ନୂଆଦିଲ୍ଲୀ:  ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡରେ ଚାଲିଥିବା ଚତୁର୍ଥ ଟେଷ୍ଟ ମ୍ୟାଚ୍ ସମୟରେ ଭାରତୀୟ ଦଳର ଷ୍ଟାର ୱିକେଟକିପର-ବ୍ୟାଟସମ୍ୟାନ୍ ରିଷଭ ପନ୍ତ ଆହତ ହେବାପରେ ଖେଳ ମଝିରୁ ତାଙ୍କୁ ପଡ଼ିଆ ଛାଡ଼ିବାକୁ ପଡ଼ିଥିଲା।

Advertisment

ସମ୍ପ୍ରତି ଖବର ମିଳିଛି କି ରିଷଭ ପନ୍ତଙ୍କୁ ସୁସ୍ଥ ହେବା ପାଇଁ ଅତି କମରେ ୨ ମାସର ସମୟ ଲାଗିବ। ଏହାର ଅର୍ଥ ପନ୍ତ ଇଂଲଣ୍ଡ ବିପକ୍ଷରେ ଚାଲିଥିବା ଟେଷ୍ଟ ସିରିଜରୁ ସମ୍ପୂର୍ଣ୍ଣ ଭାବେ ବାହାରି ଯାଇଛନ୍ତି। 

ସୂଚନାଯୋଗ୍ୟ, ଭାରତୀୟ ଇନିଂସର ୬୮ତମ ଓଭରରେ ପନ୍ତ ଇଂଲଣ୍ଡର ଦ୍ରୁତ ବୋଲର କ୍ରିସ୍ ୱକ୍ସଙ୍କ ସାମ୍ନା କରି ରିଭର୍ସ-ସ୍ୱାଇପ୍ ଖେଳିବାକୁ ଚେଷ୍ଟା କରୁଥିବା ବେଳେ  ବଲଟି ସିଧାସଳଖ ତାଙ୍କ ଜୋତାରେ ଆସି ବାଜିଥିଲା। ଏହି ଆଘାତ ପରେ ପନ୍ତଙ୍କ ଡାହାଣ ଗୋଡ଼ରୁ ରକ୍ତ ବାହାରିବା ସହିତ ଫୁଲି ଯାଇଥିଲା। ସେ ଚାଲି ପାରି ନଥିଲେ। ଏହାପରେ ତାଙ୍କୁ ଆମ୍ବୁଲାନ୍ସ ଯୋଗେ ହସ୍ପିଟାଲ ନିଆଯାଇଥିଲା।

ବିସିସିଆଇର ଏକ ସୂତ୍ରରୁ ପ୍ରକାଶ, "ସ୍କାନ ରିପୋର୍ଟରେ ପନ୍ତଙ୍କ ଗୋଡ଼ରେ ଫ୍ରାକ୍ଚର ନିଶ୍ଚିତ ହୋଇଛି। ସେ ଛଅ ସପ୍ତାହ ପାଇଁ ପଡ଼ିଆରୁ ଦୂରରେ ରହିବେ। ପେନକିଲର ଖାଇବା ପରେ ସେ ପୁଣି ବ୍ୟାଟିଂ କରିପାରିବେ କି ନାହିଁ ତାହା ଦେଖିବାକୁ ଡାକ୍ତରୀ ଦଳ ଚେଷ୍ଟା କରୁଛନ୍ତି। ତଥାପି ପନ୍ତଙ୍କ ବ୍ୟାଟିଂର ସମ୍ଭାବନା ବହୁତ କମ୍ ଦେଖାଯାଉଛି।" 

ପନ୍ତ ଆହତ ହେବା ପରେ ପଞ୍ଚମ ଟେଷ୍ଟ ପାଇଁ ରିଷଭ ପନ୍ତଙ୍କ ସ୍ଥାନରେ ଇଶାନ କିଶନଙ୍କୁ ଦଳରେ ସାମିଲ କରାଯାଇପାରେ ବୋଲି କୁହାଯାଉଛି।