ଦିଲ୍ଲୀକୁ ବାଟ ଛାଡ଼ିଲାନି ମୁମ୍ବାଇ: ପ୍ଲେ ଅଫ୍ରେ ଆର୍ସିବି
ଦିଲ୍ଲୀକୁ ଦୋହଲାଇଲେ ବୁମ୍ରା
ମୁମ୍ବାଇ: ଶେଷ ଲିଗ୍ ମ୍ୟାଚ୍କୁ ଜିତି ସାନ୍ତ୍ବନାମୂଳକ ବିଜୟ ସହ ଚଳିତବର୍ଷର ଅଭିଯାନ ଶେଷ କରିଛି ଆଇପିଏଲ୍ର ସଫଳତମ ଦଳ ମୁମ୍ବାଇ ଇଣ୍ଡିଆନ୍ସ। ମୁମ୍ବାଇ ବିଜୟ କିନ୍ତୁ ଦିଲ୍ଲୀ କ୍ୟାପିଟାଲ୍ସର ପ୍ଳେ ଅଫ୍ ପ୍ରବେଶ ପଥକୁ ବନ୍ଦ କରି ଦେଇଛି। ଶନିବାର ଦିଲ୍ଲୀ କର ବା ମର ସ୍ଥିତିରେ ଥିଲା। ହେଲେ ସ୍କୋରକାର୍ଡରେରେ ଆଶାଜନକ ରନ୍ ଯୋଡ଼ି ପାରି ନଥିଲା। ମୁମ୍ବାଇକୁ ଏହି ଦଳ ମାତ୍ର ୧୬୦ ରନ୍ର ବିଜୟ ଲକ୍ଷ୍ୟ ଦେଇଥିଲା। ଯାହାକୁ ୫ ବଲ୍ ପୂର୍ବରୁ ୫ ୱିକେଟ୍ ବିନିମୟରେ ହାସଲ କରି ନିଜ ବିପର୍ଯ୍ୟସ୍ତଭରା ଅଭିଯାନକୁ ସମ୍ମାନର ସହ ଶେଷ କରିଥିଲା ମୁମ୍ବାଇ। ଦିଲ୍ଲୀ କିନ୍ତୁ ୧୪ ମ୍ୟାଚ୍ରୁ ୭ ବିଜୟ ଓ ୭ ପରାଜୟ ସହ ପଏଣ୍ଟ୍ ତାଲିକାର ପଞ୍ଚମ ସ୍ଥାନରେ ରହି ଦୁଃଖଦ ବିଦାୟ ନେଇଥିଲା। ଅନ୍ୟପକ୍ଷରେ ମୁମ୍ବାଇ ୧୪ ମ୍ୟାଚ୍ରୁ ମାତ୍ର ଚତୁର୍ଥ ବିଜୟ ହାସଲ କରି ସବାଶେଷ ସ୍ଥାନରେ ହିଁ ଅପରିବର୍ତ୍ତିତ ରହିଥିଲା। ମୁମ୍ବାଇ ବିଜୟ ବଳରେ କିନ୍ତୁ ରୟାଲ ଚାଲେଞ୍ଜର୍ସ ବାଙ୍ଗାଲୋର ପ୍ଲେ ଅଫ୍ ଟିକେଟ ପାଇଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଏବେ ପଏଣ୍ଟ ତାଲିକାର ପ୍ରଥମ ଚାରି ସ୍ଥାନରେ ରହି ଗୁଜୁରାଟ ଟାଇଟନ୍ସ (୨୦), ରାଜସ୍ଥାନ ରୟାଲ୍ସ (୧୮), ଲକ୍ଷ୍ନୌ ସୁପର ଜାଏଣ୍ଟସ୍ (୧୮) ଏବଂ ରୟାଲ ଚାଲେଞ୍ଜର୍ସ ବାଙ୍ଗାଲୋର (୧୬) ପ୍ଲେ ଅଫ୍ ଖେଳିବାକୁ ଯୋଗ୍ୟ ବିବେଚିତ ହୋଇଛନ୍ତି। ଲକ୍ଷ୍ନୌ ଓ ରାଜସ୍ଥାନ ସମାନ ୧୮ ପଏଣ୍ଟ ଲେଖାଏଁ ପାଇଥିଲେ ମଧ୍ୟ ରନ୍ ହାରରେ ପଛୁଆ ହୋଇ ଲକ୍ଷ୍ନୌ ତୃତୀୟ ସ୍ଥାନରେ ରହିଛି। ସେଥିପାଇଁ ପ୍ରଥମ ଦୁଇ ସ୍ଥାନରେ ଥିବା ଗୁଜରାଟ ଓ ରାଜସ୍ଥାନ ପ୍ରଥମ କ୍ବାଲିଫାୟର ଖେଳିବେ। ଏହି ମ୍ୟାଚ୍ର ପରାଜିତ ଦଳ ଲକ୍ଷ୍ନୌ ଏବଂ ବାଙ୍ଗାଲୋର ମଧ୍ୟରେ ଖେଳାଯିବାକୁ ଥିବା ଏଲିମିନେଟର ମ୍ୟାଚ୍ର ବିଜେତାକୁ ଦ୍ବିତୀୟ କ୍ବାଲିଫାୟରରେ ଭେଟି ଫାଇନାଲ୍କୁ ଯିବାର ଆଉ ଏକ ସୁଯୋଗ ପାଇବ। ଆଜି ମୁମ୍ବାଇ ଅଧିନାୟକ ରୋହିତ ଶର୍ମା (୨)ଙ୍କୁ ୨୫ ରନ୍ରେ ହରାଇଥିଲା। ତେବେ ଈଶାନ କିଶନଙ୍କ ୪୮, ଦିୱାଲ୍ଡ ବ୍ରେଭିସ୍ଙ୍କ ୩୭ ଏବଂ ଟିମ୍ ଡେଭିଡ୍ଙ୍କ ଦ୍ରୁତ ୩୪ ରନ୍ ବଳରେ ୧୯.୧ ଓଭରରେ ବିଜୟୀ ହୋଇଥିଲା।
ଦିଲ୍ଲୀକୁ ଦୋହଲାଇଲେ ବୁମ୍ରା
ଶନିବାର ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଦିଲ୍ଲୀ କ୍ୟାପିଟାଲ୍ସର ଶୀର୍ଷକ୍ରମକୁ ମୁମ୍ବାଇର ଦ୍ରୁତ ବୋଲିଂ ବାହିନୀ ପାୱାର ପ୍ଲେ ଭିତରେ ହିଁ ଧ୍ବସ୍ତ ବିଧ୍ବସ୍ତ କରି ଦେଇଥିଲା। ମ୍ୟାଚ୍ର ଶ୍ରେଷ୍ଠ ଖେଳାଳି ଯଶପ୍ରୀତ ବୁମ୍ରାଙ୍କ ନେତୃତ୍ବରେ ୧୦ ରନ୍ ଭିତରେ ପୃଥ୍ବୀ ସ’ (୨୪), ଡେଭିଡ୍ ୱାର୍ଣ୍ଣର (୫) ଏବଂ ମିଚେଲ ଷ୍ଟାର୍କ (୦)ଙ୍କୁ ଆଉଟ୍ କରି ପ୍ରତିଟି ରନ୍ ପାଇଁ ସଂଘର୍ଷ କରିବାକୁ ଦିଲ୍ଲୀକୁ ବାଧ୍ୟ କରିଥିଲା। ଅଧିନାୟକ ଋଷଭ ପନ୍ତ (୩୯) ଏବଂ ରୋଭମନ ପାୱେଲ (୪୩) ଲଢ଼ିଥିଲେ। ତେବେ ଅନ୍ୟ କୌଣସି ଦିଲ୍ଲୀ ବ୍ୟାଟର୍ଙ୍କୁ ପାଦ ଜମାଇବାକୁ ମୁମ୍ବାଇ ବୋଲର ସୁଯୋଗ ଦେଇ ନଥିଲେ ମୁମ୍ବାଇ ବୋଲର। ବୁମରା (୩/୨୫)ଙ୍କ ସହ ଡାନିଏଲ୍ ସାମ୍ସ (୧/୩୦) ଏବଂ ରମଣଦୀପ ସିଂହ (୨/୨୯) ମିଳିତ ଭାବେ ୧୦ ଓଭର ବୋଲିଂ କରି ୮୪ ରନ୍ ବ୍ୟୟ କରି ୬ ୱିକେଟ୍ କରାୟତ୍ତ କରି ନେଇଥିଲେ। ଶେଷ ଓଭରଗୁଡ଼ିକରେ ଅଲରାଉଣ୍ଡର୍ ଅକ୍ଷର ପଟେଲ ୧୦ ବଲ୍ରୁ ୧୯* ରନ୍ କରିବା ପରେ ଯାଇ ଦିଲ୍ଲୀ ଦେଢ଼ ଶହ ରନ୍ ଟପିପାରିଥିଲା।