ସାମି, ରାହୁଲ, ଈଶାନଙ୍କ ଚମତ୍କାର ଅଭ୍ୟାସ: ଇଂଲଣ୍ଡକୁ ସହଜରେ ହରାଇଲା ଭାରତ
ଦୁବାଇ: ଇଂଲଣ୍ଡ ବିପକ୍ଷ ପ୍ରଥମ ଅଭ୍ୟାସ ମ୍ୟାଚ୍ରେ ଭାରତ ୭ ୱିକେଟ୍ରେ ବିଜୟୀ ହୋଇଛି। ବୋଲିଂ ବେଳେ ମହମ୍ମଦ ସାମି ଚମତ୍କାର ପ୍ରଦର୍ଶନ କରିଥିବାବେଳେ ବ୍ୟାଟିଂ ବେଳକୁ କେଏଲ୍ ରାହୁଲ, ଈଶାନ କିଶନ ଚମତ୍କାର ଖେଳିଥିଲେ। ଭାରତ ଗୋଟିଏ ଓଭର ପୂର୍ବରୁ ୩ ୱିକେଟ୍ ବିନିମୟରେ ୧୯୨ ରନ୍ ସଂଗ୍ରହ କରିଥିଲା।
ଟସ୍ ଜିତି ଭାରତ କ୍ଷେତ୍ରରକ୍ଷଣ କରିବାକୁ ନିଷ୍ପତ୍ତି ନେଇଥିଲା। ଇଂଲଣ୍ଡ ନିର୍ଦ୍ଧାରିତ ଓଭରରେ ୫ ୱିକେଟ୍ ହରାଇ ୧୮୮ ରନ୍ କରିଥିଲା। ଜନି ବେୟାରଷ୍ଟୋ (୪୯ ରନ୍) ମାତ୍ର ୧ ରନ୍ ପାଇଁ ଅର୍ଦ୍ଧଶତକରୁ ବଞ୍ଚିତ ହୋଇଥିଲେ। ତାଙ୍କୁ ଯଶ୍ପ୍ରୀତ ବୁମ୍ରା ବୋଲ୍ଡ କରି ଦେଇଥିଲେ। ମୋଇନ ଅଲ୍ଲୀ ୪୩ (୨୦ ବଲ୍, ୪ ଚୌକା, ୨ ଛକା) ରନ୍ରେ ଅପରାଜିତ ରହିଥିଲା ବେଳେ ଲିଅମ ଲିଭିଂଷ୍ଟୋନ୍ ୩୦ ରନ୍ କରିଥିଲେ। ଭାରତ ପକ୍ଷରୁ ମହମ୍ମଦ ସାମି (୩/୪୦) ସଫଳତମ ବୋଲର ଥିଲେ। ଯଶପ୍ରୀତ ବୁମରା ଓ ରାହୁଲ ଚହର ଗୋଟିଏ ଲେଖାଏଁ ୱିକେଟ୍ ନେଇଥିଲେ। ଭୁବନେଶ୍ବର କୁମାର ସବୁଠାରୁ ମହଙ୍ଗା ସାବ୍ୟସ୍ତ ହୋଇଥିଲେ। ସେ ୪ ଓଭରରେ ୫୪ ରନ୍ ବ୍ୟୟ କରି ୱିକେଟ୍ ଶୂନ୍ୟ ରହିଥିଲେ।
Sambad is now on WhatsApp
Join and get latest news updates delivered to you via WhatsApp
ଜବାବରେ ଭାରତ ପାଇଁ ପ୍ରାରମ୍ଭିକ ଯୋଡ଼ି କେଏଲ୍ ରାହୁଲ୍ (୫୧, ୨୪ ବଲ୍, ୬ ଚୌକା, ୩ ଛକା) ଏବଂ ଈଶାନ କିଶନ (୭୦, ୪୬ ବଲ୍, ୭ ଚୌକା, ୩ ଛକା) ଦୃଢ଼ ମୂଳଦୁଆ ପକାଇବା ପରେ ଋଷଭ ପନ୍ତ୍ (୨୯*, ୧୪ ବଲ୍, ୧ ଚୌକା, ୩ ଛକା) ଏବଂ ହାର୍ଦିକ ପାଣ୍ଡ୍ୟା (୧୬*, ୧୦ ବଲ୍, ୩ ଚୌକା) ମ୍ୟାଚ୍ ଶେଷ କରିଥିଲେ। କ୍ରିସ୍ ଜୋର୍ଡାନଙ୍କୁ ଛକା ମାରି ପନ୍ତ୍ ମ୍ୟାଚ୍ ଶେଷ କରିଥିଲେ। ତେବେ ଅଧିନାୟକ ବିରାଟ କୋହଲି (୧୧, ୧୩ ବଲ୍) ଏବଂ ସୂର୍ଯ୍ୟକୁମାର ଯାଦବ (୮, ୯ ବଲ୍)ଙ୍କ ବିଫଳତା ଭାରତୀୟ ଦଳ ପାଇଁ ଚିନ୍ତାର କାରଣ ହୋଇଛି। ଇଂଲଣ୍ଡ ପକ୍ଷରୁ ମାର୍କ ଉଡ୍, ଡେଭିଡ୍ ୱିଲି, ଲିଆମ୍ ଲିଭିଙ୍ଗଷ୍ଟୋନ୍ ଗୋଟିଏ ଲେଖାଏଁ ୱିକେଟ୍ ନେଇଥିଲେ।