ନୂଆଦିଲ୍ଲୀ: ଭାରତୀୟ କ୍ରିକେଟ୍‌ ଦଳର ଦ୍ରୁତ ବୋଲର ମହମ୍ମଦ ସାମି ଦୁର୍ଘଟଣାର ଶିକାର ହୋଇଥିବା ଜଣେ ବ୍ୟକ୍ତିଙ୍କୁ ସୁରକ୍ଷିତ ଉଦ୍ଧାର କରି ମହାନତା ଦେଖାଇଛନ୍ତି। ନୈନିତାଲଠାରେ ବନ୍ଧୁମାନଙ୍କ ସହ ପାହାଡ଼ିଆ ରାସ୍ତା ଦେଇ ଯାଉଥିବା ବେଳେ କଡ଼ରେ ଏକ କାର୍‌ ଦୁର୍ଘଟଣାଗ୍ରସ୍ତ ହୋଇଥିବା ଦେଖାଯାଇଥିଲା। ତୁରନ୍ତ ସାମି ଓ ତାଙ୍କ ବନ୍ଧୁମାନେ କାର୍‌ ପାଖକୁ ଯାଇ ତାହାର ଚାଳକଙ୍କୁ ସୁରକ୍ଷିତ ବାହାରକୁ ଆଣିଥିଲେ। ସାମାନ୍ୟ ବିଳମ୍ବ ହୋଇଥିଲେ ହୁଏତ କାର୍‌ଟି ପାହାଡ଼ ତଳକୁ ଖସିପଡ଼ିଥା’ନ୍ତା। ଏହି ଘଟଣାକୁ ସାମି ତାଙ୍କ ଇନ୍‌ଷ୍ଟାଗ୍ରାମ୍‌ ପେଜ୍‌ରେ ପୋଷ୍ଟ କରିଥିଲା ବେଳେ ସଂପୃକ୍ତ ବ୍ୟକ୍ତିଙ୍କୁ ଭଗବାନ ଦ୍ବିତୀୟ ଜୀବନ ଦେଇପାରିଥିବାରୁ ସେ ବହୁତ ଭାଗ୍ୟବାନ୍‌ ବୋଲି ଲେଖିଥିଲେ। ସୂଚନାଯୋଗ୍ୟ, ସାମି ନିକଟରେ ଶେଷ ହୋଇଥିବା ଦିନିକିଆ ବିଶ୍ବକପ୍‌ରେ ସର୍ବାଧିକ ୱିକେଟ୍‌ ନେଇଥିଲେ।