ମୁମ୍ବାଇ: ଆସନ୍ତା ସପ୍ତାହରେ ଲଣ୍ଡନରେ ଆରମ୍ଭ ହେବାକୁ ଥିବା ବିଶ୍ବ ଟେଷ୍ଟ ଚାମ୍ପିଅନ୍‌ସିପ୍‌ (ଡବ୍ଲୁଟିସି) ଫାଇନାଲ୍‌ ପାଇଁ ଦ୍ବିତୀୟ ପର୍ଯ୍ୟାୟରେ ରୋହିତ ଶର୍ମା ଓ ଯଶସ୍ବୀ ଜୟସ୍ବାଲ୍‌ ଇଂଲଣ୍ଡ ଗସ୍ତ କରିଛନ୍ତି। ଜୟସ୍ବ‌ାଲ୍‌ ତାଙ୍କ ଇନ୍‌ଷ୍ଟାଗ୍ରାମ ପେଜ୍‌ରେ ରୋହିତଙ୍କ ସହ ଏକ ସେଲ୍‌ଫି ଫଟୋ ପୋଷ୍ଟ କରି ଏହି ଗସ୍ତ ବିଷୟରେ ସୂଚନା ଦେଇଥିଲେ। ଆଇପିଏଲ୍‌ କ୍ବାଲିଫାୟର-୨ରେ ମୁମ୍ବାଇ ଇଣ୍ଡିଆନ୍ସର ପରାଜୟ ପରେ ଈଶାନ କିଶନ ଓ ସୂର୍ଯ୍ୟକୁମାର ଯାଦବ ମୁମ୍ବାଇ ଫେରିଯାଇଥିଲେ। ସେଠାରୁ ସେମାନେ ଇଂଲଣ୍ଡକୁ ଯାତ୍ରା କରିବେ। ଗତ ସପ୍ତାହରେ ଅକ୍ଷର ପଟେଲ, ଉମେଶ ଯାଦବ, ଶର୍ଦ୍ଦୁଳ ଠାକୁର ଓ ବିରାଟ କୋହଲି ଲଣ୍ଡନରେ ପହଞ୍ଚି ଅଭ୍ୟାସ ଆରମ୍ଭ କରିଛନ୍ତି।‌ ସୋମବାର ଆଇପିଏଲ୍‌ ଫାଇନାଲ୍‌ ପରେ ଗୁଜରାଟ ଟାଇଟନ୍ସର ଶୁବମନ ଗିଲ୍‌, ମହମ୍ମଦ ସାମି, କେଏସ୍‌ ଭରତ ଏବଂ ଚେନ୍ନାଇ ସୁପରକିଙ୍ଗ୍ସର ରବୀନ୍ଦ୍ର ଜାଦେଜା, ଅଜିଙ୍କ୍ୟ ରାହାଣେ ତୃତୀୟ ପର୍ଯ୍ୟାୟରେ ଲଣ୍ଡନରେ ପହଞ୍ଚିବେ।