସୁଦୃଢ କରିବାରେ ଲାଗିଛନ୍ତି। ସେ କହିଛନ୍ତି ଯେ ଏହା ଏକ ରାଜନୈତିକ ପ୍ରସଙ୍ଗ, ଯେଉଁଥିପାଇଁ ଏତେ ସମୟ ଲାଗୁଛି, ଯଦି କ୍ରିକେଟ୍ ସହ ଜଡିତ ଏକ ସମସ୍ୟା ଥାନ୍ତା, ତେବେ ସେ ଏହାକୁ ଦୁଇ ମିନିଟରେ ସମାଧାନ କରିଦେଇପାରନ୍ତେ।