ସମ୍ବଲପୁରର ବିଜୟଧାରା ଅବ୍ୟାହତ, କିଟ୍‌ ଉଭୟ ମ୍ୟାଚ୍‌ ହାରିଲା

ରାଉରକେଲା: ପାନପୋଷ କ୍ରୀଡ଼ା ଛାତ୍ରାବାସ ପଡ଼ିଆରେ ଚାଲିଥିବା ପୂର୍ବାଞ୍ଚଳ ଜୋନ୍‌ ଅନ୍ତଃବିଶ୍ବବିଦ୍ୟାଳୟ ପୁରୁଷ ହକି ପ୍ରତିଯୋଗିତାରେ ପୋଜିସନ୍‌ ମ୍ୟାଚ୍‌ ଶନିବାରଠାରୁ ଆରମ୍ଭ ହୋଇଯାଇଛି। ପ୍ରତିଯୋଗିତାର ଶ୍ରେଷ୍ଠ ୪ ଦଳ ଭିତରେ ରହି ସର୍ବଭାରତୀୟ ଯୋଗ୍ୟତା ଅର୍ଜନ କରିଥିବା ସମ୍ବଲପୁର, କିଟ୍‌, ମହାତ୍ମା ଗାନ୍ଧି କାଶୀ ବିଦ୍ୟାପୀଠ ଓ ବୀର ବାହାଦୂର ସିଂହ ପୂର୍ବାଞ୍ଚଳ ବିଶ୍ବବିଦ୍ୟାଳୟ ଜୋନ୍‌ ଟପ୍ପର ହେବା ପାଇଁ କଡ଼ା ପ୍ରୟାସ କରିଥିଲେ। ଆଜି ଏହି ୪ଟି ଦଳ ୨ଟି ଲେଖାଏ ମ୍ୟାଚ୍‌ ଖେଳିଥିଲେ। ଏଥିମଧ୍ୟରୁ ସମ୍ବଲପୁର ବିଶ୍ବବିଦ୍ୟାଳୟ ନିଜର ଉଭୟ ମ୍ୟାଚ୍‌କୁ ଜିତିନେଇଥିବାବେଳେ କିଟ୍‌ ତା’ର ଦୁଇ ମ୍ୟାଚ୍‌ରେ ପରାଜୟ ବରଣ କରିଛି। ସେହିଭଳି ମହାତ୍ମା ଗାନ୍ଧି କାଶୀ ବିଦ୍ୟାପୀଠ ଓ ବୀର ବାହାଦୂର ସିଂହ ପୂର୍ବାଞ୍ଚଳ ବିଶ୍ବବିଦ୍ୟାଳୟ ଗୋଟିଏ ଲେଖାଏ ମ୍ୟାଚ୍‌ ଜିତିଥିବାବେଳେ ଅନ୍ୟଥିରେ ପରାସ୍ତ ହୋଇଛନ୍ତି।