ରଣଜୀ ଟ୍ରଫି: ସ୍ବସ୍ତିକଙ୍କ ଶତକ ସତ୍ତ୍ବେ ସୁଯୋଗ ହାତଛଡ଼ା

ଭୁବନେଶ୍ବର: ଚଳିତ ରଣଜୀ ଟ୍ରଫିରେ ଲଗାତାର ଦୁଇ ପରାଜୟ ପରେ ଓଡ଼ିଶା ପ୍ରଥମ ଥର ପାଳି ଅଗ୍ରଣୀ ପାଇଛି। ବାରବାଟୀ ଷ୍ଟାଡିୟମ୍‌ରେ ଚାଲିଥିବା ରଣଜୀ ଟ୍ରଫି ଏଲିଟ୍‌ ଗ୍ରୁପ୍‌-ଏ’ ମ୍ୟାଚ୍‌ରେ ମହାରାଷ୍ଟ୍ର ବିପକ୍ଷରେ ଓଡ଼ିଶା ପ୍ରଥମ ପାଳିରେ ମହତ୍ତ୍ବପୂର୍ଣ୍ଣ ୩୮ ରନ୍‌ର ଅଗ୍ରଣୀ ପାଇଛି। ସ୍ବସ୍ତିକ ସାମଲଙ୍କ ପ୍ରଥମ ଶତକ ସହାୟତାରେ ଓଡ଼ିଶା ଦ୍ବିତୀୟ ଦିନରେ ୨୦୦ ରନ୍‌ କରିବା ପରେ ଅଲ୍‌ଆଉଟ୍‌ ହୋଇଥିଲା। ଷ୍ଟମ୍ପ୍ସ ବେଳକୁ ମହାରାଷ୍ଟ୍ର ଦ୍ବିତୀୟ ପାଳିରେ ୩ ୱିକେଟ୍‌ ହରାଇ ୭୮ ରନ୍‌ ସଂଗ୍ରହ କରିଛି। ଫଳରେ ଭ୍ରମଣକାରୀ ଦଳ ଏବେ ୪୦ ରନ୍‌ରେ ଆଗୁଆ ହୋଇଛି।

ପ୍ରଥମ ଦିନରେ ଓଡ଼ିଶା ବ୍ୟାଟିଂକୁ ସମ୍ଭାଳି ନେଇଥିବା ଦୁଇ ବ୍ୟାଟର୍‌ ସ୍ବସ୍ତିକ ଓ ସନ୍ଦୀପ ପଟ୍ଟନାୟକ ଦ୍ବିତୀୟ ଦିନରେ କିନ୍ତୁ ବିଫଳ ହୋଇଥିଲେ। ଦିନର ପ୍ରଥମ ବଲ୍‌ରେ ସନ୍ଦୀପ ଆଉଟ୍‌ ହେବାରୁ ଘରୋଇ ଦଳକୁ ବଡ଼ ଝଟ୍‌କା ଲାଗିଥିଲା। ଏହା ପରଠୁ କେବଳ ଆଶୀର୍ବାଦ ସ୍ବାଇଁ (୧୫) ଓ ରାଜେଶ ଧୂପର (୧୧) ଦୁଇ ଅଙ୍କରେ ପହଞ୍ଚିପାରିଥିଲେ। ମଧ୍ୟାହ୍ନଭୋଜନ ସୁଦ୍ଧା ଓଡ଼ିଶା ୧୬୩ ରନ୍‌ ସଂଗ୍ରହ କରିଥିଲେ ମଧ୍ୟ ୬ ୱିକେଟ୍‌ ହରାଇସାରିଥିଲା। ସ୍ବସ୍ତିକ କିନ୍ତୁ ରକ୍ଷଣାତ୍ମକ ଖେଳ ଜାରି ରଖି ବିରତି ପରେ ପ୍ରଥମ ଶ୍ରେଣୀ କ୍ରିକେଟ୍‌ରେ ପ୍ରଥମ ଶତକ ଅର୍ଜନ କରିଥିଲେ। ଏହି ଶତକୀୟ ପାଳିରେ ସେ ୨୪୦ ବଲ୍‌ର ସାମ୍ନା କରି ୯ ଚୌକା ଓ ୨ ଛକା ସହାୟତାରେ ୧୧୮ ରନ୍‌ ସଂଗ୍ରହ କରି ଆଉଟ୍‌ ହୋଇଥିଲେ। ଚା’ପାନ ବିରତିର ପାଖାପାଖି ଅଧଘଣ୍ଟା ପୂର୍ବରୁ ଓଡ଼ିଶା ଦ୍ବିଶତକରେ ପହଞ୍ଚିବା ପରେ ଅଲ୍‌ଆଉଟ୍‌ ହୋଇଥିଲା। ପ୍ରତିପକ୍ଷର ରାମକ୍ରିଷ୍ଣା ଘୋଷ (୩/୫୦) ଅଲ୍‌ରାଉଣ୍ଡ ପ୍ରଦର୍ଶନ କରିଥିଲା ବେଳେ ରଜନୀଶ ଗୁର୍ବାନି (୩/୩୮) ଙ୍କ ସହ ମିଶି ଅଧାରୁ ଅଧିକ ୱିକେଟ୍‌ ଖସାଇଥିଲେ।

ଚା’ପାନ ବିରତି ପରେ ଦ୍ବିତୀୟ ପାଳିରେ ମହାରାଷ୍ଟ୍ର ପାଇଁ ସଚିନ ଧାସ୍‌ ଓ ଅର୍ଶିନ କୁଲକର୍ଣ୍ଣି ଭଲ ଆରମ୍ଭ କରିଥିଲେ। ପ୍ରଥମ ୱିକେଟ୍‌ରେ ଉଭୟ ୫୭ ରନ୍‌ ଯୋଡ଼ିବା ପରେ ତରଣୀ ସା’ ଓଡ଼ିଶାକୁ ବିଳମ୍ବିତ ସଫଳତା ଦେଇଥିଲେ। ଗୋଟିଏ ଓଭର ବ୍ୟବଧାନରେ ପ୍ରଥମେ ଅର୍ଶିନ (୨୫) ଓ ପରେ ୟଶ କ୍ଷୀରସାଗର (୮)ଙ୍କୁ ତରଣୀ ଆଉଟ୍‌ କରିଥିଲେ। ପିଚ୍‌ରେ ଜମି ଆସୁଥିବା ସଚିନ (୩୮)ଙ୍କୁ ଗୋବିନ୍ଦ ପୋଦ୍ଦାର ନିଜ ସ୍ପିନ୍‌ ଜାଲରେ ଫସାଇ ଷ୍ଟମ୍ପିଂ କରାଇଥିଲେ। ଦିନର ଖେଳ ବନ୍ଦ ହେବା ବେଳକୁ ଅଧିନାୟକ ଅଙ୍କିତ ବାୱନେ ୭* ଓ ପ୍ରଶାନ୍ତ ସୋଲାଙ୍କି ୦*ରେ ଅପରାଜିତ ଅଛନ୍ତି।

ସଂକ୍ଷିପ୍ତ ସ୍କୋର: ମହାରାଷ୍ଟ୍ର ପ୍ରଥମ ପାଳି ୫୪ ଓଭରରେ ୧୬୨/୧୦ (ରାମକ୍ରିଷ୍ଣା ଘୋଷ-୮୦, ଅଙ୍କିତ ବାୱାନେ-୩୪, ସଚିନ ଧାସ୍‌-୨୦, ସୁମିତ ଶର୍ମା-୪/୩୯, ଗୋବିନ୍ଦ ପୋଦ୍ଦାର-୩/୧୦, ତରଣୀ ସା’-୨/୪୪)। ଓଡ଼ିଶା ପ୍ରଥମ ପାଳି ୮୨.୨ ଓଭରରେ ୨୦୦/୧୦ (ସ୍ବସ୍ତିକ ସାମଲ-୧୧୮, ସନ୍ଦୀପ ପଟ୍ଟନାୟକ-୪୧, ରାଜନୀଶ ଗୁର୍ବାନି-୩/୩୮, ରାମକ୍ରିଷ୍ଣା ଘୋଷ-୩/୫୦, ସତ୍ୟଜିତ ବଛାଭ-୨/୫୦)। ମହାରାଷ୍ଟ୍ର ଦ୍ବିତୀୟ ପାଳି ୨୭ ଓଭରରେ ୭୮/୩ (ସଚିନ ଧାସ୍‌-୩୮, ଅର୍ଶିନ କୁଲକର୍ଣ୍ଣି-୨୫, ତରଣୀ ସା’-୨/୨୭, ଗୋବିନ୍ଦ ପୋଦ୍ଦାର-୧/୧୭)।