ଇଂଲଣ୍ଡ ବିପକ୍ଷ ଦିନିକିଆ ଖେଳିବେନି ଏହି ୩ଷ୍ଟାର କ୍ରିକେଟର

ମୁମ୍ବାଇ: ଏବେ ଭାରତୀୟ ଦଳ ବର୍ଡର-ଗାଭାସ୍କର ଟ୍ରଫି ୨୦୨୪-୨୫ପାଇଁ ଅଷ୍ଟ୍ରେଲିଆରେ ଅଛି । ଏହା ପରେ ଟିମ୍ ଇଣ୍ଡିଆ ଘରୋଇ ମାଟିରେ ଇଂଲଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଏବଂ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବ। ଏବେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜକୁ ନେଇ ଏକ ଗୁରୁତ୍ୱପୂର୍ଣ୍ଣ ସୂଚନା ସାମ୍ନାକୁ ଆସିଛି। କୁହାଯାଉଛି ଯେ, ଦିନିକିଆ ପାଇଁ ଷ୍ଟାର କ୍ରିକେଟର ରୋହିତ ଶର୍ମା ଏବଂ ବିରାଟ କୋହଲି ଟିମ୍ ଇଣ୍ଡିଆର ଅଂଶ ହେବେ ନାହିଁ। ରୋହିତ-ବିରାଟଙ୍କ ବ୍ୟତୀତ ଦ୍ରୁତ ବୋଲର ଜସପ୍ରୀତ ବୁମରା ମଧ୍ୟ ଦିନିକିଆ ସିରିଜର ଅଂଶ ହେବେ ନାହିଁ ବୋଲି କୁହାଯାଉଛି।

ଇଂଲଣ୍ଡ ବିପକ୍ଷ ସିରିଜ୍, ଚାମ୍ପିଅନ୍ସ ଟ୍ରଫି ୨୦୨୫ପୂର୍ବରୁ ଭାରତ ପାଇଁ ଶେଷ ଦିନିକିଆ ସିରିଜ୍ ହେବ, ଯାହା ଖେଳାଳିମାନଙ୍କୁ ଦିନିକିଆ ଫର୍ମାଟରେ ଅଭ୍ୟାସ କରିବାର ସୁଯୋଗ ଦେବ। ଇଂଲଣ୍ଡ ବିପକ୍ଷରେ ହ୍ବାଇଟ ବଲ୍ ସିରିଜ୍ ଜାନୁଆରି ୨୨ରୁ ଆରମ୍ଭ ହେବ, ଯେଉଁଥିରେ ପ୍ରଥମ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳାଯିବ। ଏହା ପରେ ଫେବ୍ରୁଆରି ୬ରୁ ଦିନିକିଆ ସିରିଜ୍ ଆରମ୍ଭ ହେବ। 

ଉଲ୍ଲେଖଯୋଗ୍ୟ, ରୋହିତ ଶର୍ମା ଏବଂ ବିରାଟ କୋହଲି ଟି-୨୦ ଇଣ୍ଟରନ୍ୟାସନାଲରୁ ଅବସର ନେଇଛନ୍ତି। ତେଣୁ ଦୁହେଁ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ଖେଳିବେ ନାହିଁ।