ଇନ୍ଦୋର/ବେଙ୍ଗାଲୁରୁ: ରଣଜୀ ଟ୍ରଫି ସେମିଫାଇନାଲ୍ରେ ଉଭୟ ବେଙ୍ଗଲ ଓ କର୍ଣ୍ଣାଟକ ଦୃଢ ସ୍ଥିତିରେ ଅଛନ୍ତି। ଇନ୍ଦୋରରେ ବେଙ୍ଗଲ ପ୍ରଥମ ପାଳି ୪୩୮ରେ ଶେଷ ହୋଇଥିଲା ବେଳେ ବେଙ୍ଗାଲୁରୁରେ କର୍ଣ୍ଣାଟକ ୪୦୭ ରନ୍ରେ ସମସ୍ତ ୱିକେଟ୍ ହରାଇଥିଲା। ଇନ୍ଦୋରରେ ବେଙ୍ଗଲର ଦୁଇ ଅପରାଜିତ ବ୍ୟାଟର ମନୋଜ ତିୱାରୀ (୪୨) ଓ ଶାହବାଜ ଅହମ୍ମଦ (୧୪)ଙ୍କ ମଧ୍ୟରେ ୨୭ ରନ୍ର ଛୋଟ ଭାଗୀଦାରି ପରେ ଅଭିଷେକ ପୋରେଲ୍ଙ୍କ ଅର୍ଦ୍ଧଶତକ (୫୧) ଯୋଗୁଁ ଦଳ ୪୦୦ ପାର୍ କରିଥିଲା ମଧ୍ୟପ୍ରଦେଶର କୁମାର କାର୍ତ୍ତିକେୟ ସର୍ବାଧିକ ୩, ଗୌରବ ଯାଦବ ଓ ଅନୁଭବ ଅଗରୱାଲ୍ ୨ ୱିକେଟ୍ ଲେଖାଏଁ ଅକ୍ତିଆର କରିଥିଲେ। ପରେ ମଧ୍ୟପ୍ରଦେଶ ୨ ୱିକେଟ୍ ବିନିମୟରେ ୫୬ ରନ୍ କରିଛି। ୟାଶ ଦୁବେ ୧୨ ଓ ହିମାଂଶୁ ମନ୍ତ୍ରୀ ୨୩ ରନ୍ କରି ଆଉଟ୍ ହେବା ପରେ ସାରାଂଶ ଜୈନ ୧୭* ଓ ଅନୁଭବ ଅଗରୱାଲ୍ ୪* ରନ୍ କରି ଅପରାଜିତ ଅଛନ୍ତି।
Sambad is now on WhatsApp
Join and get latest news updates delivered to you via WhatsApp
ବେଙ୍ଗାଲୁରୁରେ ଚାଲିଥିବା ଅନ୍ୟ ସେମିଫାଇନାଲ୍ରେ କର୍ଣ୍ଣାଟକର ୪୦୭ ରନ୍ ଜବାବରେ ଦ୍ବିତୀୟ ଦିନର ଷ୍ଟମ୍ପ୍ସ ଅପସାରଣ ବେଳକୁ ସୌରାଷ୍ଟ୍ର ୨ ୱିକେଟ୍ ବିନିମୟରେ ୭୬ ରନ୍ କରିଛି। ସ୍ନେଲ ପଟେଲ୍ ଖାତା ଖୋଲିବା ପୂର୍ବରୁ ଆଉଟ୍ ହୋଇଥିଲା ବେଳେ ବିଶ୍ବରାଜ ଜାଦେଜା ୨୨ ରନ୍ କରି ବିଦ୍ବଥ କାଭେରାପ୍ପାଙ୍କ ଦ୍ବିତୀୟ ଶିକାର ହୋଇଥିଲେ। ଖେଳ ବନ୍ଦ ହେବା ବେଳକୁ ହାର୍ଭିକ ଦେଶାଇ ୨୭* ଓ ସେଲଡନ୍ ଜାକସନ୍ ୨୭* ରନ୍ କରି ଅପରାଜିତ ଅଛନ୍ତି। ଏଥିପୂର୍ବରୁ କର୍ଣ୍ଣାଟକ ପ୍ରଥମ ପାଳିରେ ଅପରାଜିତ ଶ୍ରୀନିବାସ ଶରତ (୬୬) ଆଉ ୮ ରନ୍ ଯୋଗ କରିବା ପରେ ଆଉଟ୍ ହୋଇଥିଲେ। ତେବେ ଅଧିନାୟକ ମୟଙ୍କ ଅଗ୍ରୱାଲ୍ ତାଙ୍କ ପାଳିକୁ ଦ୍ବିଶତକରେ ପରିଣତ କରିବା ସହ ଶେଷ ୱିକେଟ୍ ଭାବେ ଆଉଟ୍ ହୋଇଥିଲେ। ଆଉଟ ହେବା ବେଳକୁ ସେ ୪୨୯ ବଲ୍ରୁ ୨୮ ଚୌକା ଓ ୬ ଛକା ସହାୟତାରେ ୨୪୯ ରନ୍ ସଂଗ୍ରହ କରିସାରିଥିଲେ।