ଆଇପିଏଲ୍-୨୦୨୫: ମହଙ୍ଗା ଖେଳାଳି ହେଲେ ଋଷଭ ପନ୍ତ, କିଣିଲା ଲକ୍ଷ୍ନୌ

ନୂଆଦିଲ୍ଲୀ: ଇଣ୍ଡିଆନ୍‌ ପ୍ରିମିୟର ଲିଗ୍‌ (ଆଇପିଏଲ୍)-୨୦୨୫ ପାଇଁ ମେଗା ନିଲାମୀ ରବିବାର ଆରମ୍ଭ ହୋଇଯାଇଛି। ସାଉଦୀ ଆରବରେ ଆଜି ପ୍ରଥମ ଦିନରେ ଆୟାଜକ ଟିମ୍‌ ମାନେ ନିଜ ପସନ୍ଦର ଖେଳାଳିମାନଙ୍କୁ କିଣୁଛନ୍ତି। ଆଗାମୀ ଆଇପିଏଲ୍‌ ପାଇଁ ଲକ୍ଷ୍ନୌ ସୁପର ଜାଏଣ୍ଟସ ୨୭ କୋଟି ଟଙ୍କାରେ ଋଷଭ ପନ୍ତଙ୍କୁ ନେଇଛି। ଏଥି ସହିତ ଋଷଭ ପନ୍ତ ଆଇପିଏଲ୍‌ ଇତିହାସରେ ସବୁଠାରୁ ଦାମୀ ଖେଳାଳି ହୋଇଛନ୍ତି। 

ଆଇପିଏଲ୍‌ରେ ଋଷଭ ପନ୍ତ ୧୧୧ଟି ମ୍ୟାଚ୍ ଖେଳିଛନ୍ତି। ଏଥିରେ ସେ ୩୨୮୪ ରନ୍ ସଂଗ୍ରହ କରିଛନ୍ତି। ଆଇପିଏଲ୍‌ରେ ତାଙ୍କର ସର୍ବୋଚ୍ଚ ସ୍କୋର ହେଉଛି ୧୨୮ ରନ୍। ସେ ୧୮ ଥର ଅର୍ଦ୍ଧଶତକ ହାସଲ କରିଥିବା ବେଳେ ୨୯୬ଟି ଚୌକା ଓ ୧୫୬ଟି ଛକା ମାରିଛନ୍ତି। 

ଋଷଭ ପନ୍ତଙ୍କ ପରେ ଶ୍ରେୟସ ଆୟର ଦ୍ବିତୀୟ ସର୍ବାଧିକ ମହଙ୍ଗା ଖେଳାଳି ହୋଇଛନ୍ତି। ଶ୍ରେୟସଙ୍କୁ ପଂଜାବ କିଙ୍ଗ୍‌ସ ୨୬.୭୫ କୋଟି ଟଙ୍କାରେ କିଣିଛି। ପୂର୍ବରୁ ଆଇପିଏଲ୍‌ ଇତିହାସରେ ଅଷ୍ଟ୍ରେଲିଆର ଖେଳାଳି ମିଚେଲ ଷ୍ଟାର୍କ ମହଙ୍ଗା ଖେଳାଳି ଥିଲେ। ଆଇପିଏଲ୍‌-୨୦୪ରେ କୋଲକାତା ନାଇଟ୍‌ ରାଇର୍ଡସ ଷ୍ଟାର୍କଙ୍କୁ ୨୪.୭୫ କୋଟି ଟଙ୍କାରେ କିଣିଥିଲା। ସେହିପରି ଗତ ଆଇପିଏଲ୍‌ରେ ଅନ୍ୟତମ ଅଷ୍ଟ୍ରେଲୀୟ ଖେଳାଳି ପ୍ୟାଟ୍‌ କମିନ୍ସଙ୍କୁ ସନ୍‌ରାଇଜର୍ସ ହାଇଦ୍ରାବାଦ୍‌ ୨୦.୫୦ କୋଟି ଟଙ୍କାରେ କିଣିଥିଲା। ଭାରତୀୟ ଯୁବ ବୋଲର ଅର୍ଶଦୀପ ସିଂହଙ୍କୁ ପଂଜାବ ଗତ ଆଇଏପିଏଲ୍‌ରେ ୧୮ କୋଟି ଟଙ୍କାରେ ନେଇଥିଲା। ଆଇପିଏଲ୍‌ ୨୦୨୩ରେ ସାମ୍‌ କୁରାନ୍‌ଙ୍କୁ ପଂଜାବ ସୁପର କିଙ୍ଗ୍‌ସ ୧୮.୯୦ କୋଟି ଟଙ୍କାରେ ନେଇଥିଲା।  

ଆଇପିଏଲ୍‌-୨୦୨୫ ପାଇଁ ନିଲାମ ଅତ୍ୟନ୍ତ ସ୍ୱତନ୍ତ୍ର। କାରଣ ବିଶ୍ୱ କ୍ରିକେଟର ଅନେକ ବଡ ତାରକା ଏଥିରେ ଉପସ୍ଥିତ ଅଛନ୍ତି। ଜୋସ୍ ବଟଲର, ଅର୍ଶଦୀପ ସିଂ, କାଗିସୋ ରାବାଡା, ମିଚେଲ ଷ୍ଟାର୍କ, କେ.ଏଲ୍ ରାହୁଲ, ୟୁଜବେନ୍ଦ୍ର ଚହଲ, ଲିଆମ୍ ଲିଭିଙ୍ଗଷ୍ଟୋନ୍, ଡେଭିଡ ମିଲର, ମହମ୍ମଦ ଶାମି ଏବଂ ମହମ୍ମଦ ସିରାଜଙ୍କ ଭଳି ମେଗା ତାରକା ଅଛନ୍ତି।

ଆଇପିଏଲ୍-୨୦୨୫ ପାଇଁ ନିଲାମରେ ସମୁଦାୟ ୫୭୭ ଖେଳାଳି ଅଛନ୍ତି, ସେମାନଙ୍କ ମଧ୍ୟରୁ ୩୬୭ ଜଣ ଭାରତୀୟ ଏବଂ ୨୧୦ ଜଣ ବିଦେଶୀ। ଅବଶ୍ୟ, ସମସ୍ତ ୧୦ ଟିମ୍‌ର ସର୍ବାଧିକ ୨୦୪ ଖେଳାଳିଙ୍କ ଏକ ଖାଲି ବ୍ରାକେଟ୍ ଅଛି। ଏହାର ଅର୍ଥ ହେଉଛି ନିଲାମରେ କେବଳ ସର୍ବାଧିକ ୨୦୪ ଜଣ ଖେଳାଳି ବିକ୍ରି ହେବେ, ଯେଉଁଥିରୁ ସର୍ବାଧିକ ୭୦ ଜଣ ବିଦେଶୀ ଖେଳାଳି ହେବେ। 

ସବୁଥର ପରି ୨ କୋଟି ଟଙ୍କା ହେଉଛି ସର୍ବୋଚ୍ଚ ମୂଲ୍ୟ। ଏହି ଆଧାର ମୂଲ୍ୟରେ ସମୁଦାୟ ୮୧ ଖେଳାଳି ଅଛନ୍ତି। ଏହା ବ୍ୟତୀତ ସର୍ବନିମ୍ନ ଆଧାର ମୂଲ୍ୟ ହେଉଛି ୩୦ ଲକ୍ଷ ଟଙ୍କା। ଏହା ପୂର୍ବରୁ ଏହା ୨୦ ଲକ୍ଷ ଟଙ୍କା ଥିଲା। ମୂଳ ମୂଲ୍ୟ ୨ କୋଟି ଟଙ୍କା ଥିବା ଅଧିକାଂଶ ଖେଳାଳି ହେଉଛନ୍ତି ଭାରତୀୟ।