ସୟଦ ମୁସ୍ତାକ ଅଲ୍ଲୀ ଟ୍ରଫି: ପପୁଙ୍କ ଶ୍ରେଷ୍ଠ ପ୍ରଦର୍ଶନ, ଓଡ଼ିଶାର ତୃତୀୟ ବିଜୟ
କଟକ: ଗୋଟିଏ ପରେ ଗୋଟିଏ ଶ୍ରେଷ୍ଠ ପ୍ରଦର୍ଶନ ଦେଇଚାଲିଥିବା ବାମହାତୀ ସ୍ପିନର ପପୁ ରାଏଙ୍କ ଯୋଗୁଁ ଓଡ଼ିଶା ସୟଦ ମୁସ୍ତାକ ଅଲ୍ଲୀ ଟ୍ରଫିରେ ତୃତୀୟ ବିଜୟ ପାଇଛି। ବୁଧବାର ଡ୍ରିମ୍ସ ପଡ଼ିଆରେ ଖେଳାଯାଇଥିବା ମ୍ୟାଚ୍ରେ ଓଡ଼ିଶା ୭ ଵିକେଟରେ ଆସାମକୁ ହରାଇଦେଇଛି। ଟସ୍ ଜିତି ଓଡ଼ିଶା ବୋଲି˚ କରିଥିଲା। ବ୍ୟାଟ୍ସମ୍ୟାନମାନଙ୍କ ଛୋଟଛୋଟ ଭାଗୀଦାରି ବଳରେ ଆସାମ ୯ ଵିକେଟ୍ ବିନିମୟରେ ୧୪୨ ରନ୍ କରିଥିଲା। ଶିବଶଙ୍କର ରଏ ୪୭, ଜିତୁମଣି କାଲିଟା ୩୧ ରନ୍ କରିଥିଲା ବେଳେ ଓଡ଼ିଶା ପାଇଁ ପପୁ ରାଏ ପୁଣି ତାଙ୍କର ଶ୍ରେଷ୍ଠ ପ୍ରଦର୍ଶନ ଦେଇ ୨୧ ରନ୍ ବିନିମୟରେ ୪ ଵିକେଟ ଦଖଲ କରିଥିଲେ। ଅନ୍ୟମାନଙ୍କ ମଧ୍ୟରେ ସୂର୍ଯ୍ୟକାନ୍ତ ପ୍ରଧାନ, ଦେବବ୍ରତ ପ୍ରଧାନ, ବିପ୍ଲବ ସାମନ୍ତରାୟ, ପ୍ରୟାସ ସି˚ହ ଗୋଟିଏ ଲେଖାଏଁ ଵିକେଟ୍ ନେଇଥିଲେ। ୧୪୩ ରନ୍ର ଲକ୍ଷ୍ୟକୁ ପିଛା କରିଥିବା ଓଡ଼ିଶା ୧୬.୫ ଓଭରରେ ୩ ଵିକେଟ୍ ହରାଇ ମ୍ୟାଚ୍ ଜିତିଯାଇଥିଲା। ସନ୍ଦୀପ ପଟ୍ଟନାୟକ ୨୧, ରାଜେଶ ଧୂପର ୨୭, ବିପ୍ଲବ ସାମନ୍ତରାୟ ୪୯ ରନ୍ କରି ଆଉଟ ହୋଇଥିଲା ବେଳେ ଅନୁରାଗ ଷଡ଼ଙ୍ଗୀ ଅପରାଜିତ ୪୩ ରନ୍ କରି ଦଳକୁ ଜିତାଇଥିଲେ। ଅରବିନ୍ଦ ସି˚ହ କୌଣସି ରନ୍ ନକରି ଅପରାଜିତ ରହିଥିଲେ। ୫ ମ୍ୟାଚ୍ରୁ ତୃତୀୟ ବିଜୟ ସତ୍ତ୍ବେ ୮ ଦଳୀୟ ଗ୍ରୁପ୍-ଡି’ରେ ଓଡ଼ିଶା ପଞ୍ଚମ ସ୍ଥାନରେ ରହିଛି। ପରାଜୟ ସତ୍ତ୍ବେ ଆସାମ ସମାନ ପଏଣ୍ଟ୍ ପାଇ ଓଡ଼ିଶା ଉପରକୁ ଚତୁର୍ଥରେ ରହିଛି। ସେହିପରି ଓଡ଼ିଶା ଓ ଆସାମ ଭଳି ସମାନ ୧୨ ପଏଣ୍ଟ୍ ସତ୍ତ୍ବେ ବେଙ୍ଗଲ ଓ ଛତିଶଗଡ଼ ଯଥାକ୍ରମେ ଦ୍ବିତୀୟ ଓ ତୃତୀୟ ସ୍ଥାରେ ରହିଥିଲା ବେଳେ ଅପରାଜେୟ ସହ ସର୍ବାଧିକ ୨୦ ପଏଣ୍ଟ୍ ସହ କର୍ଣ୍ଣାଟକ ଗ୍ରୁପ୍ ଶୀର୍ଷରେ ଦୃଢ଼ ରହିଛି।
Sambad is now on WhatsApp
Join and get latest news updates delivered to you via WhatsApp
ରିଦ୍ଧିମାନଙ୍କ ଶତକ; ବେଙ୍ଗଲ, ହରିଆଣା, କର୍ଣ୍ଣାଟକ ବିଜୟୀ
ଭାରତୀୟ ଟେଷ୍ଟ୍ ଦଳର ପୂର୍ବତନ ଵିକେଟ୍ ରକ୍ଷକ ରିଦ୍ଧିମାନ ଶାହା ବୁଧବାର ସୟଦ ମୁସ୍ତାକ ଅଲ୍ଲୀ ଟ୍ବେଣ୍ଟି-୨୦ରେ ଶତକ ଅର୍ଜନ କରିଛନ୍ତି। ବାରବାଟୀ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ରିଦ୍ଧିମାନଙ୍କ ଆକର୍ଷଣୀୟ ପାଳି ଯୋଗୁଁ ବେଙ୍ଗଲ ୧୦୭ ରନ୍ରେ ଅରୁଣାଚଳ ପ୍ରଦେଶକୁ ହରାଇଛି। ରିଦ୍ଧିମାନ (୧୨୯ ରନ୍, ୬୨ ବଲ୍, ୧୬ ଚୌକା ଓ ୪ ଛକା)ଙ୍କ ଦମ୍ଦାର ଶତକ ବଳରେ ବେଙ୍ଗଲ ୬ ଵିକେଟ୍ ବିନିମୟରେ ୨୩୪ ରନ୍ କରିଥିଲା। ତାଙ୍କ ବ୍ୟତୀତ ଅଭିମନ୍ୟୁ ଇଶ୍ବରନ୍ ୩୧, ବିବେକ ସି˚ହ ୪୯ ରନ୍ର ଯୋଗଦାନ କରିଥିଲେ। ଜବାବରେ ଅରୁଣାଚଳ ୧୨୭ ରନ୍ରେ ସୀମିତ ରହିଥିଲା। କ୍ଷୀତିଜ ଶର୍ମା ୫୪ ଓ ଡୋରିଆ ୪୩ ରନ୍ କରିଥିଲେ। ବାରବାଟୀରେ ଖେଳାଯାଇଥିବା ଅନ୍ୟ ଏକ ମ୍ୟାଚ୍ରେ କର୍ଣ୍ଣାଟକ ୪ ଵିକେଟରେ ଛତିଶଗଡ଼କୁ ହରାଇଛି। ଛତିଶଗଡ଼ ହରିପ୍ରୀତ୍ ସି˚ହ ଭାଟିଆଙ୍କ ୭୯ ରନ୍ ସହାୟତାରେ ୧୭୧ ରନ୍ କରିଥିଲା। କର୍ଣ୍ଣାଟକ ୧୭୨ ରନ୍ର ଲକ୍ଷ୍ୟକୁ ୪ ବଲ୍ ପୂର୍ବରୁ ହାସଲ କରିଥିଲା। ଡ୍ରିମ୍ସରେ ଅନୁଷ୍ଠିତ ମ୍ୟାଚ୍ରେ ହରିୟାଣା ୩୯ ରନ୍ରେ ମିଜୋରାମ୍କୁ ପରାସ୍ତ କରିଛି। ଗୁନତସଭିର ସି˚ହଙ୍କ ଅପରାଜିତ ଶତକ (୧୦୦*) ବଳରେ ହରିୟାଣା ୨ ଵିକେଟ ବିନିମୟରେ ୨୦୫ ରନ୍ କରିଥିଲା। ତେବେ ମିଜୋରାମ ନିର୍ଧାରିତ ଓଭର ବେଳକୁ ୫ ଵିକେଟ ହରାଇ ୧୬୬ ରନ୍ କରିବାକୁ ସକ୍ଷମ ହୋଇଥିଲା। ତରୁଵର କୋହଲି ୬୩, ଅଖିଲ ରାଜପୁତ ୫୯ ରନ୍ର ଅର୍ଧଶତକୀୟ ପାଳି ଖେଳିଥିଲେ ବି ଦଳକୁ ଜିତାଇପାରିନଥିଲେ।